Eaha to roto?

Mau faaho'iraa ê

Tapura tumu parau

Ite no Iehova

Tahiti

Eaha ta te Bibilia e haapii mai?

 PENE AHURU MA HOÊ

No te aha ua rahi roa te mauiui?

No te aha ua rahi roa te mauiui?

1, 2. E rave rahi o te uiui i teihea mau uiraa?

UA INO roa te tahi oire iti i muri a‘e i te tahi miti faaî. Ua haere mai te hoê taata i roto i te tahi fare pure e ta ’na pupuhi, e rave rahi tei pohe e tei pepe. Ua pohe te tahi metua vahine no te mariri ai taata, e pae tamarii ta ’na i vaiiho mai.

2 Ia tupu te ati mai tera, e rave rahi o te uiui, ‘No te aha te reira i tupu ai? No te aha ua rahi roa te mauiui e te ino na te ao?’ Ua feruri atoa anei oe mai tera?

3, 4. (a) Eaha te mau uiraa ta Habakuka i ani ia Iehova? (b) Mea nafea te Atua i te pahonoraa ia ’na?

3 Te faaite ra te Bibilia, ua uiui atoa te mau tavini e faaroo puai to ratou i te Atua i tera mau uiraa. A hi‘o na i te peropheta Habakuka. Ua ani oia ia Iehova: “Eaha ra hoi oe i faaite mai ai i te ino, e ia hi‘o hoi au i te oto ra? te vai nei hoi te haru e te rave aroha ore i mua ia ’u nei: e te vai nei hoi te feia e faatupu i te mârô e te tama‘i.”—Habakuka 1:3.

4 Ua pahono te Atua i te mau uiraa a te peropheta i roto i te Habakuka 2:2, 3. Ua fafau atoa ’tu oia i ta ’na e rave no te faaafaro i te reira. Mea here roa na Iehova i te taata. Te na ô ra hoi te Bibilia: “Te tâu‘a mai ra oia.” (Petero 1, 5:7) Mea au ore roa na te Atua ia ite i te taata ia mauiui. (Isaia 55:8, 9) I teie nei, e hi‘opoa ana‘e no te aha ua rahi roa te mauiui na te ao.

 NO TE AHA UA RAHI ROA TE MAUIUI NA TE AO?

5. Eaha ta te mau tia haapaoraa e parau no nia i te tumu o te mau ati? Eaha ta te Bibilia e haapii ra?

5 E pinepine te mau orometua, perepitero e tia haapaoraa i te parau, o te Atua te tumu o te mau ati. E na ô paha vetahi, ‘Ua faaoti a‘ena te Atua eaha te tupu i roto i te oraraa o te taata, oia atoa te mau ati ta ratou e faaruru. Eita e nehenehe e faataa i te reira.’ Peneia‘e, e na ô te tahi atu, ‘E pohe te taata, oia atoa te tamarii no te haere i pihai iho i te Atua i te ra‘i.’ Mea hape roa râ! E ere roa ’tu o Iehova te tumu o teie mau ati. Te na ô ra te Bibilia: “Eiaha roa te parau ino ra e hurihia ’tu i te Atua! eiaha roa te Puaihope ia parauhia i te rave parau ino ra!”—Ioba 34:10.

6. No te aha e rave rahi te mana‘o o te Atua te tumu o te mau ati atoa na te ao?

6 E rave rahi o te mana‘o o te Atua te tumu e mauiui ai te taata no te mea te tiaturi ra ratou na ’na e faatere ra i te ao. Mai ta tatou râ i haapii i roto i te pene 3, o te Diabolo ra o Satani te faatere mau ra i te ao.

7, 8. Eaha te tumu i rahi roa ’i te mauiui na te ao?

7 Te parau ra te Bibilia: “Te vai nei râ to te ao atoa i raro a‘e i te mana o te varua ino.” (Ioane 1, 5:19) Mea ino roa Satani, te faatere o teie nei ao, e mea au roa na ’na ia mauiui te taata. O ’na “te haavare nei i to te ao atoa nei.” (Apokalupo 12:9) E rave rahi o te pee ra i to ’na huru ma te haavare, ma te rave i te ino e ma te haamauiui ia vetahi ê. Tera te tahi tumu i rahi roa ’i te mauiui na te ao.

8 E ere râ tera ana‘e. I muri a‘e i te orureraa hau a Adamu e Eva, ua tutuu raua i te hara, aore ra te huru  tia ore, i ta raua huaai tamarii. E nehenehe vetahi ê e mauiui no te huru tia ore o te tahi taata. E pinepine ratou i te faateitei. E faatupu i te aroraa, te tama‘i, e hamani ino aore ra e faahepo ia vetahi ê. (Koheleta 4:1; 8:9) I te tahi atoa taime, e mauiui aore ra e ati te taata ia tupu te tahi ohipa i te vahi e te taime mana‘o-ore-hia.—Koheleta 9:12.

9. No te aha mea tano ia parau e tumu papu e vaiiho noa ’i te Atua ia tupu te ati?

9 E ere roa ’tu o Iehova te tumu e mauiui ai te taata. E ere o ’na te faatupu ra i te mau tama‘i, ohipa iino e te hamani-ino-raa. E ere atoa o ’na to muri mai i te mau ati mai te aueueraa fenua, mata‘i rorofai e te pape pue. E na ô paha oe, ‘O Iehova te mea puai roa ’‘e, no te aha o ’na e ore ai e tapea i tera mau ati?’ I te mea te tâu‘a mau ra te Atua ia tatou, no te aha ïa o ’na e vaiiho noa ’i ia tupu te ati? Te vai ra ïa hoê tumu papu, e ere anei?—Ioane 1, 4:8.

NO TE AHA TE ATUA E VAIIHO AI IA MAUIUI TE TAATA?

10. Ua faaino Satani ia Iehova, eaha hoi ta ’na i parau?

10 I roto i te ô Edene, ua turai te Diabolo ia Adamu raua Eva ia hara. Ua parau Satani e faatere ino te Atua. Ua tapea noa oia i te tahi maitai na ’na e aita i horoa atoa na Adamu e Eva. Ua hinaaro Satani ia tiaturi raua mea maitai a‘e ta ’na huru faatereraa i ta Iehova e aita e faufaa no raua ia haapao i te Atua.—Genese 3:2-5; a hi‘o i te faataaraa hau 27 i te pae hopea o te buka.

11. E hinaaro tatou i te pahonoraa o teihea uiraa?

11 Ua faaroo ore Adamu e Eva ia Iehova e ua orure hau ia ’na. Ua mana‘o toopiti, e tiaraa to raua no te faaoti  eaha te mea maitai e eaha te mea ino. Eaha ta Iehova e rave no te haapapu ua hape Adamu e Eva e o ’na tei ite eaha te mea maitai no tatou?

12, 13. (a) No te aha aita o Iehova i haamou ia Adamu e Eva i tera iho â taime? (b) No te aha o Iehova i vaiiho ai ia Satani ia riro ei faatere no teie nei ao e i te taata ia faatere ia ratou iho?

12 Aita o Iehova i haamou ia Adamu e Eva i tera iho â taime, ua vaiiho râ ia raua ia tamariihia. Ua hinaaro oia na ta raua iho tamarii e faaoti o vai ta ratou e maiti ei faatere. Te opuaraa a Iehova, ia î ïa te fenua i te taata tia roa. E tupu iho â te reira noa ’tu te mau raveraa a te Diabolo.—Genese 1:28; Isaia 55:10, 11.

13 Ua patoi e ua faaino Satani ia Iehova i mua e mirioni e e mirioni melahi. (Ioba 1:6; Apokalupo 5:11) Ua vaiiho ïa Iehova ia Satani i te taime no te haapapu ua tano anei ta ’na pariraa. Ua vaiiho atoa oia i te taime i te taata ia haamau i ta ratou iho faatereraa i raro a‘e i te aratairaa a Satani. Na te tau e faaite, e maitaihia anei ratou i te ore e haapao i te Atua.

14. Eaha ta te tau i haapapu?

14 Ehia a‘enei matahiti i teie nei, ua tamata te taata i te faatere ia ratou iho, aita râ i manuïa. Ua haapapuhia ua haavare o Satani. E hinaaro mau te taata i te tauturu a te Atua. Ua tano te peropheta Ieremia i te parauraa: “Ua ite hoi au, e Iehova, e ere tei te taata iho to ’na haerea; e ere hoi tei taua taata e haere ra i te haapao i to ’na taahiraa.”—Ieremia 10:23.

NO TE AHA E TITAUHIA TE TAIME?

15, 16. (a) No te aha te Atua i vaiiho ai ia mauiui te taata ehia maororaa matahiti i teie nei? (b) Eaha te tumu eita o Iehova e tapea i te mau ati ta Satani e faatupu?

15 No te aha te Atua i vaiiho ai ia mauiui te taata  ehia maororaa matahiti i teie nei? No te aha o ’na e ore ai e tapea i te mau ati? E titauhia te taime no te haapapu aita ta Satani huru faatereraa i manuïa. Ua tamata te taata i te mau hoho‘a faatereraa atoa, aita atoa ratou i manuïa. Noa ’tu ua haere te taata i mua i roto i te ihi e te mau ravea apî, te rahi noa ’tura te ohipa tia ore, te veve, te ino e te tama‘i. Aita ana‘e te tauturu a te Atua, eita tatou e nehenehe e faatere maitai ia tatou.

16 Eita te Atua e tapea i te mau ati ta Satani e faatupu. Ia na reira oia, e turu o ’na i te faatereraa a Satani. I to oe mana‘o, e na reira anei te Atua? Eita roa ’tu ïa! E mana‘o atoa ïa te taata, e nehenehe iho â ta ratou e faatere maitai ia ratou iho. E haavare tera, e turu anei o Iehova i te haavare? Eita roa ’tu!—Hebera 6:18.

17, 18. Eaha ta Iehova e rave no te ino atoa ta Satani i faatupu?

17 E nehenehe anei o Iehova e faaore i te mau fifi atoa o tei tupu no te orureraa hau a Satani e a te taata? E, e tia te mau mea atoa i te Atua. Ua ite o Iehova i teihea taime e haapapuhia ’i mea hape te mau pariraa atoa a Satani. I muri a‘e, e faariro oia i te fenua ei paradaiso mai ta ’na i opua na. E tia faahou mai te feia atoa i roto i “te menema.” (Ioane 5:28, 29) Eita te taata e ma‘ihia e e pohe faahou. Eaha ta Iehova e rave no te ino atoa ta Satani i faatupu? E faaohipa o ’na ia Iesu “no te faaore i te mau ohipa a te Diabolo.” (Ioane 1, 3:8) Auê tatou i te mauruuru i te faaoromai rahi o Iehova. Ua vaiiho mai hoi oia i te taime no te haapii o vai o ’na e no te faaoti o ’na anei ta tatou e maiti ei faatere. (A taio i te Petero 2, 3:9, 10.) Noa ’tu e mauiui tatou, e tauturu mai oia ia faaoromai.—Ioane 4:23; a taio i te Korinetia 1, 10:13.

 18 Aita o Iehova e faahepo mai ra ia maiti ia ’na ei faatere no tatou. Ua horoa o ’na i te taata i te tiamâraa ia maiti. E hi‘o ana‘e eaha te faufaaraa o tera ô faahiahia mau.

E NAFEA OE IA FAAOHIPA I TO OE TIAMÂRAA IA MAITI?

19. Eaha te ô faahiahia mau ta Iehova i horoa mai? No te aha e tia ia mauruuru tatou i tera ô?

19 Aita tatou i hamanihia mai te animara. E ere atoa tatou mai te matini o te rave noa i tei faauehia ia ’na. Na tatou iho e faaoti o vai to tatou mau hoa, e riro anei tatou ei taata maitai e aore ra ei taata ino, oia atoa eaha te oraraa ta tatou e hinaaro. Ua horoa mai o Iehova i te hoê ô faahiahia mau, te tiamâraa ia maiti. Aita oia e faahepo mai ra ia rave i te mau mea e oaoa ’i o ’na ia tatou. (Deuteronomi 30:19) Te imi noa ra o Iehova i to tatou maitai, tirara ’tu ai.

20, 21. Eaha te faaotiraa maitai roa ’‘e o ta oe e nehenehe e rave i teie nei?

20 Te hinaaro ra o Iehova ia here tatou ia ’na. (Mataio 22:37, 38) E au o ’na i te hoê metua tane o te oaoa ia parau atu ta ’na tamarii ma te aau tae, ‘Papa, mea here roa na ’u ia oe!’ Ua horoa mai o Iehova i te tiamâraa ia maiti e tavini anei tatou ia ’na e aore ra eita. Ua faaoti Satani, Adamu e Eva i te patoi ia Iehova. E oe, e nafea oe ia faaohipa i to oe tiamâraa ia maiti?

21 A faaoti i te tavini ia Iehova. E mirioni tei maiti i te faaoaoa i te Atua e te patoi ia Satani. (Maseli 27:11) Eaha te tia ia oe ia rave i teie nei no te ora i roto i te ao apî a te Atua aita faahou e mauiui i reira? E pahonohia tera uiraa i roto i te pene i mua ’tu.