Eaha to roto?

Mau faaho'iraa ê

Tapura tumu parau

Ite no Iehova

Tahiti

Eaha ta te Bibilia e haapii mai?

 PENE AHURU MA HITU

E fana‘oraa taa ê ia pure i te Atua

E fana‘oraa taa ê ia pure i te Atua

Te hinaaro ra “tei hamani i te mau ra‘i e te fenua nei” e faaroo i ta tatou mau pure.—Salamo 115:15

1, 2. I to oe mana‘o, no te aha e ô taa ê mau te pure? No te aha e titauhia ia ite tatou i ta te Bibilia e parau ra no nia i te pure?

MEA hu‘a roa te fenua ia faaauhia i te ao nui. Ia hi‘o o Iehova i te fenua, e au te mau nunaa atoa i te topata iti pape i roto i te patete. (Salamo 115:15; Isaia 40:15) Noa ’tu râ, te na ô ra te Salamo 145:18, 19: “Te fatata maira Iehova i te feia e tiaoro atu ia ’na, i te feia atoa i tiaoro atu ia ’na ma te haavare ore. E faatia oia i te hinaaro o te feia i mǎta‘u ia ’na, e faaroo mai oia i ta ratou tiaoro, e e faaora hoi ia ratou.” Auê fana‘oraa taa ê, e ere anei? Te hinaaro ra o Iehova, te Atua poiete e te Mana hope e faafatata mai e e faaroo i ta tatou mau pure. E haamaitairaa mau te pure, e ô taa ê te reira ta Iehova i horoa i te taata tataitahi.

2 E faaroo noa mai râ o Iehova ia pure tatou mai ta ’na e ani ra. Eaha ïa ta ’na mau titauraa? E hi‘o ana‘e eaha ta te Bibilia e parau ra no nia i te pure.

NO TE AHA E PURE AI IA IEHOVA?

3. No te aha e tia ia pure oe ia Iehova?

3 Te hinaaro ra o Iehova ia pure, aore ra ia paraparau, oe ia ’na. Na te aha e haapapu ra? A taio na i te Philipi 4:6, 7. A feruri na i tera titau-manihini-raa mahanahana mau. Te tâu‘a mau ra te Atua o tei poiete i te ao nui ia oe. Te hinaaro ra oia ia faaite atu oe i to oe mau mana‘o e to oe mau fifi.

4. E nafea oe ia piri roa ’tu â ia Iehova ia pure tamau oe ia ’na?

 4 E tauturu mai te pure ia faatupu i te hoê auhoaraa piri e o Iehova. Ia paraparau tamau e piti hoa, ia faaite raua i te tahi e te tahi i to raua mau mana‘o, huru e haapeapearaa, e piri atu â raua. Hoê â huru ia pure oe ia Iehova. Na roto i te Bibilia, ua faaite o Iehova ia oe i to ’na mau mana‘o, to ’na huru e ta ’na e rave i mua nei. E nehenehe atoa oe e faaite atu i to oe mau mana‘o horuhoru ma te paraparau tamau ia ’na. Ma te na reira, e piri roa ’tu â oe ia Iehova.—Iakobo 4:8.

EAHA TE TIA IA RAVE IA FAAROO TE ATUA I TA TATOU PURE?

5. Eaha te haapapu ra eita o Iehova e faaroo i te mau pure atoa?

5 E faaroo anei o Iehova i te mau pure atoa? Eita. I te tau o te peropheta Isaia, ua parau o Iehova i te mau Iseraela: “Ia pinepine noa ta outou pure, e ore au e faaroo atu; ua îî hoi to outou rima i te toto.” (Isaia 1:15) Te auraa, ia ore tatou e haapao maitai, e nehenehe tatou e rave i te mau mea ta Iehova e ore e au. Eita ’tura o ’na e hinaaro  e faafatata mai ia tatou e e faaroo i ta tatou mau pure.

6. No te aha mea faufaa te faaroo? Eaha te rave no te haapapu e faaroo to oe?

6 Ia hinaaro tatou ia farii o Iehova i ta tatou pure, e tia ia faatupu i te faaroo ia ’na. (Mareko 11:24) Ua faataa te aposetolo Paulo: “E ore roa te Atua e mauruuru i te taata aita e faaroo to ’na, ia tiaturi hoi te taata e faafatata i te Atua e te ora ra oia e e riro mai oia ei Atua o te haamaitai i te feia e imi maite nei ia ’na.” (Hebera 11:6) Eita ïa e navai ia parau e faaroo to tatou. E titau-atoa-hia râ ia haapapu i te reira ma te haapao i ta Iehova e ani mai ra i te mau mahana atoa.—A taio i te Iakobo 2:26.

7. (a) No te aha e tia ia faaite i te haehaa e te faatura ia pure tatou ia Iehova? (b) Eaha te rave no te faaite ua pure tatou ma te aau tae?

7 E tia ia faaite i te haehaa e te faatura ia pure tatou ia Iehova. Eaha te tumu? A feruri na e haere tatou e farerei i te hoê arii aore ra peretiteni. E paraparau atu tatou ma te faatura, e ere anei? E o Iehova, e ere anei o ’na te Atua Mana hope? E mea tia ïa ia faaite tatou i te faatura e te haehaa rahi a‘e ia paraparau tatou ia ’na. (Genese 17:1; Salamo 138:6) E tia atoa ia feruri maitai i ta tatou e faahiti ra i roto i te pure, e paraparau tatou ia Iehova ma te aau tae mau, eiaha râ e na nia iho noa, e na nia iho noa te parau.—Mataio 6:7, 8.

8. Ia ani tatou i te tahi mea na roto i te pure, eaha ’tu â te titauhia ia rave?

8 Eaha ’tu â te tia ia haapao? E mea tia ia rave i te mau mea atoa no te haa ia au i ta tatou e ani na roto i te pure. A hi‘o na, ia pure tatou ia Iehova no to tatou mau hinaaro o te mau mahana atoa, eiaha tatou ia riro ei taata hupehupe e e tiai e na Iehova e horoa mai i te mau mea atoa. Mai te peu iho â râ, e nehenehe ta tatou e rave i te ohipa no te fana‘o i te reira. E riro tatou ei taata itoito e te  farii i te rave i te ohipa. (Mataio 6:11; Tesalonia 2, 3:10) Ia pure tatou ia Iehova ia tauturu mai ia faaea i te rave i te tahi peu ino, e tia ia ape i te mau tupuraa atoa o te nehenehe e faahema ia tatou. (Kolosa 3:5) I teie nei, e hi‘opoa ana‘e i te tahi mau uiraa pinepine no nia i te pure.

UIRAA PINEPINE NO NIA I TE PURE

9. E tia ia pure tatou ia vai? Ia au i te Ioane 14:6, eaha ta tatou e haapii mai no nia i te pure?

9 E tia ia pure tatou ia vai? Ua haapii Iesu i ta ’na mau pǐpǐ ia pure i to tatou “Metua i te ra‘i.” (Mataio 6:9) Ua na ô atoa oia: “O vau te e‘a e te parau mau e te ora. Aore roa e taata e tae i te Metua ra, na roto noa râ ia ’u.” (Ioane 14:6) E tia ïa ia pure tatou ia Iehova ana‘e na roto ia Iesu. Eaha te auraa e pure na roto ia Iesu? Mai ta tatou i haapii, ua haere mai Iesu i nia i te fenua no te faatiamâ ia tatou i te hara e te pohe. (Ioane 3:16; Roma 5:12) Ua maiti atoa o Iehova ia Iesu no te riro ei Tahu‘a Rahi e ei Haava. E titauhia ïa ia farii ma te faatura i te hopoia taa ê ta te Atua i horoa ia Iesu. I reira noa o Iehova e farii ai i ta tatou pure.—Ioane 5:22; Hebera 6:20.

E nehenehe oe e pure i te mau taime atoa

10. E titauhia anei ia tuturi ia pure tatou ia Iehova? A faataa na.

10 E titauhia anei ia tuturi no te pure? Aita o Iehova e ani mai ra ia na reira. Te haapii ra te Bibilia e nehenehe tatou e paraparau ia Iehova ma te parahi, ma te tipapa, ma te tuturi e ma te tia. Ia na reira râ tatou ma te faatura. (Paraleipomeno 1, 17:16; Nehemia 8:6; Daniela 6:10; Mareko 11:25) Te mea faufaa roa ’‘e no Iehova, ia paraparau tatou ia ’na ma te aau tae e te faatura. E nehenehe atoa tatou e pure ma te reo puai e i roto ia tatou i te mau vahi atoa e te mau taime atoa. Noa ’tu eita te taata e faaroo mai i ta tatou e parau ra, o Iehova râ, te faaroo mai ra ïa ia pure tatou ia ’na.—Nehemia 2:1-6.

11. E nehenehe tatou e pure no teihea mau mea?

 11 E pure tatou no teihea mau mea? E nehenehe tatou e pure no te mau mea atoa e au i te hinaaro o Iehova. Te na ô ra te Bibilia: “Noa ’tu eaha ta tatou e ani ia au i to ’na hinaaro, e faaroo mai o ’na.” (Ioane 1, 5:14) E nehenehe anei e pure no te tahi mea e haapeapea ra ia tatou? E! Ia pure tatou ia Iehova, e na reira ana‘e mai te huru e te paraparau ra tatou i te hoê hoa piri. E faaite ana‘e ia Iehova i te mau mea atoa e vai ra i roto i to tatou aau e to tatou feruriraa. (Salamo 62:8) E pure tatou ia horoa mai oia i to ’na varua mo‘a no te tauturu mai ia rave i te mea maitai. (Luka 11:13) E nehenehe atoa tatou e ani ia Iehova i te paari no te rave i te faaotiraa maitai e te puai no te faaruru i te fifi. (Iakobo 1:5) E tia atoa ia ani ia Iehova ia faaore i ta tatou mau hara. (Ephesia 1:3, 7) Mea maitai atoa ia pure no vetahi ê, no to tatou fetii e no te mau taeae e tuahine o te amuiraa.—Ohipa 12:5; Kolosa 4:12.

12. Eaha râ te tia ia haafaufaa na mua ia pure tatou?

12 Eaha râ te tia ia haafaufaa na mua ia pure tatou? Ia mana‘o tatou na mua ia Iehova e i to ’na hinaaro. Ma to tatou aau atoa, e tia ia haamauruuru ia Iehova no te mau mea atoa ta ’na i horoa mai. (Paraleipomeno 1, 29:10-13) E na reira tatou no te mea ua haapii Iesu i ta ’na mau pǐpǐ e nafea ia pure i to ’na haereraa mai i nia i te fenua. (A taio i te Mataio 6:9-13.) Ua parau oia e tia ia pure na mua ia mo‘a te i‘oa o te Atua, te auraa ia faaturahia te reira. I muri iho, ua faaite Iesu e tia ia pure ia tae mai te Faatereraa arii a te Atua e ia tupu te hinaaro o Iehova i nia i te fenua taatoa. Ua oti ana‘e te mea faufaa roa i te faahitihia, i reira tatou e pure ai no to tatou mau hinaaro. Ia tuu tatou ia Iehova e to ’na hinaaro i te parahiraa matamua i roto i ta tatou mau pure, te faaite ra tatou eaha te mea faufaa roa ’‘e no tatou.

13. E tia anei ia roa ta tatou pure?

 13 E tia anei ia roa ta tatou pure? Aita te Bibilia e pahono tia ra. Ia au i te tupuraa, e nehenehe tatou e faahiti i te hoê pure roa aore ra poto. E pure poto noa paha tatou hou a tamaa ’i. Area ia haamauruuru aore ra ia faaite tatou i ta tatou e haapeapea ra, e roa rii paha ïa ta tatou pure ia Iehova. (Samuela 1, 1:12, 15) Eita râ tatou e rave mai ia vetahi i te tau o Iesu o tei faaroa i te pure ia hi‘o  atu te taata ia ratou. (Luka 20:46, 47) Eita o Iehova e au i te mau pure mai tera te huru. Te mea faufaa no ’na, ia pure ïa tatou ma te aau tae.

14. Ehia taime e tia ia pure i te Atua? Eaha ta te reira e haapii mai ra no nia ia Iehova?

14 Ehia taime e tia ia pure i te Atua? Te titau manihini mai ra o Iehova ia paraparau tamau ia ’na. Te parau ra te Bibilia e tia ia tatou ia tamau i te pure. (Mataio 26:41; Roma 12:12; Tesalonia 1, 5:17) Ua ineine noa o Iehova i te faaroo mai ia tatou. I te mau mahana atoa, e nehenehe tatou e haamauruuru ia ’na no to ’na here e no te mea e Atua horoa noa oia. E ani atoa tatou i ta ’na aratairaa, to ’na puai e ta ’na tamahanahanaraa. Mai te peu e fana‘oraa taa ê no tatou ia pure ia Iehova, e na reira ana‘e i  te mau taime atoa e hinaaro ai tatou e paraparau ia ’na.

15. No te aha e tia ia parau amene ia oti te pure?

15 No te aha e tia ia parau amene ia oti te pure? Na reira ïa, aore ra oia mau, te auraa o te parau amene. Ma te faahiti i tera parau, te faaite ra tatou ua pure tatou ma te aau tae mau. (Salamo 41:13) Te haapii mai ra te Bibilia mea maitai ia parau amene ma te reo puai aore ra i roto i to tatou aau ia oti te hoê pure faaotihia i mua i te taata atoa. Te faaite ra ïa te reira ua farii tatou i tei parauhia i roto i te pure.—Paraleipomeno 1, 16:36; Korinetia 1, 14:16.

E NAFEA TE ATUA IA PAHONO I TA TATOU MAU PURE?

16. E pahono iho â anei o Iehova i ta tatou mau pure? A faataa na.

16 E pahono iho â anei o Iehova i ta tatou mau pure? E. Te pii ra te Bibilia ia ’na mai “tei faaroo i te pure.” (Salamo 65:2) E faaroo e e pahono o Iehova i te mau pure haavare ore a te mau mirioni taata. Mea rahi ta ’na ravea e faaohipa nei.

17. Mea nafea o Iehova ia faaohipa i ta ’na mau melahi e ta ’na mau tavini i nia i te fenua no te pahono i ta tatou mau pure?

17 Te faaohipa ra o Iehova i ta ’na mau melahi e ta ’na mau tavini i nia i te fenua no te pahono i ta tatou mau pure. (Hebera 1:13, 14) Mea rahi te taata o tei ani i te Atua i te tauturu no te taa i te Bibilia. Aita i maoro i muri a‘e, ua haere atu te tahi Ite no Iehova e farerei ia ratou. Te parau ra te Bibilia te faaite atoa ra te mau melahi i te “parau apî oaoa” ati a‘e i teie nei ao. (A taio i te Apokalupo 14:6.) E rave rahi atoa i rotopu ia tatou o tei pure ia Iehova no te tahi fifi aore ra hinaaro taa maitai. E i muri iho, ua fana‘o tatou i te tauturu a te tahi taeae aore ra tuahine Kerisetiano.—Maseli 12:25; Iakobo 2:16.

E pahono paha o Iehova i ta tatou pure ma te tono mai i te mau taeae Kerisetiano no te tauturu ia tatou

18. E nafea o Iehova ia faaohipa i to ’na varua mo‘a e te Bibilia no te pahono i ta tatou mau pure?

 18 E faaohipa atoa o Iehova i to ’na varua mo‘a no te pahono i ta tatou mau pure. Ia ani tatou ia ’na i te tauturu no te faaruru i te tahi fifi, e faaohipa paha o ’na i to ’na varua mo‘a no te aratai e no te horoa mai i te puai. (Korinetia 2, 4:7) E faaohipa atoa o Iehova i te Bibilia no te pahono i ta tatou pure e no te tauturu mai ia rave i te faaotiraa paari. A taio ai i te Bibilia, e ite paha tatou i te tahi mau irava o te faaitoito mai. E nehenehe atoa o ’na e turai i te hoê ia pahono i te putuputuraa e ia faahiti i te parau o ta tatou i hinaaro mau i tera taime. Aore ra, e faaite mai paha te tahi matahiapo o te amuiraa i te hoê mana‘o no roto mai i te Bibilia o te tauturu mai ia tatou.—Galatia 6:1.

19. No te aha tatou e nehenehe ai e mana‘o aita o Iehova i pahono i ta tatou pure?

19 I te tahi taime e na ô paha tatou, ‘No te aha aita o Iehova i pahono atura i ta ’u pure?’ A haamana‘o na, ua ite o ’na afea e e nafea ia pahono i ta tatou pure. Ua ite o ’na i ta tatou e hinaaro mau. E titauhia paha ia onoono maite i te pure no te haapapu no roto roa mai i to tatou aau ta tatou i parau e te tiaturi mau ra tatou ia ’na. (Luka 11:5-10) I te tahi taime, e pahono o Iehova i ta tatou pure, e ere râ mai ta tatou i mana‘o. E pure paha tatou no te fifi ta tatou e farerei ra, eita râ o ’na e tatara i tera fifi. E horoa ’tu râ o ’na i te puai no te faaoromai.—A taio i te Philipi 4:13.

20. No te aha e tia ia pure pinepine ia Iehova?

20 Auê fana‘oraa faahiahia mau ia pure ia Iehova! E faaroo mai iho â oia ia tatou. (Salamo 145:18) E piri roa ’tu â tatou ia Iehova ia pure pinepine tatou ia ’na ma te aau tae.