Eaha to roto?

Mau faaho'iraa ê

Tapura tumu parau

Ite no Iehova

Tahiti

Eaha ta te Bibilia e haapii mai?

 PENE AHURU MA PAE

E haamori i te Atua mai ta ’na e hinaaro

E haamori i te Atua mai ta ’na e hinaaro

1. O vai te nehenehe e parau mai e nafea ia haamori i te Atua mai ta ’na e hinaaro?

E RAVE rahi haapaoraa o te parau te haapii ra ratou i te parau mau no nia i te Atua. Ahani tera iho â, eita e itehia e rave rahi haapiiraa taa ê no nia i te Atua e no nia i te haamoriraa ta ’na e titau. E nafea tatou ia ite eaha te rave no te haamori i te Atua mai ta ’na e hinaaro? O Iehova ana‘e te nehenehe e pahono mai i tera uiraa, e ere anei?

2. E nafea tatou e ite ai eaha te rave no te haamori i te Atua mai ta ’na e hinaaro?

2 Ua horoa mai o Iehova i te Bibilia ia ite tatou eaha te rave no te haamori ia ’na mai ta ’na e hinaaro. A haapii ïa i te Bibilia, e tauturu o Iehova ia oe ia taa e ia haapao i ta ’na mau haapiiraa. Te hinaaro ra hoi o Iehova i to oe maitai.—Isaia 48:17.

3. Eaha ta te Atua e titau ia rave tatou?

3 Te parau nei vetahi, te farii ra te Atua i te mau haapaoraa atoa, e ere râ tera ta Iesu i haapii. Ua na ô oia: “E ere o te feia atoa e parau mai: ‘E te Fatu, e te Fatu,’ te ô i roto i te Faatereraa arii o te ra‘i, o te taata ana‘e râ o te rave i te hinaaro o to ’u Metua.” E tia ïa ia haapii eaha te hinaaro o te Atua e i muri iho, ia rave i te reira. Mea faufaa roa no te mea ua pii Iesu i te mau taata o te ore e faaroo i te Atua mai te feia “e ofati nei i te ture!”—Mataio 7:21-23.

4. Eaha ta Iesu i parau ia opua tatou e rave i te hinaaro o te Atua?

4 Ua faaara mai Iesu e ere i te mea ohie ia rave i te hinaaro  o te Atua. Ua na ô oia: “A tomo na te uputa pirihao, mea ateatea hoi te uputa e mea aano te e‘a e tae atu ai i te haamouraa, e mea rahi o te na reira i te haere. Mea pirihao râ te uputa e mea ôaôa te e‘a e tae atu ai i te ora, e aita i rahi te taata o te ite atu i taua e‘a ra.” (Mataio 7:13, 14) Te e‘a ôaôa, aore ra te haamoriraa ta te Atua e titau ra, e aratai ïa i te ora mure ore. Te e‘a aano, aore ra te haamoriraa ta te Atua e ore e farii, e aratai i te pohe. Aita râ o Iehova e hinaaro ia pohe te hoê. No reira o ’na e hinaaro ai ia haapii te taata atoa i te parau mau no nia ia ’na.—Petero 2, 3:9.

E HAAMORI I TE ATUA MAI TA ’NA E HINAARO

5. E nafea ia ite o vai ma te haamori ra i te Atua mai ta ’na e ani ra?

5 Ua parau Iesu, e nehenehe tatou e ite o vai ma te haamori ra i te Atua mai ta ’na e ani ra. E taahia te reira ia hi‘opoa tatou i ta ratou e tiaturi e ta ratou e rave ra. Ua na ô Iesu: “I ta ratou mau hotu e ite maitai ai outou ia ratou.” Ua na ô â oia: “E faahotu mai te tumu raau maitai i te maa maitai.” (Mataio 7:16, 17) E ere te auraa e mea tia roa te feia o te haamori i te Atua. E tutava râ te mau tavini o te Atua i te rave i te mea maitai. E hi‘o ana‘e i teie nei eaha te tauturu mai ia ite o vai te haamori ra i te Atua mai ta ’na e ani ra.

6, 7. No te aha te feia o te haamori i te Atua mai ta ’na e ani ra e niu ai i ta ratou haapiiraa i nia i te Bibilia? Eaha ta te hi‘oraa o Iesu e haapii mai?

6 E haapao i ta te Bibilia e haapii ra no te haamori i te Atua. Te na ô ra te Bibilia: “Te mau Papai mo‘a atoa, ua papaihia ïa i raro a‘e i te aratairaa a te varua o te Atua, e mea faufaa no te haapii atu, no te faaite atu i te hapa, no te faaafaro i te mau mea, no te a‘o atu ia au i te parau-tia, ia aravihi roa te taata o te Atua e ia ineine roa no te  mau ohipa maitatai atoa.” (Timoteo 2, 3:16, 17) Teie ta te aposetolo Paulo i papai i te mau Kerisetiano: “I to outou fariiraa i te parau a te Atua ta outou i faaroo ia matou nei, ua farii outou i te reira eiaha mai te parau a te taata, mai te parau iho â râ a te Atua.” (Tesalonia 1, 2:13) No te haamori i te Atua mai ta ’na e hinaaro, e tia ia haapao i ta ’na Parau te Bibilia, eiaha râ i te mana‘o taata, te peu tumu aore ra te tahi atu mea.

7 Pauroa te mau haapiiraa a Iesu, ua niuhia i nia i te Parau a te Atua. (A taio i te Ioane 17:17.) Ua faahiti pinepine oia i te mau Papai. (Mataio 4:4, 7, 10) E pee te mau tavini mau o te Atua i te hi‘oraa o Iesu e e niu ratou i ta ratou mau haapiiraa atoa i nia i te Bibilia.

8. Eaha ta Iesu i haapii mai no te haamori ia Iehova?

8 E tia ia haamori ia Iehova ana‘e. Te na ô ra te Salamo 83:18: “Ia ite te taata atoa e, o Iehova to oe i‘oa, e o oe ana‘e tei Teitei i te fenua atoa nei.” Ua hinaaro Iesu ia ite papu te taata o vai te Atua mau e ua faaite oia ia ratou i te i‘oa o te Atua. (A taio i te Ioane 17:6.) Ua parau Iesu: “O Iehova to oe Atua ta oe e haamori, e ia ’na ana‘e e pûpû ai oe i te hoê taviniraa mo‘a.” (Mataio 4:10) Ei tavini no te Atua, e pee tatou i te hi‘oraa o Iesu. E haamori tatou ia Iehova ana‘e, e faahiti e e faaite tatou i to ’na i‘oa, oia atoa eaha ta ’na e rave no tatou.

9, 10. E nafea ia faaite i to tatou here i te tahi e te tahi?

9 E titauhia ia here mau tatou i te taata. Ua haapii Iesu i ta ’na mau pǐpǐ ia here i te tahi e te tahi. (A taio i te Ioane 13:35.) O te nunaa, te peu tumu e te rahiraa tao‘a anei te mea faufaa? E ere, o to tatou râ here i te tahi e te tahi. Na te reira hoi e tahoê ia tatou ei taeae e ei tuahine. (Kolosa 3:14) Eita ïa tatou e haere i te tama‘i e e haapohe i te taata. Te na ô ra te Bibilia: “I teie e itehia ’i te mau ta marii a te Atua e te mau tamarii a te Diabolo: Te taata aita e rave ra i te parau-tia, e ere ïa o ’na no te Atua, oia atoa te taata aita e here ra i to ’na taeae.” E i muri iho, te na ô faahou ra: “Ia here tatou te tahi i te tahi, eiaha mai ia Kaina, no te varua ino o ’na e ua taparahi pohe i to ’na teina.”—Ioane 1, 3:10-12; 4:20, 21.

10 E faaohipa tatou i to tatou taime, puai e ta tatou mau faufaa no te tauturu e faaitoito i te tahi e te tahi. (Hebera 10:24, 25) “E hamani maitai ana‘e i te taata atoa.”—Galatia 6:10.

11. No te aha e tia ia faaroo ia Iesu?

11 E tiaturi tatou e faaorahia te taata na roto ana‘e ia Iesu Mesia. Te parau ra te Bibilia: “Ia ite atoa outou e aore roa e ora ia vetahi ê, aita ’tu hoi e i‘oa i raro a‘e i teie nei ra‘i i horoahia mai i te taata, e ora ’i tatou.” (Ohipa 4:12) I roto i te pene 5 o teie buka, ua haapii tatou ua tono mai o Iehova ia Iesu no te horoa i to ’na ora ei hoo no te feia auraro. (Mataio 20:28) Ua maiti o Iehova ia Iesu no te faatere i te fenua taatoa ei Arii. No reira te Bibilia e parau ai e tia ia faaroo ia Iesu ia hinaaro tatou e ora e a muri noa ’tu.—A taio i te Ioane 3:36.

12. Eaha te tumu e ore ai tatou e faaô i roto i te ohipa poritita?

12 Eita tatou e faaô i roto i te ohipa poritita. Aita Iesu i faaô ia ’na i roto i te poritita. I te taime a haavahia ’i o ’na, ua parau Iesu i te tia o te Hau Roma o Pilato: “E ere ta ’u Faatereraa arii no teie nei ao.” (A taio i te Ioane 18:36.) Mai ia Iesu, eita tatou e taiva i te Faatereraa arii a te Atua i te ra‘i. Tera te tumu e ore ai tatou e faaô i roto i te ohipa poritita noa ’tu no teihea fenua tatou. Tera râ, te faaue mai ra te Bibilia ia auraro “i te feia mana,” oia hoi te mau faatereraa. (Roma 13:1) E haapao tatou i te mau ture o te fenua i reira tatou e ora ’i. Ia ofati râ te tahi ture  i ta te Atua, e pee tatou i te hi‘oraa o te mau aposetolo o tei parau: “O te Atua ei faatere ta matou e auraro e tia ’i, eiaha te taata.”—Ohipa 5:29; Mareko 12:17.

13. Eaha ta tatou e faaite i te taata no nia i te Faatereraa arii a te Atua?

13 E tiaturi tatou o te Faatereraa arii a te Atua te ravea hoê roa no te faaafaro i te mau fifi na te ao nei. Ua parau Iesu: “E porohia te parau apî oaoa o te Faatereraa arii e ati a‘e te fenua.” (A taio i te Mataio 24:14.) Eita hoê noa ’‘e faatereraa a te taata e nehenehe e rave i ta te Faatereraa arii a te Atua e faatupu no tatou. (Salamo 146:3) Ua haapii mai Iesu ia pure no te Faatereraa arii a te Atua i to ’na parauraa: “Ia tae mai ta oe Faatereraa arii. Ia tupu to oe hinaaro i te fenua nei, mai i te ra‘i atoa na.” (Mataio 6:10) Te faaite mai ra te Bibilia e haamou te Faatereraa arii i te mau faatereraa atoa a te taata e “e vai tera e a muri noa ’tu.”—Daniela 2:44.

14. No oe, o vai te haamori ra i te Atua mai ta ’na e hinaaro?

14 I muri a‘e i te hi‘opoaraa i teie mau mana‘o, a ui ia oe iho, ‘O vai te haapao nei i te Bibilia i roto i ta ratou mau haapiiraa? O vai te faaite ra i te taata i te i‘oa o te Atua? O vai te faaite ra i te here mau i te tahi e te tahi e te tiaturi ra ua tono mai te Atua ia Iesu no te faaora ia tatou? O vai te ore e faaô i roto i te mau ohipa poritita? O vai te poro ra o te Faatereraa arii a te Atua ana‘e te ravea hoê roa no te faaafaro i to tatou mau fifi?’ E ere anei te mau Ite no Iehova?—Isaia 43:10-12.

EAHA TA OE E RAVE?

15. Ia hinaaro tatou ia farii te Atua i ta tatou haamoriraa, eaha te tia ia rave?

15 Eita e navai noa ia tiaturi i te Atua. Te tiaturi atoa ra hoi te mau demoni e te vai mau ra te Atua, aita râ ratou  e faaroo ra ia ’na. (Iakobo 2:19) Ia hinaaro tatou ia farii te Atua i ta tatou haamoriraa, eiaha e tiaturi noa e te vai mau ra oia, e tia atoa ia rave i ta ’na e parau ra ia rave.

16. No te aha e tia ia faaatea ê mai ia tatou i te haapaoraa hape?

16 Ia farii te Atua i ta tatou haamoriraa, e tia ia faaatea ê mai ia tatou i te haapaoraa hape. Ua papai te peropheta Isaia: “E haere outou i rapae mai rotopu mai ia ’na ra; ia mâ outou.” (Isaia 52:11; Korinetia 2, 6:17) No reira, eiaha roa ïa e rave i te tahi noa ’‘e mea no ǒ mai i te haapaoraa hape.

17, 18. O vai “Babulonia rahi”? No te aha mea ru ia haere ê mai oe i rapae?

17 E haapii te haapaoraa hape ia haamori i te Atua, eiaha râ mai ta te Bibilia e parau ra. E piihia te mau haapaoraa hape atoa i roto i te Parau a te Atua i te i‘oa, “Babulonia rahi.” (Apokalupo 17:5) Eaha te tumu? I muri a‘e i te diluvi, ua haamata te mau haapiiraa hape e rave rahi i te oire ra o Babulonia e ua parare roa te reira na te ao atoa nei. I Babulonia, e haamori na te feia no ǒ e rave rahi atua toru tahi. I teie atoa mahana, e rave rahi haapaoraa o te haapii e Toru tahi te Atua. Mea papu maitai râ ta te Bibilia e haapii ra, o Iehova ana‘e te Atua mau, e Iesu, o ta ’na ïa Tamaiti. (Ioane 17:3) E tiaturi atoa na te feia no Babulonia e ora ’tu te tahi tuhaa o te tino ia pohe te taata e e nehenehe te reira e haamauiuihia i roto i te po auahi. Mea hape râ tera tiaturiraa!—A hi‘o i te faataaraa hau 14, 17 e 18 i te pae hopea o te buka.

18 Ua faaite ê na te Atua fatata te mau haapaoraa hape atoa i te haamouhia. (Apokalupo 18:8) Te taa ra anei ia oe no te aha mea ru ia haere ê mai i rapae i te haapaoraa hape? Te hinaaro ra o Iehova ia na reira oioi oe, eiaha e tiai ia maoro roa!—Apokalupo 18:4.

Ma te tavini ia Iehova na muri i to ’na nunaa, e riro oe ei mero no te hoê utuafare na te ao atoa nei

19. Ia maiti oe i te tavini ia Iehova, eaha ta ’na e rave no te aupuru ia oe?

 19 Ia maiti oe i te faarue i te haapaoraa hape e te tavini ia Iehova, eita paha te tahi mau hoa e fetii e taa i ta oe faaotiraa. Peneia‘e, e patoi, e faahaama aore ra e hi‘o ê ratou ia oe. A haamana‘o râ, eita o Iehova e faarue ia oe. E riro oe ei mero no te hoê utuafare na te ao atoa nei o te here mau ra i te tahi e te tahi. Hau atu â, e fana‘o oe i te tiaturiraa e ora e a muri noa ’tu i roto i te ao apî a te Atua. (Mareko 10:28-30) O vai tei ite, e farii paha te tahi hoa aore ra fetii o tei patoi na ia oe i te haapii i te Bibilia i muri a‘e.

20. No te aha mea faufaa ia haamori i te Atua mai ta ’na e hinaaro?

20 Fatata roa te Atua i te faaore roa i te ino atoa e e faatere ta ’na Faatereraa arii i te fenua taatoa. (Petero 2, 3:9, 13) Hope te au i tera taime! E haamori te taata atoa ia Iehova mai ta ’na e hinaaro. Mea faufaa roa ïa ia ohipa e ia haamori oe i te Atua mai ta ’na e hinaaro i teie nei!

No te ite atu â

O VAI TE RAVE NEI I TO IEHOVA HINAARO I TEIE MAHANA?

No te aha Ite no Iehova?

A hi‘o na tumu e toru i rave ai matou i tera i‘oa.

UIRAA A TE TAATA

E faahepo anei te mau Ite no Iehova i te taata ia taui i ta ratou haapaoraa?

E faatauiraa haapaoraa anei te ohipa pororaa a te mau Ite no Iehova? E tamata anei ratou i te faahepo i te taata ia taui i ta ratou haapaoraa?