Eaha to roto?

Mau faaho'iraa ê

Tapura tumu parau

Ite no Iehova

Tahiti

Eaha ta te Bibilia e haapii mai?

 PENE IVA

Ua fatata anei te hopea o teie nei ao?

Ua fatata anei te hopea o teie nei ao?

1. I roto i teihea buka tatou e ite ai eaha te tupu ananahi?

UA MATAITAI a‘ena anei oe i te parau apî e ua na ô, ‘Ua ino roa te ao!’ No te rahi o te mau ati e ohipa ino, ua tae roa vetahi i te parau, ‘ua fatata te hopea o te ao.’ Parau mau anei? E nehenehe anei te taata e ite eaha te tupu ananahi? Eita, o te Atua ra o Iehova ana‘e te nehenehe. I roto i te Bibilia, ua faaite mai oia eaha te tupu no tatou e no te fenua.—Isaia 46:10; Iakobo 4:14.

2, 3. Eaha ta te mau pǐpǐ a Iesu i hinaaro e ite e eaha ta Iesu i pahono atu?

2 Ia taio tatou i ta te Bibilia e parau ra no nia i te hopea o te ao, e ere te fenua te haamouhia, o te mau ohipa iino atoa râ. Ua haapii Iesu e mana mai te Faatereraa arii a te Atua i nia i te fenua. (Luka 4:43) Ua hinaaro ta ’na mau pǐpǐ e ite afea te Faatereraa arii a te Atua e tae mai ai. Ua ani ïa ratou ia Iesu: “Afea teie mau mea e tupu ai, e eaha te tapao o te tau o to oe ho‘iraa mai e to te anotau hopea o te faanahoraa o te ao nei?” (Mataio 24:3) Aita Iesu i horoa ia ratou i te taio mahana, ua faaite atu râ eaha te itehia hou te hopea o teie nei ao. E tera mau iho â te tupu ra i teie mahana.

3 I roto i teie pene, e hi‘opoa tatou eaha te mau haapapuraa e te ora ra tatou i te tau hopea o te ao. Na mua râ, e titauhia ia ite ua tupu te tahi tama‘i i te ra‘i. I reira tatou e taa ’i no te aha ua rahi roa te ino i nia i te fenua.

 TE TAHI TAMA‘I I TUPU I NIA I TE RA‘I

4, 5. (a) Eaha tei tupu i te ra‘i tau taime i muri a‘e Iesu i riro ai ei Arii? (b) Ia au i te Apokalupo 12:12, eaha te itehia i nia i te fenua i te mea ua hurihia mai Satani i raro nei?

4 I te pene 8, ua haapii tatou ua riro Iesu ei Arii i te ra‘i i 1914. (Daniela 7:13, 14) Te faatia ra te buka Apokalupo: “Tupu ihora te tama‘i i nia i te ra‘i: aro atura Mikaela [o Iesu ïa] e ta ’na mau melahi i te teni [o Satani], aro atoa maira te teni e ta ’na mau melahi.” * Ua pau râ o Satani e ta ’na mau demoni e ua hurihia mai ratou i nia i te fenua. A feruri na i te oaoa iti rahi o te mau melahi i te ra‘i! Eaha râ te huru no te feia e ora ra i nia i te fenua? Te parau ra te Bibilia, e ati rahi te itehia. Eaha te tumu? E riri rahi to te Diabolo, “ua ite hoi o ’na e e taime poto to ’na e toe ra.”—Apokalupo 12:7, 9, 12.

5 Te tuu ra te Diabolo i te hopea no te faatupu i te mau ati i nia i te fenua. E riri rahi to ’na, ua ite hoi e taime poto te toe ra hou te Atua a tapea ’i i ta ’na mau ohipa atoa i nia i te fenua. E hi‘o ana‘e eaha ta Iesu i parau no nia i te tupu i te mau mahana hopea.—A hi‘o i te faataaraa hau 24 i te pae hopea o te buka.

TE MAU MAHANA HOPEA

6, 7. Te tupu ra anei ta Iesu i parau no nia i te tama‘i e te o‘e?

6 Te tama‘i. Ua na ô Iesu: “E aro hoi te tahi nunaa i te tahi atu nunaa e te tahi faatereraa i te tahi atu faatereraa.” (Mataio 24:7) Mea rahi a‘e te taata o tei pohe no te tama‘i i to tatou tau ia faaauhia i na mua ’‘e.  Te faaite ra te tahi pu maimiraa no nia i te tupuraa na te ao, mai te matahiti 1 e tae mai i 1914, 30 mirioni tei pohe no te tama‘i. Mai 1914 noa e tae mai i 2000, ua taiohia ïa 100 mirioni. Ua tataitoru te numera o tei pohe no te tama‘i. A feruri na ïa i tera rahiraa mirioni taata tei mauiui mau e tei oto no te tama‘i!

7 Te pohe poia. Ua parau Iesu: “E tupu te o‘e.” (Mataio 24:7) Noa ’tu ua rahi a‘e te maa i na mua ’‘e, e rave rahi â o te pohe poia nei. Eaha te tumu? Aita ta ratou moni e navai no te hoo mai i te maa aore ra i te fenua no te tanu i te reira. Hau atu i te hoê miria taata, aita ta ratou hoê a‘e tara Marite (fatata 109 F CFP) i te mahana hoê. Ia au i te Taatiraa no te ea na te ao, ehia mirioni tamarii o te pohe i te mau matahiti atoa no te mea aita e navai ra ta ratou maa.

8, 9. Na te aha e faaite ra ua tupu ta Iesu i tohu no nia i te aueueraa fenua e te ma‘i?

8 Te mau aueueraa fenua. Ua tohu Iesu: “E tupu te aueueraa fenua rahi.” (Luka 21:11) E rave rahi aueueraa fenua puai mau o  te tiaihia nei i te mau matahiti atoa. Mai te matahiti 1900 mai, hau atu i te piti mirioni tei pohe no te aueueraa fenua. Noa ’tu te vai ra te mau ravea apî o te tauturu ia ite oioi e tupu te aueueraa fenua, e rave rahi noa â o te pohe nei no te reira.

9 Te ma‘i. Ua faaite Iesu e tupu “te ma‘i pee.” E parare oioi te mau ma‘i atâta e e rave rahi te pohe. (Luka 21:11) Noa ’tu ua itehia i te mau taote e nafea ia rapaau e rave rahi ma‘i, te vai noa ra te tahi aore roa e rapaauraa. I te mau matahiti atoa, ehia mirioni taata o te pohe no te mau ma‘i mai te tutoo e te vai ra ’tu â. I na 40 matahiti i mairi, ua itehia i te mau taote 30 ma‘i apî, e te vai ra te tahi mau ma‘i aita e rapaauraa.

TE HURU O TE TAATA I TE MAU MAHANA HOPEA

10. A faataa na mea nafea te Timoteo 2, 3:1-5 e tupu ai i teie mahana.

10 Te na ô ra te Bibilia i roto i te Timoteo 2, 3:1-5: “Ia tae i te mau mahana hopea, e tau ino mau ïa e te fifi ia faaruru.” Ua faaite te aposetolo Paulo mai te aha te  huru o te rahiraa i te mau mahana hopea. Ua parau oia, e riro te taata

  • i te haapao noa ia ratou iho

  • i te nounou i te moni

  • i te faaroo ore i te metua

  • i te taiva

  • i te au ore i to ratou utuafare

  • i te haavî ore ia ratou iho

  • i te iria e te hamani ino i te taata

  • i te au i te mau mea navenave eiaha râ i te Atua

  • i te faahua here i te Atua, aita râ e farii ra i te auraro ia ’na

11. Ia au i te Salamo 92:7, eaha te tupu no te feia iino?

11 Mai tera anei te huru o te rahiraa i teie mahana? E ere i ǒ oe ana‘e, mai tera atoa na te ao nei. Fatata râ te Atua i te rave i te tahi ohipa. Teie ta ’na i fafau: “Ia oteo te paieti ore mai te raau rii ra, e ia ruperupe atoa te feia rave parau ino ra; i ruperupe ïa ia tâpû faarue-roa-hia [aore ra haamou-roa-hia]!”—Salamo 92:7.

 E TUPU TE TAHI MAU OHIPA MAITATAI I TE MAU MAHANA HOPEA

12, 13. Eaha ta Iehova i haapii mai i te mau mahana hopea?

12 Aita noa te Bibilia i tohu e itehia te oto e te mauiui rahi i te mau mahana hopea. Ua faaite atoa râ, e tupu te tahi mau ohipa maitatai.

“E porohia te parau apî oaoa o te Faatereraa arii e ati a‘e te fenua.”—Mataio 24:14

13 Te ite papu no nia i te Bibilia. Ua papai atoa te peropheta Daniela no nia i te mau mahana hopea. Ua na ô oia: “E tupu atura te ite i te rahiraa.” (Daniela 12:4) Maoti te tauturu a te Atua, e taa maitai atu â to ’na nunaa i te Bibilia. Ua haamata Iehova i te na reira mai 1914 mai. Ua haapii mai oia i te faufaaraa o to ’na i‘oa e eaha ta ’na opuaraa no te fenua. Ua faataa papu atoa mai no nia i te hoo, i te tupu ia pohe te taata e te tia-faahou-raa. Ua taa ia tatou, o te Faatereraa arii a te Atua ana‘e te ravea no te faaafaro i te mau fifi atoa. Ua haapii atoa tatou e nafea ia ite i te oaoa mau e eaha te rave ia mauruuru mai te Atua ia tatou. E tapea noa anei te mau tavini a te Atua i te reira na ratou? Na te tahi atu parau tohu e pahono mai.—A hi‘o i te faataaraa hau 2125 i te pae hopea o te buka.

14. Te porohia ra te parau apî oaoa o te Faatereraa arii i roto ehia fenua? O vai te poro ra i te reira?

14 Te ohipa pororaa na te ao nei. I to ’na faahitiraa i te mau mahana hopea, ua na ô atoa Iesu: “E porohia te parau apî oaoa o te Faatereraa arii e ati a‘e te fenua ia ite te mau nunaa atoa.” (Mataio 24:3, 14) Te porohia ra te parau apî oaoa o te Faatereraa arii i roto hau atu i te 230 fenua na roto hau atu 700 reo. Na te ao atoa nei, te faaite ra te mau Ite no Iehova “no roto mai i te mau nunaa e opu . . . atoa” eaha te Faatereraa arii  e eaha ta ’na e rave no tatou. (Apokalupo 7:9) Te mea faahiahia, e na reira ratou ma te tamoni ore e noa ’tu e hae e e hamani ino te taata ia ratou. Mai ta Iesu i tohu, e tupu iho â te ohipa pororaa e eita e nehenehe e tapea i te reira!—Luka 21:17.

EAHA TA OE E RAVE?

15. (a) Te tiaturi ra anei oe e te ora ra tatou i te mau mahana hopea e eaha te tumu? (b) Eaha te tupu no te feia o te ore e auraro ia Iehova? E no te feia o te auraro ia ’na?

15 Te tiaturi ra anei oe e te ora ra tatou i te mau mahana hopea? E rave rahi parau tohu Bibilia o te haapapu ra i te reira. Fatata roa te taime e parau ai o Iehova, ua oti te ohipa pororaa o te parau apî oaoa. E i reira ïa “te hopea” e tae mai ai. (Mataio 24:14) Eaha “te hopea” o te faahitihia ra? O Aramagedo, te taime e faaore ai te Atua i te ino atoa. E faaohipa o Iehova ia Iesu e ta ’na mau melahi puai no te haamou i te feia atoa o te ore e auraro ia ’na e i ta ’na Tamaiti. (Tesalonia 2, 1:6-9) I muri iho, eita Satani e ta ’na mau demoni e haavare faahou i te taata. Eaha te haamaitairaa a te feia o te auraro i te Atua e te farii i ta ’na Faatereraa arii? E ite ratou i te tupuraa o te mau parau fafau atoa a te Atua.—Apokalupo 20:1-3; 21:3-5.

16. I te mea fatata roa te hopea, eaha te tia ia oe ia rave?

16 Fatata te hopea o teie nei ao faaterehia e Satani. Mea faufaa roa ïa ia uiui, ‘Eaha te tia ia ’u ia rave?’ Te hinaaro ra o Iehova ia haapii tamau oe i te Bibilia. A haapao maite ïa i te reira, e ere i te ohipa hauti. (Ioane 17:3) E putuputuraa ta te mau Ite no Iehova i te mau hebedoma atoa no te tauturu i te taata ia taa i te Bibilia. A tutava i te haere tamau i tera mau putuputuraa.  (A taio i te Hebera 10:24, 25.) Ia taa ia oe e titauhia ia rave i te tahi mau tauiraa, a na reira. E piri roa ’tu â ïa oe ia Iehova.—Iakobo 4:8.

17. No te aha e hitimahuta te rahiraa ia tae mai te hopea?

17 Ua faataa te aposetolo Paulo, e tae mai te haamouraa o te feia iino “mai te eiâ ra i te po.” E tupu ïa te reira i te taime mana‘o-ore-hia e te rahiraa. (Tesalonia 1, 5:2) Ua tohu Iesu, e rave rahi o te ore e tâu‘a i te haapapuraa e te ora ra tatou i te mau mahana hopea. Ua na ô oia: “E riro hoi te tau o te ho‘iraa mai o te Tamaiti a te taata nei [aore ra te mau mahana hopea] mai te tau o Noa ra. I te reira hoi tau hou te diluvi, te tamaa ra te taata e te inu ra, te faaipoipo ra te tane, te horoahia ra te vahine ia faaipoipo e tae roa i te mahana i tomo ai Noa i roto i te araka, e aita ratou i tâu‘a e tae noa mai ai te diluvi e mou atura ratou paatoa.”—Mataio 24:37-39.

18. Eaha ta Iesu i faaara mai?

18 Ua faaara mai Iesu eiaha e vaiiho “i te rahi o te tamaa, i te inu hua, i te haapeapearaa o te oraraa” ia haafifi ia tatou. Ua parau oia e tae mai te hopea “mai te hoê marei . . . i nia i te taatoaraa o te taata i te fenua nei.” I muri iho, ua na ô â: “A vai ara ïa e a tamau i te pure [aore ra a pure ma te aau tae mau] ia nehenehe outou e ora ’tu i teie mau mea atoa o te tupu iho â, a tia ’tu ai i mua i te Tamaiti a te taata nei.” (Luka 21:34-36) No te aha mea faufaa ia haapao i te faaararaa a Iesu? No te mea fatata roa te ao ino a Satani i te haamouhia. O te feia ana‘e o ta Iehova e ta Iesu e mauruuru te ora ’tu i te hopea e te fana‘o i te ora mure ore i roto i te ao apî!—Ioane 3:16; Petero 2, 3:13.

^ par. 4 O Mikaela te tahi atu i‘oa o Iesu Mesia. No te ite atu â, a hi‘o i te faataaraa hau 23 i te pae hopea o te buka.

No te ite atu â

TE PARE TIAIRAA

“Te hopea”: Eaha te auraa mau?

Ua ite anei oe e parau apî oaoa ta te Bibilia e faaite ra no nia i te “hopea”?