Eaha to roto?

Mau faaho'iraa ê

Tapura tumu parau

Ite no Iehova

Tahiti

Eaha ta te Bibilia e haapii mai?

 PENE AHURU MA PITI

Eaha te rave no te riro ei hoa no te Atua?

Eaha te rave no te riro ei hoa no te Atua?

1, 2. O vai ma te tahi o te mau hoa o Iehova?

O VAI ta oe e hinaaro ei hoa? E ere anei te hoê taata ta oe i au e mea afaro maitai orua. E taata maitai e te faahiahia ra oe i te mau huru maitatai ta ’na e faaite ra.

2 E maiti o Iehova i te tahi mau taata no te riro ei hoa no ’na. O Aberahama te tahi o to ’na mau hoa. (Isaia 41:8; Iakobo 2:23) Mea here atoa na ’na ia Davida. Ua parau o Iehova, e taata Davida o tei au i to ’na aau. (Ohipa 13:22) Na reira atoa te peropheta Daniela, ua “here-rahi-hia” oia e Iehova.—Daniela 9:23.

3. No te aha Aberahama, Davida e Daniela i riro mai ai ei hoa no Iehova?

3 No te aha Aberahama, Davida e Daniela i riro mai ai ei hoa no Iehova? Ua na ô Iehova ia Aberahama: “O oe i faaroo mai i tau reo nei.” (Genese 22:18) E riro o Iehova ei hoa no te feia o te auraro ia ’na ma te haehaa. E nehenehe atoa te hoê pǔpǔ taata, aore ra nunaa, e faatupu i te auhoaraa e o ’na. Na roto i teie mau parau, ua faataa o Iehova i te nunaa Iseraela: “E faaroo mai outou i to ’u nei reo; e riro ïa vau ei Atua no outou i reira, e riro hoi outou ei taata no ’u.” (Ieremia 7:23) E titau-atoa-hia ia oe ia auraro ia Iehova ia hinaaro mau oe e riro ei hoa no ’na.

E PARURU O IEHOVA I TO ’NA MAU HOA

4, 5. Eaha ta Iehova e rave no te paruru i to ’na mau hoa?

4 Te parau ra te Bibilia e te hi‘o mai ra te mata o Iehova  no te “horoa . . . i te etaeta i te feia i tia te aau ia ’na.” (Paraleipomeno 2, 16:9) I roto i te Salamo 32:8, te fafau ra oia i te taata o tei faatupu i te auhoaraa e o ’na: “E haapii atu vau ia oe, e faaite au ia oe i ta oe e‘a ia haere ra; e a‘o atu vau ia oe, e ei nia ia oe tau mata vai ai.”

5 Te hinaaro ra o Iehova e paruru ia tatou. (A taio i te Salamo 55:22.) Ua riro tatou ei hoa no ’na e te tavini atoa ra ia ’na ma te aau atoa. Eita tatou e taiva ia Iehova noa ’tu tei roto tatou i te tupuraa fifi mau. Hoê â tiaturiraa to tatou e to te papai Salamo. Teie hoi ta ’na i parau no Iehova: “Tei tau rima atau oia, e ore au e aueue.” (Salamo 16:8; 63:8) Te imi ra râ te tahi enemi puai i te ravea ia faaea tatou i te riro ei hoa no te Atua. Eaha ïa ta Satani e rave ia naea ta ’na fa?

TE PARIRAA A SATANI

6. Eaha ta Satani pariraa i te taata atoa?

6 I roto i te pene 11, ua haapii tatou ua patoi Satani ia Iehova. Ua pari atoa e Atua haavare o ’na e te tia ore no te mea aita o Iehova i horoa ia Adamu e Eva i te tiaraa ia maiti eaha te mea maitai e eaha te mea ino no raua iho. Te haapii mai ra te buka Ioba, e pariraa atoa ta Satani i te mau hoa o te Atua. Te na ô ra te Diabolo, e tavini te mau hoa o te Atua ia ’na no te mea noa e maitai ta ’na e horoa ’tu, e ere râ no to ratou here ia ’na. Ua parau atoa Satani, e nehenehe ta ’na e faaatea ê i te mau taata atoa i te Atua. E hi‘o ana‘e eaha te haapii mai i te hi‘oraa o Ioba e eaha ta Iehova i rave no te paruru ia ’na.

7, 8. (a) Eaha to Iehova mana‘o ia Ioba? (b) Eaha ta Satani i parau no Ioba?

7 O vai o Ioba? E taata maitai oia o tei ora a 3 600 matahiti i teie nei. Ua parau o Iehova aita ’tu taata mai ia ’na i nia i te fenua i tera tau. Mea faatura roa na Ioba i te  Atua e mea au ore atoa na ’na i te mea ino. (Ioba 1:8) Ua riro mau Ioba ei hoa no Iehova.

8 Ua pari Satani e ere no to ’na here i tavini ai Ioba i te Atua. Ua na ô Satani ia Iehova: “E ere anei tei auahia [aore ra paruruhia] oia e oe, e to ’na atoa ra fare, e ta ’na atoa ra mau tao‘a atoa e ati noa ’‘e? ua haamaitaihia e oe ta ’na ohipa i rave, e ua rahi ta ’na tao‘a i te fenua nei. Nanao noa ’tura râ i to rima a rave atu ai i ta ’na e ia pau roa; e e faaino oia ia oe i mua i to aro i reira.”—Ioba 1:10, 11.

9. Eaha ta Iehova i vaiiho ia Satani ia rave?

9 Ua pari Satani ua tavini Ioba ia Iehova no te mau haamaitairaa ta ’na e horoa ’tu. E e nehenehe atoa ta ’na e turai ia Ioba ia faaea i te tavini i te Atua. No Iehova râ, mea hape roa te reira. Ua vaiiho atura Iehova ia Satani ia tamata ia Ioba no te haapapu ua riro mau anei Ioba ei hoa no ’na no to ’na here ia ’Na.

UA TAMATA SATANI IA IOBA

10. Eaha ta Satani i rave no te tamata ia Ioba e eaha te huru o Ioba?

10 No te tamata ia Ioba, ua faaere na mua Satani ia ’na i ta ’na mau faufaa atoa. Ua haapohe i ta ’na mau animara atoa e te rahiraa o ta ’na mau tavini. I te pae hopea, ua faatupu Satani i te hoê vero e pohe atura na ahuru tamarii a Ioba. Aita râ te hoa o Iehova i taiva ia ’Na. “Aore Ioba i harahia i taua mau mea atoa nei, e aore hoi i faahapa i te Atua.”—Ioba 1:12-19, 22.

Ua haamaitai o Iehova i to ’na hoa haapao maitai o Ioba

11. (a) Eaha ’tu â ta Satani i rave i nia ia Ioba? (b) Eaha te huru o Ioba?

11 Aita Satani i tuu, ua patoi â oia i te Atua ma te parau: “E nanao noa ’tu na râ i to rima a rave atu ai i te ivi e te i‘o, e e faaino atu oia ia oe i mua i to aro i reira.” Tairi a‘era Satani ia Ioba i te hoê ma‘i mauiui mau. (Ioba 2:5,  7) I roto atoa i tera tupuraa, aita Ioba i taiva ia Iehova. Ua na ô râ: “E ore â vau e faarue i te parau mau na ’u ra e pohe noa ’tu vau.”—Ioba 27:5.

12. Mea nafea Ioba i te haapapuraa ua haavare Satani?

12 Aita Ioba i ite no nia i te mau pariraa a Satani e eaha te tumu o ’na i mauiui ai. Ua mana‘o oia o Iehova to muri mai i to ’na mau ati. (Ioba 6:4; 16:11-14) Noa ’tu râ, ua tapea Ioba i to ’na haapao maitai i te Atua. Aita Ioba i tavini ia Iehova no te mau haamaitairaa ta ’na e horoa ’tu. E hoa mau oia no te Atua no to ’na here ia ’Na. Mea hape te mau pariraa atoa a Satani!

13. Eaha te mau haamaitairaa ta Ioba i fana‘o no te mea aita o ’na i taiva i te Atua?

13 Noa ’tu aita Ioba i ite i tei tupu i te ra‘i, aita roa oia i taiva i te Atua, ua haapapu râ mea ino o Satani. Ua haamaitai o Iehova i to ’na hoa here o tei ore i taiva ia ’na.—Ioba 42:12-17.

TE PARI ATOA RA SATANI IA OE

14, 15. Eaha ta Satani pariraa i te mau taata atoa?

14 Mea rahi te haapiiraa e huti mai i tei tupu i nia ia Ioba. I teie mahana, te pari atoa ra o Satani te tavini ra tatou ia Iehova no te mau haamaitairaa ta ’na e horoa mai. I roto i te Ioba 2:4, ua pari â Satani: “E horoa noa hoi te taata i tana mau mea’toa ra ei hoo no tona iho ora.” (Te Bibilia Mo’a V.C.J.S., 1976) E ere noa ïa o Ioba ta Satani e pari ra, o te mau taata atoa râ. Tae roa mai i teie mahana, te faaino noa ra Satani ia Iehova e te pari noa ra i ta ’na mau tavini. Te na ô ra hoi te Maseli 27:11: “E tau tamaiti, ia paari hoi oe, ia oaoa tau aau, ia tia ia ’u ia patoi atu i tei faaino mai ia ’u nei.”

15 E nehenehe oe e maiti i te auraro ia Iehova e te riro ei hoa haapao maitai no ’na. Ma te na reira, e haapapu  oe o Satani tei haavare. Noa ’tu e titauhia ia rave i te mau tauiraa rahi no te riro ei hoa no te Atua, tera te faaotiraa maitai roa ’‘e! E ere te reira i te ohipa hauti. Te pari ra Satani e taiva oe i te Atua i roto i te fifi. E tamata o ’na i te haavare mai ia taiva tatou i te Atua. Eaha ta ’na mau raveraa?

16. (a) Eaha ta Satani mau raveraa ia faaea tatou i te riro ei hoa no te Atua? (b) Eaha paha ta te Diabolo e faaohipa ia faaoti oe i te faaea i te tavini ia Iehova?

16 Ua rau te raveraa a Satani ia faaea tatou i te riro ei hoa no te Atua. E tairi oia “mai te liona uuru e imi nei i te amu i te hoê taata.” (Petero 1, 5:8) Eiaha e maere ia tamata te mau hoa, fetii e te tahi atu i te turai ia oe ia faaea i te haapii i te Bibilia e te rave i te mea maitai. E taa ia oe e te tamatahia ra oe. * (Ioane 15:19, 20) E faariro atoa Satani ia ’na “ei melahi no te maramarama.” E turai ïa o ’na ia tatou ia faaroo ore ia Iehova. (Korinetia 2, 11:14) Te tahi atu raveraa a Satani, e turai mai o ’na ia faahapa ia tatou iho a mana‘o atu ai eita e tia ia tatou ia tavini i te Atua.—Maseli 24:10.

A HAAPAO I TE MAU FAAUERAA A IEHOVA

17. Na te aha e turai ia tatou ia auraro ia Iehova?

17 Ma te auraro ia Iehova, e haapapu tatou o Satani tei haavare. Eaha te tauturu mai ia riro ei taata auraro? Te na ô ra te Bibilia: “E hinaaro [aore ra here] atu oe i to Atua ia Iehova ma to aau atoa, e ma to varua atoa, e ma to puai atoa.” (Deuteronomi 6:5) Na te here e turai ia tatou ia auraro ia Iehova. A rahi noa ’i to tatou here ia  Iehova, e hinaaro tatou e rave i te mau mea atoa ta ’na e ani mai ra. Ua papai te aposetolo Ioane: “Teie hoi te here i te Atua, ia haapao tatou i ta ’na mau faaueraa. E ere ta ’na mau faaueraa i te mea teimaha.”—Ioane 1, 5:3.

18, 19. (a) Eaha te tahi mau mea ta Iehova i parau e mea ino? (b) Eaha te haapapu ra eita roa o Iehova e ani mai ia rave i te ore e maraa ia tatou?

18 Eaha râ te tahi mau mea ta Iehova i parau e mea ino? Te vai ra te tahi mau hi‘oraa i roto i te tumu parau tarenihia “ Eiaha e au i ta Iehova e au ore.” I te haamataraa, e na ô paha oe, ‘E ere hoi teie mau mea i te mea ino roa!’ Ia taio e ia feruri maite râ oe i nia i te mau irava Bibilia, e taa ia oe mea maitai a‘e ia haapao i ta Iehova mau ture. E ite atoa paha oe, e titauhia ia rave oe i te tahi mau tauiraa. A na reira noa ’tu e ere i te mea ohie i te tahi taime. E fana‘o hoi oe i te hau e te oaoa ia riro ei hoa haapao  maitai no te Atua. (Isaia 48:17, 18) Eaha te haapapu ra e nehenehe tatou e rave i tera mau tauiraa?

19 Eita roa o Iehova e ani mai ia rave i te ore e maraa ia tatou. (Deuteronomi 30:11-14) E hoa papu o Iehova e o ’na te mea ite a‘e i to tatou huru ia tatou iho. Ua ite hoi i to tatou mau huru maitatai e to tatou mau vahi paruparu. (Salamo 103:14) Ua faaitoito mai te aposetolo Paulo na roto i teie mau parau: “Eita râ te Atua haapao maitai e vaiiho ia tamatahia outou hau a‘e i ta outou e nehenehe e faaruru. Tera râ, a tamata-noa-hia ’i outou, te faaineine atoa ra oia i te faaoraraa ia nehenehe outou ia faaoromai maite.” (Korinetia 1, 10:13) E horoa mai iho â o Iehova i te puai no te rave i te mea maitai. No ǒ mai ia ’na “te puai o te hau ê i to te taata nei” o te tauturu mai ia faaoromai i te fifi. (Korinetia 2, 4:7) Ua ite roa Paulo i te rima o Iehova i roto i te fifi, no reira o ’na i na ô ai: “E puai  to ’u ia faaruru i te mau mea atoa maoti tei horoa mai i te puai.”—Philipi 4:13.

A HAAPII I TE HINAARO I TE MAU MEA O TA TE ATUA E AU

20. Eaha te mau huru maitatai ta oe e tia ia faaite e eaha te tumu?

20 No te riro ei hoa no Iehova, e tia ia haapae i te rave i ta Iehova i parau e mea ino. Eita râ e navai noa i reira. (Roma 12:9) E hinaaro atoa te mau hoa o te Atua i te mau mea o ta ’na e au. Ua faaitehia te reira i roto i te Salamo 15:1-5. (A taio.) E pee atoa te mau hoa o Iehova i to ’na hi‘oraa e e faaite ratou i te mau huru maitatai mai “te here ïa, te oaoa, te hau, te faaoromai, te hamani maitai, te maitai, te faaroo, te mǎrû, te haavîraa ia ’na iho.”—Galatia 5:22, 23.

21. Eaha te tauturu atu ia faaite i te mau huru maitatai o ta te Atua e au?

21 Eaha te tauturu atu ia faaite i tera mau huru maitatai nehenehe mau? E titauhia ia haapii eaha te mau mea ta Iehova e au ma te tamau i te taio e te haapii i te Bibilia. (Isaia 2:3) Ma te na reira, e rahi mai to oe here ia Iehova e e hinaaro oe e auraro ia ’na.

22. Eaha te faahopearaa ia auraro oe ia Iehova?

22 E nehenehe e faahoho‘a i te mau tauiraa ta oe e rave i te tatararaa i te ahu tahito no te oomo mai i te mea apî. Te parau ra te Bibilia, e titauhia ia “tatara i te huru taata tahito” e ia ahu mai i “te huru taata apî.” (Kolosa 3:9, 10) E ere paha i te mea ohie, ma te rave râ i tera mau tauiraa e ma te auraro ia Iehova, e haamaitairaa te tiai mai ra. (Salamo 19:11) A faaoti ïa i te auraro ia Iehova e te haapapu o Satani tei haavare. A tavini ia Iehova no to oe here ia ’na, eiaha no te mau haamaitairaa ta ’na e horoa mai a muri a‘e. I reira oe e riro ai ei hoa mau no te Atua!

^ par. 16 E ere te auraa, te faatere ra Satani i te feia o te turai ia oe ia faaea i te haapii i te Bibilia. O Satani râ “te atua hoi o teie faanahoraa o te ao nei” e “te vai nei râ to te ao atoa i raro a‘e i [to ’na] mana.” E ere ïa i te mea maere ia turai atu vetahi taata ia oe ia faaea i te tavini ia Iehova—Korinetia 2, 4:4; Ioane 1, 5:19.

No te ite atu â

E haafatata ’tu ia Iehova

E nehenehe mau anei ta outou e “haafatata ’tu i te Atua”?

Te horoa maira te Atua ra o Iehova, o tei poiete i te ra‘i e te fenua, i te hoê titau-manihini-raa e te hoê parau fafau.