Eaha to roto?

Mau faaho'iraa ê

Tapura tumu parau

Ite no Iehova

Tahiti

Eaha ta te Bibilia e haapii mai?

 PENE AHURU MA TORU

A haafaufaa i te ora

A haafaufaa i te ora

1. Na vai i horoa mai i te ora?

O IEHOVA te “Atua ora.” (Ieremia 10:10) O ’na to tatou Atua Poiete e na ’na i horoa mai i te ora. Te parau ra te Bibilia: “Na oe i poiete i te mau mea atoa e no to hinaaro i vai ai e i poietehia ’i te reira.” (Apokalupo 4:11) Ua hinaaro o Iehova e horoa i te ora i te taata. E ô faufaa roa te ora no ǒ mai ia ’na.—A taio i te Salamo 36:9.

2. Eaha te rave ia oaoa tatou?

2 Te horoa mai ra Iehova i te mau mea e hinaarohia e tatou no te ora mai te maa e te pape. (Ohipa 17:28) E ere râ tera ana‘e, te hinaaro atoa ra o ’na ia oaoa tatou. (Ohipa 14:15-17) E titauhia râ ia auraro i ta te Atua mau ture.Isaia 48:17, 18.

TO TE ATUA MANA‘O NO NIA I TE ORA

3. Eaha ta Iehova i rave i to Kaina taparahi-pohe-raa ia Abela?

3 Te haapii ra te Bibilia ia tatou, mea faufaa roa no Iehova to tatou ora e to vetahi ê. Ei hi‘oraa, ua riri roa Kaina, te tamaiti a Adamu raua Eva, i to ’na taeae apî ia Abela. Ua faaara Iehova ia Kaina ia haavî i to ’na riri. Aita râ oia i faaroo, no to ’na riri rahi “tei nia maira Kaina i tana teina ia Abela, taparahi pohe roa ihora.” (Genese 4:3-8) Ua faautua Iehova ia Kaina no ta ’na i rave i nia ia Abela. (Genese 4:9-11) Mea atâta roa te riri e te ino, e nehenehe te reira e turai ia riro ei taparahi taata. Eita tei na reira e fana‘o i te ora mure ore. (A taio i te Ioane 1, 3:15.) Ia auhia tatou e Iehova, e titauhia ia haapii i te here i te taata atoa.—Ioane 1, 3:11, 12.

4. Eaha hoê o na ture ahuru ta te Atua i horoa o te haapii mai e ô faufaa mau te ora?

 4 Tau tausani matahiti i muri a‘e, ua faaite Iehova e mea faufaa te ora no ’na i to ’na horoaraa i na ture ahuru ia Mose. Te na ô ra hoê o teie ture: “Eiaha roa oe e taparahi.” (Deuteronomi 5:17) Ia taparahi pohe te hoê taata i te tahi atu ma te opuahia, e haapohehia o ’na.

5. Eaha te mana‘o o te Atua no nia i te haamaruaraa tamarii?

5 Eaha te mana‘o o te Atua no nia i te haamaruaraa tamarii? Mea faufaa roa no Iehova te ora o te hoê pêpe. I roto i te ture ta ’na i horoa ia Iseraela, ua parau Iehova ia pepe noa ’tu te hoê vahine hapû e ia pohe te tamarii i roto i to ’na opu, e haapohehia te taata o tei rave i te reira. (A taio i te Exodo 21:22, 23; Salamo 127:3.) Te auraa, mea ino roa te haamaruaraa tamarii.—A hi‘o i te faataaraa hau 28 i te pae hopea o te buka.

6, 7. Eaha te rave no te faaite ia Iehova e mea faufaa te ora no tatou?

6 Eaha te rave no te faaite ia Iehova e mea faufaa to tatou iho ora e to vetahi ê? Eita tatou e rave i te mau mea o te nehenehe e haafifi i to tatou ora e to vetahi ê. Eita tatou e puhipuhi i te avaava aore ra e rave i te raau taero, e tuino te reira i te tino e e pohe paha tatou.

7 Na te Atua i hamani i to tatou tino e na ’na i horoa mai i te ora, e tia ia haapao i ta ’na e faaue mai ia rave. E titauhia ïa ia aupuru maite i to tatou tino. Aita ana‘e, e riro tatou ei taata viivii i te aro o te Atua. (Roma 6:19; 12:1; Korinetia 2, 7:1) Eita o Iehova e farii i ta tatou haamoriraa eita ana‘e tatou e haafaufaa i te ora ta ’na i horoa mai. Noa ’tu e ere i te mea ohie ia faaea i te rave i te mau peu iino, ia tutava tatou i te haafaufaa i te ora, e tauturu mai Iehova.

8. Eaha te rave no te haapao maitai i to tatou iho ora e to vetahi ê?

 8 Ua haapii tatou e ô faufaa mau te ora. Te titau mai ra ïa o Iehova ia haapao maitai i to tatou iho ora e to vetahi ê. Peneia‘e, na roto i ta tatou huru faahororaa i te pereoo aore ra te tahi atu faurao. E haapae atoa tatou i te mau tuaro atâta e te ino. (Maseli 3:31) E ara maitai atoa eiaha vetahi ê ia pepe i te tahi mea i to tatou fare. Ua faaue o Iehova i te mau Iseraela: “Ia patu oe i te fare apî ra, ei paruru ta oe e hamani no nia iho; o te taa mai te hoê taata i raro, o te viivii to fare ia oe i te toto.”—Maseli 3:31; Deuteronomi 22:8.

9. Eaha te huru e tia ia faaite i nia i te animara?

9 No Iehova, mea faufaa atoa to tatou huru i nia i te animara. E faatia o ’na ia haapohe i te animara no te tamaa e no te hamani i te ahu, oia atoa mea atâta ana‘e te reira no tatou. (Genese 3:21; 9:3; Exodo 21:28) Eiaha râ tatou e hamani ino, e haapohe e aore ra e faataputô ia ratou no te faaanaanatae noa.—Maseli 12:10.

MEA MO‘A TE ORA

10. Eaha te faaite mai ra te toto o te ora ïa?

10 Mea mo‘a te toto no Iehova no te mea te toto o te ora ïa. I muri a‘e i te haapoheraahia o Abela, ua na ô o Iehova ia Kaina: “Te pii maira te reo ra o te toto o to taeae mai te repo maira ia ’u.” (Genese 4:10) Te faahoho‘a ra te toto o Abela i to ’na ora e ua faautua o Iehova ia Kaina i te taparahi-pohe-raa i to ’na taeae. I muri a‘e i te diluvi, ua haapapu faahou o Iehova, te toto o te ora ïa. Ua faatia oia ia Noa e to ’na utuafare ia amu i te i‘o animara. Ua na ô oia: “Te mau mea ora atoa e haere nei, ei maa ïa na outou, mai te mau raau maa atoa ra: ua horoa-atoa-hia ’tu e au na outou.” Ua faaite râ o Iehova eaha ta ratou e ore e amu na roto i teie faaueraa: “O te  i‘o râ ma te ora atoa i roto ra, oia te toto, eiaha outou e amu i te reira.”—Genese 1:29; 9:3, 4.

11. Eaha ta te Atua i faaue i te nunaa Iseraela no nia i te toto?

11 Hau atu i te 800 matahiti i muri a‘e i to Iehova parauraa ia Noa eiaha e amu i te toto, teie ta ’na i faaue i to ’na nunaa: “To te tamarii a Iseraela, e to te feia e purutia i roto ia outou, ia imi e ia auau i te manu avae maha e te manu pererau e tia ia amu ra, e noaa ihora, e faatahe oia i te toto i raro a tapo‘i ai i te repo.” E ua na ô â oia: “Eiaha outou e amu i te toto.” (Levitiko 17:13, 14) Ua hinaaro noa â o Iehova ia riro te toto ei mea mo‘a no to ’na nunaa. E nehenehe ratou e amu i te i‘o animara, eiaha râ te toto. Ia haapohe ratou i te animara no te amu, e faatahe ratou i te toto i raro i te repo.

12. Eaha te mana‘o o te mau Kerisetiano i te toto?

12 Tau matahiti i muri a‘e i te pohe o Iesu, ua putuputu te mau aposetolo e matahiapo o te amuiraa Kerisetiano i Ierusalema. Ua faaoti ratou eaha te mau tuhaa o te ture a Mose ta te mau Kerisetiano e tia â ia haapao. (A taio i te Ohipa 15:28, 29; 21:25.) Ua tauturu o Iehova ia ratou ia taa e mea faufaa noa â te toto no ’na e e tia ia tamau ratou i te faariro i te reira ei mea mo‘a. Eiaha ïa te mau Kerisetiano matamua ia inu e ia amu i te toto, oia atoa ia amu i te animara aita te toto i faatahehia. Ia ore ratou ia haapao i tera mau tuhaa, e au ta ratou hara mai te haamori idolo aore ra te peu taotoraa tia ore. Mai reira mai, ua faaoti te mau Kerisetiano mau i te ore e amu aore ra e inu i te toto. E no tatou i teie mahana? Te hinaaro noa ra o Iehova ia riro te toto ei mea mo‘a no tatou.

13. Eaha te tumu eita te mau Kerisetiano e farii i te pâmuraa toto?

13 E tano atoa anei tera ture no te pâmuraa toto? E. Ua faaue o Iehova eiaha ia amu aore ra ia inu i te toto.  A hi‘o na, ia parau atu te taote eiaha ia inu i te ava, te auraa anei e nehenehe ta oe e pâmu i te reira i roto i to oe tino? Eita roa ’tu! Hoê â huru no te toto, ia faauehia eiaha ia amu aore ra ia inu i te reira, eiaha atoa ïa te toto ia pâmuhia i roto i te tino.—A hi‘o i te faataaraa hau 29 i te pae hopea o te buka.

14, 15. Eaha ta te Kerisetiano e faaoti i te rave no te haafaufaa i te ora e no te auraro ia Iehova?

14 Eaha te huru ia parau atu te taote e pohe oe ia ore e pâmuhia te toto? Na te taata taitahi e faaoti e auraro anei oia i ta te Atua ture no nia i te toto. No te mau Kerisetiano, mea faufaa te ora ta te Atua i horoa mai. E imi ratou i te tahi atu mau ravea rapaauraa, eita râ e farii i te pâmuraa toto.

15 Eita iho â tatou e hinaaro e pohe. I te mea râ, e mea faufaa te ora no te Atua, eita tatou e farii i te pâmuraa toto. Mea faufaa a‘e ia auraro ia Iehova i te faaherehere ia tatou ma te ofati i ta ’na ture. Ua parau Iesu: “O tei tapea hoi i to ’na ora, e ere ïa oia i te reira. O tei ere râ i to ’na ora no ’u nei, e noaa faahou mai ïa ia ’na te reira.” (Mataio 16:25) Na to tatou here ia Iehova e turai mai ia auraro ia ’na. Ua ite o ’na eaha te mea maitai a‘e no tatou. E mai ia Iehova, e faariro tatou i te ora ei mea mo‘a e te faufaa mau.—Hebera 11:6.

16. Eaha te tumu e auraro ai te mau tavini o te Atua ia ’na?

16 Ua faaoti papu te mau tavini taiva ore o te Atua i te auraro i ta ’na ture no nia i te toto. Eita ratou e amu e e inu i te reira, eita atoa e farii i te ravea rapaauraa o te faaohipa i te toto. * E imi râ ratou i te tahi atu mau rapaauraa  no te aupuru i to ratou ora. Ua papu ia ratou ua ite te Atua poiete eaha te mea maitai a‘e no ratou. Na ’na hoi i horoa mai i te ora e i hamani i te toto. E oe, te tiaturi ra anei oe o ’na te mea ite a‘e eaha te mea maitai no oe?

TE FAANAHORAA HOÊ ROA TA IEHOVA I FARII NO TE FAAOHIPA I TE TOTO

17. I Iseraela, eaha te faanahoraa hoê roa ta Iehova i farii no te faaohipa i te toto?

17 I roto i te ture ta te Atua i horoa ia Mose, ua parau o Iehova i te mau Iseraela: “Tei te toto hoi te maa ora e ora ’i te mau mea atoa ra, i haapao ai au i te reira e o ta outou ïa e hopoi i nia i te fata ei taraehara [aore ra no te ani i te faaoreraa hara] na outou iho, o te toto hoi tei riro ei taraehara no te taata.” (Levitiko 17:11) Ia hara te mau Iseraela, e nehenehe ratou e haere i te hiero no te taparu ia Iehova ia faaore i ta ratou hara. E pûpû ratou i te hoê animara ei tusia e e ani i te tahu‘a ia ninii maa toto i nia i te fata. Tera ana‘e te faanahoraa hoê roa ta Iehova i farii ia faaohipa te mau Iseraela i te toto.

18. Maoti te tusia o Iesu, eaha ta tatou e nehenehe e fana‘o?

18 I to Iesu haereraa mai i nia i te fenua, ua faaore oia i te ture no nia i te tusia animara ma te horoa i to ’na ora, aore ra toto, no te faaore i ta tatou hara. (Mataio 20:28; Hebera 10:1) I muri a‘e i te tia-faahou-raa o Iesu, ua ho‘i o ’na i te ra‘i e ua faaite i te faufaa rahi o to ’na ora. Ua nehenehe o Iehova e faaohipa i te reira ia fana‘o faahou te taata atoa i te tiaturiraa e ora e a muri noa ’tu.—Ioane 3:16; Hebera 9:11, 12; Petero 1, 1:18, 19.

Eaha te rave no te faaite te haafaufaa ra oe i te ora e te toto?

19. Eaha te tia ia rave ia nehenehe tatou e parau “e ere no ’u te hape ia ore te taata e faaorahia”?

19 Auê tatou i te mauruuru ia Iehova no te ô faahiahia  mau o te ora! E hinaaro tatou e faaite i te taata ia faatupu ratou i te faaroo ia Iesu, e nehenehe ratou e ora e a muri noa ’tu. Mea here na tatou i te taata, e imi ana‘e i te mau ravea atoa no te faaite atu eaha te rave ia ora ratou. (Ezekiela 3:17-21) Mai te aposetolo Paulo, e nehenehe ïa tatou e parau: “E ere no ’u te hape ia ore te taata e faaorahia, inaha ua faaite iho â vau ia outou i te mau mea atoa no nia i te hinaaro o te Atua.” (Ohipa 20:26, 27) E haafaufaa mau tatou i te ora e te toto ia faaite tatou ia vetahi ê o vai o Iehova e eaha to ’na mana‘o no nia i te ora.

^ par. 16 No te ite atu â no nia i te pâmuraa toto, a hi‘o i te mau api 77-79 o te buka Rave noa i te mau mea e here mai ai te Atua piahia e te mau Ite no Iehova.