Eaha to roto?

Mau faaho'iraa ê

Tapura tumu parau

Ite no Iehova

Tahiti

Eaha ta te Bibilia e haapii mai?

Faataaraa hau

Faataaraa hau

1 IEHOVA

O Iehova te i‘oa o te Atua, “Na ’na e faariro” te auraa. O Iehova te Atua Mana hope e na ’na i poiete i te mau mea atoa. E mana to ’na no te faatupu i te mau mea atoa ta ’na e opua e rave.

Ua papaihia te i‘oa o te Atua e na reta Hebera e maha o te tuea ra i na reta YHWH aore ra JHVH. I roto i te mau papai Hebera o te Bibilia, e itehia te i‘oa o te Atua fatata 7 000 taime. I tera e tera fenua, ua rau te papairaa o te i‘oa Iehova. Na te ao nei, e faahiti te taata i tera i‘oa mai tei matauhia i roto i to ratou reo tumu.

Pene 1, par. 15

2 UA PAPAIHIA TE BIBILIA “I RARO A‘E I TE ARATAIRAA A TE VARUA O TE ATUA”

E Parau na te Atua te Bibilia, ua faaohipa râ o ’na i te taata no te papai i to ’na mau mana‘o. Mai te hi‘oraa o te hoê paoti ohipa o te ani i ta ’na papai parau ia hamani i te hoê rata o te faahiti i to ’na mau mana‘o. Ua faaohipa te Atua i to ’na varua mo‘a no te aratai i te feia papai Bibilia ia faaite e ia papai i to ’na mau mana‘o. Ua rau te raveraa a te varua o te Atua no te aratai atu. I te tahi taime, ua na reira na roto i te mau orama aore ra moemoeâ o ta ratou i faatia e i papai i muri iho.

Pene 2, par. 5

3 TE MAU FAAUERAA TUMU

E aratairaa e aore ra e faaueraa o te faaite mai i te hoê haapiiraa mau e te ohie no roto mai i te Bibilia. Te tahi hi‘oraa, “e ino te haerea maitai i te amuimuiraa i te feia iino.” Te haapii mai ra ïa, ia au i te feia o ta tatou e maiti i te amuimui, e nehenehe tatou e maitai mai e aore ra e fifi. (Korinetia 1, 15:33) Te parau ra te Bibilia, “ta te taata hoi e ueue ra, o ta ’na atoa ïa e ooti.” Te haapii mai ra ïa, e faahopearaa  to te mau ohipa ta tatou e rave, eita tatou e nehenehe e ape i te reira.—Galatia 6:7.

Pene 2, par. 12

4 TE HOÊ PARAU TOHU

E poroi papaihia i raro a‘e i te aratairaa a te varua o te Atua. E nehenehe te reira e faaite mai i te hinaaro o te Atua, i te haapiiraa a te Atua no nia i te mea maitai e te mea ino, i te hoê faaueraa aore ra haavaraa. E nehenehe atoa e riro ei poroi o te faaara mai i te tahi mea o te tupu a muri a‘e.

Pene 2, par. 13

5 TE MAU PARAU TOHU NO NIA I TE MESIA

O Iesu tei faatupu i te mau parau tohu Bibilia e rave rahi no nia i te Mesia. A hi‘o i te tapura “ Te mau parau tohu no nia i te Mesia.”

Pene 2, te nota o te par. 17

6 TE OPUARAA A IEHOVA NO TE FENUA

Ua poiete te Atua i te fenua ia riro te reira ei paradaiso, ei nohoraa no te mau taata atoa o te here ia ’na. Aita ta ’na opuaraa i taui. Fatata te Atua i te faaore i te ino atoa e te horoa i te ora mure ore i to ’na mau taata.

Pene 3, par. 1

7 TE DIABOLO RA O SATANI

O ’na te melahi o tei haamata i te orure hau i te Atua. E piihia o ’na Satani, o Patoi te auraa, no te mea te patoi ra o ’na ia Iehova. E pii-atoa-hia Diabolo, o Pari haavare te auraa. Ua horoahia tera i‘oa no ’na no te mea te pari haavare ra o ’na i te Atua e te haavare atoa ra i te taata.

Pene 3, par. 4

  8 TE MAU MELAHI

Ua poiete o Iehova i te mau melahi na mua roa ’‘e a hamanihia ’i te fenua. Ua poietehia ratou no te ora i te ra‘i. Ua hau ratou i te hoê hanere mirioni. (Daniela 7:10) E i‘oa to ratou tataitahi e mea taa ê te tahi i te tahi. Ma te haehaa, eita te mau melahi haapao maitai e farii ia haamorihia ratou e te taata. Mea taa ê to ratou tiaraa e ua rau ta ratou hopoia. E tavini i mua i te terono o Iehova, e faatae i ta ’na mau poroi, e paruru e e aratai i ta ’na mau tavini i te fenua, e faatupu i ta ’na mau haavaraa e e turu i te pororaa o te parau apî oaoa. (Salamo 34:7; Apokalupo 14:6; 22:8, 9) I mua nei, e apiti ratou na muri ia Iesu i roto i te tama‘i o Aramagedo.—Apokalupo 16:14, 16; 19:14, 15.

Pene 3, par. 5; pene 10, par. 1

9 TE HARA

Ua riro te mau huru, mana‘o e ohipa atoa o te patoi ia Iehova aore ra o te ore e faatupu i to ’na hinaaro ei hara. E tuino te hara i to tatou auhoaraa e o te Atua. No reira o ’na i horoa mai ai i te mau ture e faaueraa o te tauturu mai ia ore ia rave i te hara ma te opuahia. I te haamataraa, ua poiete o Iehova i te mau mea atoa ma te tia roa. Ua maiti râ Adamu raua Eva i te ore e auraro ia Iehova, ua hara ihora, e riro atura ei taata tia ore. Ua ruauhia raua e ua pohe. I te mea ua tutuu mai Adamu i te hara, e fanauhia tatou ei taata tia ore. No reira tatou e ruau atoa ’i e e pohe ai.

Pene 3, par. 7; pene 5, par. 3

10 ARAMAGEDO

O te tama‘i a te Atua o te haamou i te ao a Satani e te ino atoa.

Pene 3, par. 13; pene 8, par. 18

 11 TE BASILEIA O TE ATUA

O te faatereraa ta Iehova i haamau i te ra‘i. O Iesu Mesia te faatere ra ei Arii. I mua nei, e faaohipa o Iehova i te Basileia, aore ra Faatereraa arii, no te faaore i te ino atoa. E mana mai te Faatereraa arii a te Atua i nia i te fenua taatoa.

Pene 3, par. 14

12 IESU MESIA

Ua poiete te Atua ia Iesu na mua ’‘e i te mau mea atoa. Ua tono o Iehova ia Iesu i nia i te fenua no te pohe no te huitaata atoa. Ua pohe o Iesu, ua faatiahia mai râ o ’na e Iehova. Te faatere ra Iesu i teie nei i te ra‘i ei Arii o te Faatereraa arii a te Atua.

Pene 4, par. 2

13 TE PARAU TOHU O NA 70 HEBEDOMA

Ua tohu te Bibilia afea te Mesia e fa mai ai. E tupu te reira ia hope te tau o na 69 hebedoma. E haamata te reira i te matahiti 455 hou te Mesia e e hope i te matahiti 29 i muri a‘e te Mesia.

E nafea ia papu ua hope te reira i te matahiti 29? Ua haamata na 69 hebedoma i te matahiti 455 hou te Mesia. I tera matahiti, ua tae Nehemia i Ierusalema e haamatahia ’tura te oire i te patu-faahou-hia. (Daniela 9:25; Nehemia 2:1, 5-8) E hitu mahana i roto hoê hebedoma. I roto râ i te mau parau tohu Bibilia, e pinepine i te taiohia “hoê mahana hoê ïa matahiti.” (Numera 14:34; Ezekiela 4:6) I roto i teie parau tohu, e hitu ïa matahiti i roto hoê hebedoma. Ia numerahia, e 483 matahiti te noaa mai no na 69 hebedoma (69 x 7). Ia taiohia 483 matahiti mai 455 hou te Mesia, e noaa mai ia tatou te matahiti 29 i muri a‘e te Mesia. (Aita e matahiti aore i roto i te tarena.) I tera matahiti mau Iesu i bapetizohia ’i e i riro ai ei Mesia.—Luka 3:1, 2, 21, 22.

 Ua faahitihia i roto i tera noa â parau tohu hoê faahou hebedoma, te auraa e hitu faahou ïa matahiti. Eaha te tupu i roto i tera area tau? E haapohehia te Mesia e ua tupu te reira i te matahiti 33. E haamata-atoa-hia te parau apî oaoa o te Faatereraa arii i te porohia i te mau nunaa atoa, e ere faahou râ i te mau ati Iuda ana‘e. Tera mau tei tupu mai te matahiti 36 mai.—Daniela 9:24-27.

Pene 4, par. 7

 14 TE HAAPIIRAA HAPE O TE TORU TAHI

Te haapii ra te Bibilia o Iehova te Atua poiete e na ’na i poiete ia Iesu na mua ’‘e i te mau mea atoa. (Kolosa 1:15, 16) E ere o Iesu te Atua Mana hope e aita atoa o ’na i parau ua faito o ’na i te Atua. No reira Iesu i parau ai: “Mea puai a‘e te Metua ia ’u.” (Ioane 14:28; Korinetia 1, 15:28) Te haapii nei râ te tahi mau haapaoraa e Toru tahi te Atua. Te parau ra ratou, te Metua, te Tamaiti e te Varua maitai, taua tootoru ra, hoê â ïa. E haapiiraa hape tera, aita te parau Toru tahi i roto i te Bibilia.

E ere te varua mo‘a i te tahi tuhaa o te hoê Toru tahi. Te faataa maitai ra te Bibilia, o Iehova ana‘e te Atua mau, o Iesu ta ’na Tamaiti otahi, e te varua mo‘a, o te puai ohipa ïa o Iehova. O te puai ohipa ite-ore-hia ta te Atua e faaohipa no te faatupu i to ’na hinaaro. Te tahi hi‘oraa, te parauhia ra no te mau Kerisetiano matamua, ua “î a‘era ratou pauroa i te varua mo‘a.” E ua parau atoa o Iehova: “E ninii au i te tahi tuhaa o to ’u varua i nia i te mau huru taata atoa.”—Ohipa 2:1-4, 17.

Pene 4, par. 12; pene 15, par. 17

15 TE SATAURO

Eita te mau Kerisetiano mau e faaohipa i te satauro i roto i ta ratou haamoriraa i te Atua. Eaha te tumu?

  1. Mea maoro te satauro i te faaohiparaahia i roto i te haapaoraa hape. Hou Iesu a haere mai ai i nia i te fenua, e ravehia na te satauro no te faatupu i te tahi oroa no te faateniteni i te mau mea atoa i roto i te natura. E faatupu atoa na te mau nunaa ěê i te tahi oroa no te satauro, i reira ratou e rave ai i te mau peu faufau. I te roaraa o na 300 matahiti i muri a‘e i te pohe o Iesu, aita te mau Kerisetiano i faaohipa i te satauro i roto i ta ratou haamoriraa. I muri a‘e roa, na te emepera Roma o Constantin, e ere roa ’tu na Iesu, i faaoti e riro te satauro ei tapao no te mau Kerisetiano. Ua  na reirahia no te turai i te feia o te ore e haamori i te Atua ia haere i te fare pure. Te faataa ra te tahi buka papu: “Ua faaohipa a‘ena te taata i te satauro hou Iesu a haere mai ai i nia i te fenua, oia atoa te feia o tei ore i tiaturi ia Iesu.”—New Catholic Encyclopedia.

  2. Aita o Iesu i pohe i nia i te satauro mai ta te rahiraa e mana‘o ra. Te auraa mau o te parau Heleni satauro, e pou tia ïa, e raau aore ra tumu raau. Te faataa ra te tahi buka papu: “Na roto i te reo Heleni [te reo tumu o te Faufaa Apî], eita roa e mana‘ohia e piti raau teie.” (The Companion Bible) Ua pohe Iesu i nia hoê ana‘e pou tia.

  3. Eita o Iehova e hinaaro ia faaohipa tatou i te mau hoho‘a aore ra tao‘a i roto i ta tatou haamoriraa.—Exodo 20:4, 5; Korinetia 1, 10:14.

Pene 5, par. 12

16 TE OROA HAAMANA‘ORAA

Ua faaue Iesu i ta ’na mau pǐpǐ ia haapao i te Oroa haamana‘oraa o to ’na pohe. E na reira ratou i te mau matahiti atoa i te 14 no Nisana, i te hoê â mahana e faatupu ai te mau Iseraela i te oroa Pasa. E faahaerehia te pane e te uaina, o te faahoho‘a ra i te tino e te toto o Iesu, i te mau taata atoa o te tae i te Oroa haamana‘oraa. E amu te feia o te faatere e o Iesu i te ra‘i i te pane e e inu atoa i te uaina. Area te feia o te tiaturi e ora e a muri noa ’tu i nia i te fenua, eita ratou e amu e e inu i te reira. E haere râ ratou i te Oroa haamana‘oraa no te faaite i to ratou faatura.

Pene 5, par. 21

17 NEPHE E PUSUKE

E ta‘o Hebera nephe e e ta‘o Heleni pusuke. Ia hi‘opoahia te faaohiparaa o na ta‘o i roto i te Bibilia, papu maitai e no (1) te taata, (2) te animara, aore ra (3) te ora o te hoê taata aore ra o te hoê animara. Teie te tahi mau hi‘oraa:

  •  Te taata. “I te tau o Noa, . . . i ora mai ai e va‘u ana‘e taata na roto atu i te pape.” (Petero 1, 3:20) I ǒ nei, ua faaohipahia te parau Heleni pusuke no te taata, oia o Noa e ta ’na vahine, ta ’na e toru tamaiti e ta ratou vahine.

  • Te animara. “Ua parau ihora te Atua, Ia rahi te mea ora [Hebera nephe] nee haere i raro i te moana, e te mau manu ia maue i nia a‘e i te fenua i roto i te reva atea i te ra‘i nei. Ua parau ihora te Atua, Ia fanau mai te fenua nei i te mau mea ora [Hebera nephe] ma to ratou ra huru, te mau puaa, te mau mea e nee haere, e te mau manu avae maha o te fenua ra, ma to ratou ra huru: e oia mau atura.”—Genese 1:20, 24.

  • Te ora o te hoê taata aore ra o te hoê animara. Ua parau o Iehova ia Mose: “Ua hope hoi te mau taata i titau mai ia oe e taparahi ra i te pohe [Hebera “ia pohe to oe nephe”].” (Exodo 4:19) I to Iesu haereraa mai i nia i te fenua, ua na ô oia: “O vau te tiai mamoe maitai. E horoa te tiai mamoe maitai i to ’na ora [“Heleni pusuke,” nota] no te mau mamoe.”—Ioane 10:11.

    Ia rave atoa te tahi taata i te hoê mea ma to ’na “ora atoa,” te auraa ïa ua na reira o ’na ma te aau tae e ua horoa i te mea maitai roa ’‘e ia au i te maraa ia ’na. (Mataio 22:37; Deuteronomi 6:5) E faaohipa-atoa-hia te parau nephe no te faataa i te hinaaro aore ra hiaai rahi o te tahi taata. Oia atoa, no te taata pohe aore ra tino pohe.—Numera 6:6; Maseli 23:2; Isaia 56:11; Hagai 2:13.

Pene 6, par. 5; pene 15, par. 17

18 RUA E PENEUMA

Ua rau te auraa o te ta‘o Hebera rua e to te ta‘o Heleni peneuma i roto i te Bibilia. E faaohipa-noa-hia râ na ta‘o e piti no te faataa i te tahi mea eita te taata e ite mata. Mai te mata‘i, te puai ora i roto i te taata e te animara, te mau varua e te puai ohipa o te Atua, oia hoi te varua mo‘a. Aita te Bibilia  e haapii ra, e ora ’tu te tahi tuhaa o te tino ia pohe te taata.—Exodo 35:21; Salamo 104:29; Mataio 12:43; Luka 11:13.

Pene 6, par. 5; pene 15, par. 17

19 GEHENA

Te i‘oa o te tahi peho piri atu ia Ierusalema i reira e taninahia ’i te pehu. Aita e haapapuraa ua haamauiuihia aore ra ua tanina-oraora-noa-hia te animara aore ra te taata i roto i teie peho i te tau o Iesu. E ere ïa Gehena i te hoê vahi ite-ore-hia i reira te feia o tei pohe e haamauiuihia ’i i roto i te auahi e a muri noa ’tu. I to Iesu faahitiraa no te feia o te hurihia i Gehena, te parau ra o ’na no te haamouraa mure ore.—Mataio 5:22; 10:28.

Pene 7, par. 20

20 TE PURE A TE FATU

Matau-atoa-hia te pure E to matou Metua i te ao ra. E parau-atoa-hia, e hoho‘a pure. Ua faahiti hoi Iesu i te reira ia ’na i haapii ai i ta ’na mau pǐpǐ e nafea ia pure. Ua haapii mai Iesu ia pure:

  • “Ia mo‘a to oe i‘oa”

    Te pure ra tatou ia Iehova ia faaore i te mau faainoraa atoa o tei faahitihia i nia i to ’na i‘oa, aore ra roo. Te auraa, ia faahanahana e ia faatura to te ra‘i atoa e to te fenua atoa i te i‘oa o te Atua.

  • “Ia tae mai ta oe Faatereraa arii”

    Te pure ra tatou ia haamou te faatereraa a te Atua i te ao ino a Satani, ia mana mai te reira i nia i te fenua e ia riro te fenua ei paradaiso.

  • “Ia tupu to oe hinaaro i te fenua nei”

    Te pure ra tatou ia tupu te opuaraa a te Atua no te fenua ia ora te feia auraro e te tia roa i roto i te paradaiso mai ta Iehova i hinaaro i to ’na poieteraa i te taata.

Pene 8, par. 2

 21 TE HOO

Ua horoa o Iehova i te hoo no te faaora mai i te taata i te hara e te pohe. Ua aufauhia te hoo i titauhia ia fana‘o faahou tatou i te ora tia roa ta te taata matamua ra o Adamu i ere e ia hau faahou tatou ia Iehova. Ua tono te Atua ia Iesu i nia i te fenua ia pohe oia no te feia hara atoa. Maoti te pohe o Iesu, e nehenehe tatou paatoa e tiaturi e ora e a muri noa ’tu e e riro ei taata tia roa.

Pene 8, par. 21; pene 9, par. 13

22 NO TE AHA E MATAHITI FAUFAA MAU 1914?

Te haapii mai ra te parau tohu i roto i te Daniela pene 4 e haamau te Atua i ta ’na Faatereraa arii i 1914.

Te parau tohu: Ua faaite o Iehova i te arii Nebukanesa i te tahi moemoeâ no nia i te hoê tumu raau rahi o te tâpûhia. E taatihia te tumu o tera raau i te auri e te veo ia ore te reira ia tupu “e ia hitu noa ’tu i te matahiti,” aore ra i roto i te reo tumu e parauhia, “e ia hope noa ’tu e hitu tau.” I muri iho, e tupu faahou mai te tumu raau.—Daniela 4:1, 10-16.

Te auraa no tatou: Te faahoho‘a ra te tumu raau i te faatereraa a te Atua. E rave rahi matahiti, i faaohipa na o Iehova i te mau arii i Ierusalema no te faatere i te nunaa Iseraela. (Paraleipomeno 1, 29:23) Ua taiva râ te mau arii e ua hope ta ratou mau faatereraa. Ua haamouhia Ierusalema i te matahiti 607 hou te Mesia. I reira te haamataraa na hitu tau. (Te mau arii 2, 25:1, 8-10; Ezekiela 21:25-27) Ua faahiti Iesu i na hitu tau i to ’na parauraa, e ‘taataahihia Ierusalema e te mau nunaa ěê e ia hope noa ’tu te tau faataahia o te mau nunaa ěê.’ (Luka 21:24) Aita ïa na hitu tau i hope a ora ’i Iesu i nia i te fenua nei. Ua fafau o Iehova i te faatoroa i te hoê Arii ia hope na hitu tau. E fana‘o te nunaa o te Atua ati a‘e i te fenua i te mau haamaitairaa rahi e a muri noa ’tu na roto i te faatereraa a teie Arii apî, oia hoi o Iesu.—Luka 1:30-33.

 Te maoro o na hitu tau: E 2 520 matahiti te maoro o na hitu tau. Ia taio tatou 2 520 matahiti mai 607 hou te Mesia, e noaa mai te matahiti 1914. (Aita e matahiti aore i roto i te tarena.) Tera te matahiti i faariro ai o Iehova ia Iesu Mesia ei Arii o ta ’na Faatereraa arii i te ra‘i.

Mea nafea te noaaraa mai 2 520 matahiti? Te parau ra te Bibilia 1 260 mahana te maoro no e toru tau e te afa. (Apokalupo 12:6, 14) Ia tataipitihia te maoro no e toru tau e te afa, e noaa mai 2 520 mahana aore ra e hitu tau. Teie nei, e 2 520 matahiti no te mea e pinepine i te taiohia “hoê mahana hoê ïa matahiti” i roto i te mau parau tohu Bibilia.—Numera 14:34; Ezekiela 4:6.

Pene 8, par. 23

23 TE MELAHI RAHI O MIKAELA

“Raatira o te mau melahi” te auraa. No te hoê ana‘e melahi tera tiaraa i roto i te Bibilia. E to ’na i‘oa, o Mikaela.—Daniela 12:1; Iuda 9.

O Mikaela te Aratai o ta te Atua nuu melahi haapao maitai. Te na ô ra te Apokalupo 12:7: “Aro atura Mikaela e ta ’na mau melahi i te teni . . . e ta ’na mau melahi.” Te parau ra te buka Apokalupo o Iesu te Aratai o te nuu a te Atua. Te auraa, o Mikaela te tahi atu i‘oa o Iesu.—Apokalupo 19:14-16.

Pene 9, par. 4

24 TE MAU MAHANA HOPEA

Te hoê tau i reira e itehia ’i te tahi mau tupuraa taa ê i nia i te fenua na mua rii noa ’tu te Faatereraa arii e haamou ai i te ao a Satani. No te faataa i tera noa â tau i roto i te mau parau tohu Bibilia, e faaohipa-atoa-hia te parau “te anotau hopea o te faanahoraa o te ao nei” e “te tau o te ho‘iraa mai o te Tamaiti a te taata.” (Mataio 24:3, 27, 37) Ua  haamata te reira i te haamauraahia te Faatereraa arii a te Atua i te ra‘i i 1914 e e hope ia haamouhia te ao a Satani i Aramagedo.—Timoteo 2, 3:1; Petero 2, 3:3.

Pene 9, par. 5

25 TE TIA-FAAHOU-RAA

E parauhia e tia-faahou-raa ia faaho‘i mai te Atua i tei pohe i te ora. E iva tia-faahou-raa o tei faahitihia i roto i te Bibilia. I rotopu i te mau taata o tei faatupu i te reira, te vai ra o Elia, Elisaia, Iesu, Petero e Paulo. Ua tupu tera mau semeio maoti noa te puai no ǒ mai i te Atua. Te fafau ra o Iehova e tia faahou mai “te feia parau-tia e . . . te feia parau-tia ore” no te ora i nia i te fenua. (Ohipa 24:15) Te faahiti atoa ra te Bibilia no te tia-faahou-raa i te ra‘i. E tupu te reira ia tia faahou mai tei maitihia, aore ra faatavaihia, e te Atua no te ora i nia i te ra‘i e o Iesu.—Ioane 5:28, 29; 11:25; Philipi 3:11; Apokalupo 20:5, 6.

Pene 9, par. 13

26 TE OHIPA MANA NO Ǒ MAI I TE MAU DEMONI

O te peu ino e tamata i te paraparau tia roa ’tu i te mau varua aore ra ma te farerei i te tahi taata mai te tahu‘a manamana, taata tahutahu aore ra hi‘ohi‘o. E rave teie feia i tera ohipa no te mea te tiaturi ra ratou i te haapiiraa hape e ora ’tu te varua o te taata o tei pohe no te riro ei tupapau puai mau. E tamata atoa te mau demoni i te turai i te taata ia faaroo ore i te Atua. E ohipa mana no ǒ mai i te mau demoni te peu hi‘o fetia no te tohu i te ananahi, te peu hi‘ohi‘o, te mau ohipa manamana e maere, te peu tahutahu, te mau tiaturiraa o te faariaria ra i te taata e te vai ra ’tu â. E rave rahi buka, vea, poroi o te tohu i te ananahi, hoho‘a teata, hoho‘a pia e himene o te turai ia mana‘o e ere te mau demoni, te ohipa manamana e maere i te mea atâta.  E ere roa ’tu râ i te ohipa hauti! No ǒ mai atoa i te mau demoni te tahi mau ohipa o te faatupuhia no te hunaraa mai te pûpûraa i te tusia no tei pohe, te tiairaa i te tino pohe aore ra te tahi mau peu o te faatupuhia no te haamana‘o i tei pohe. E pinepine te taata i te rave i te raau taero no te tamata i te ani i te mana no ǒ mai i te mau demoni.—Galatia 5:20; Apokalupo 21:8.

Pene 10, par. 10; pene 16, par. 4

27 TE MANA ARII HAU Ê O IEHOVA

O Iehova te Atua Mana hope e na ’na i poiete i te ao taatoa. (Apokalupo 15:3) No reira o ’na te Fatu o te mau mea atoa e tei ia ’na te mana arii, aore ra tiaraa hau ê, no te faatere i te mau mea atoa ta ’na i poiete. (Salamo 24:1; Isaia 40:21-23; Apokalupo 4:11) E ture ta ’na i haamau no te mau mea atoa ta ’na i hamani. Tei ia Iehova atoa te mana no te faatoroa i te tahi atu ei faatere. E turu tatou i te mana arii hau ê o te Atua ma te here e ma te auraro ia ’na.—Paraleipomeno 1, 29:11.

Pene 11, par. 10

28 E HAAMARUA I TE TAMARII

O te haapoheraa ma te opuahia i te hoê pêpe o tei ore i fanauhia ’tura. Mea taa ê ia pohe te pêpe no te tahi ati aore ra no te tahi ohipa o tei tupu i roto i te tino o te metua vahine. Mai te taime tôraa, mea faufaa te ora o teie pêpe. E taparahiraa taata ïa te haamaruaraa tamarii.

Pene 13, par. 5

29 TE PÂMURAA TOTO

E faanahoraa teie ta te mau taote e faaohipa no te pâmu i te toto aore ra hoê o na tuhaa rahi e maha o te toto i roto i te tino o te taata. E ravehia te toto haaputuhia o tera iho â taata aore ra te toto o vetahi ê. Teie na tuhaa rahi e maha o  te toto: Te pape toto, te mau toropuru ura, te mau toropuru tea e te mau tao‘a tahi haaputua toto.

Pene 13, par. 13

30 TE A‘O

I roto i te Bibilia, e ere noa te a‘o i te tahi atu ta‘o no te faataa i te faautuaraa. Ia a‘ohia te tahi taata, e haapiihia, e haaferurihia e e faatitiaifarohia o ’na. E ere o Iehova i te mea ino i nia i te feia ta ’na e a‘o, e faaite noa râ o ’na i te huru au noa. (Maseli 4:1, 2) Ua horoa o Iehova i te hi‘oraa nehenehe mau i te mau metua. Mea maitai noa te a‘o no ǒ mai ia ’na e tae roa te taata i te hinaaro, aore ra here, i te reira. (Maseli 12:1) Mea here na Iehova i to ’na nunaa e te aratai ra oia ia ratou. E horoa ’tu oia i te haapiiraa o te faaafaro i to ratou mau mana‘o e te tauturu atu ia feruri e ia haa ia au i to ’na hinaaro. E a‘o atoa te mau metua ma tauturu i ta ratou tamarii ia taa no te aha mea faufaa ia auraro. Ia haapii atoa ’tu te metua ia here ia Iehova, ia hinaaro i ta ’na Parau, te Bibilia, e ia taa i te mau aratairaa e faaueraa e vai ra i roto.

Pene 14, par. 13

31 TE MAU DEMONI

O te mau varua ino ite-ore-hia puai a‘e i te taata. E melahi ino te mau demoni. Ua riro mai mai tera i to ratou maitiraa i te riro ei enemi no te Atua ma te faaroo ore ia ’na. (Genese 6:2; Iuda 6) Ua turu ratou ia Satani i to ’na patoiraa ia Iehova.—Deuteronomi 32:17; Luka 8:30; Ohipa 16:16; Iakobo 2:19.

Pene 16, par. 4