TE FAAINEINE ra oe ia oe no te haere i te pororaa. Aita hoi ta oe e ohipa i tera mahana. Feaa ’tura to oe mana‘o, ua rohirohi rii hoi oe. Mea au hoi ia faaea i te fare! Pure ihora râ oe e reva ’tura. I tera poipoi, orua te hoê tuahine ruhiruhia taiva ore te pororaa. Putapû roa oe, mea maoro hoi o ’na i roto i te parau mau e e tuahine maitai atoa. A poro ai orua na tera e tera fare, haamana‘o atura oe e te faaite atoa ra to oe mau taeae e tuahine i te ao nei i te hoê â poroi o te parau mau, te faaohipa ra i te hoê â mau papai, e te fana‘o atoa ra i te hoê â faaineineraa. I to oe ho‘iraa i te fare, ua itoito roa oe. Aua‘e iho â ïa oe aita i faaea i te fare!

I teie mahana, o te taviniraa Kerisetiano te ohipa matamua a te Basileia o te Atua. Ua tohu Iesu e e rahi roa mai te ohipa pororaa i teie mau mahana hopea. (Mat. 24:14) Mea nafea ta ’na parau tohu i te tupuraa? I roto i teie tuhaa, e faahiti mai tatou i te feia poro, te mau huru raveraa e te mau ravea i faaohipa-rahi-hia na i roto i te taviniraa e o te tauturu nei i te mau mirioni taata i te ao nei ia ite e te vai mau ra te Basileia o te Atua.