Faatanoraa no te "mode accessibilité"

Search

Maiti te reo

Mau faaho'iraa ê

Eaha to roto?

Ite no Iehova

Tahiti

E hinaaro anei oe e ite i te parau mau?

E hinaaro anei oe e ite i te parau mau?

TE PARAU MAU no nia i te aha? No nia i vetahi mau uiraa faufaa roa ’‘e ta te taata i ui a‘enei. Ua uiui paha oe i teie mau uiraa:

  • Te tapitapi mau ra anei te Atua ia tatou?

  • E ore anei te tama‘i e te mauiui?

  • Eaha te tupu mai ia pohe tatou?

  • E tiaturiraa anei to tei pohe?

  • E nafea vau e pure ai e e faaroohia ’i e te Atua?

  • E nafea vau e oaoa ’i i te oraraa nei?

Ihea oe e imi ai i te mau pahonoraa i teie mau uiraa? Ia haere oe i te mau fare vairaa buka aore ra hooraa buka, e ite paha oe e tausani buka e parau ra e horoa i te mau pahonoraa. E pinepine râ te hoê buka i te ore e tuea i te tahi atu. E tano te tahi atu i tera taime ia hi‘ohia eita râ e maoro e ere faahou i te mea faufaa e e faaapîhia aore ra e monohia.

Te vai ra râ te hoê buka e pahonoraa papu to roto. E buka e ore roa e haavare. Ua pure Iesu Mesia i te Atua: “O to parau na te parau mau.” (Ioane 17:17) No tatou i teie mahana, o te Bibilia Mo‘a tera Parau. I to muri nei mau api, e ite poto oe i te pue pahonoraa mau e te maramarama o te Bibilia i te mau uiraa i nia nei.

 Te tapitapi mau ra anei te Atua ia tatou?

TUMU O TE UIRAA: Te ora ra tatou i roto i te hoê ao î i te aroha ore e te parau-tia ore. Te haapii ra e rave rahi haapaoraa e o to te Atua hinaaro te mau mauiui ta tatou e faaû ra.

TA TE BIBILIA E HAAPII RA: Eita roa te Atua e faatupu i te ino. “Eiaha roa te parau ino ra e hurihia ’tu i te Atua! eiaha roa te Puaihope ia parauhia i te rave parau ino ra!” ta te Ioba 34:10 ïa e parau ra. E opuaraa î i te here ta te Atua no te taata. No reira Iesu i haapii mai ai ia pure: “E to matou Metua i te ao ra, ia . . . tae [mai] to oe ra hau. Ia haapaohia to oe hinaaro i te fenua nei, mai tei te ao atoa na.” (Mataio 6:9, 10) Te tapitapi roa ra te Atua ia tatou i haapao ai oia e ia tupu papu ta ’na opuaraa.—Ioane 3:16.

A hi‘o atoa i te Genese 1:26-28; te Iakobo 1:13; e te Petero 1, 5:6, 7.

E ore anei te tama‘i e te mauiui?

TUMU O TE UIRAA: Te tamau noa ra te tama‘i i te titau i te ora o e rave rahi roa taata. Ua putapû tatou paatoa i te mauiui o te taata.

TA TE BIBILIA E HAAPII RA: Te tohu ra te Atua i te hoê tau e haamau ai oia i te hau e ati a‘e te fenua. I raro a‘e i to ’na Basileia, te hoê faatereraa i te ra‘i, “e ore [te taata] e haapii faahou i te tama‘i.” “E tiapai” râ ratou “i ta ratou ‘o‘e ei auri arote.” (Isaia 2:4) E faaore te Atua i te parau-tia ore e te mauiui atoa. Te fafau ra te Bibilia: “Na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra [te parau-tia ore e te mauiui atoa o teie mahana].”—Apokalupo 21:3, 4.

A hi‘o atoa i te Salamo 37:10, 11; 46:9; e te Mika 4:1-4.

Eaha te tupu mai ia pohe tatou?

TUMU O TE UIRAA: Te haapii ra te rahiraa o te mau haapaoraa a te ao e e tamau te tahi mea i roto roa i te hoê taata i te ora i muri a‘e i te pohe. Te tiaturi ra vetahi e e nehenehe tei pohe e totoa i tei ora aore ra e faautua te Atua i te taata ino ma te haamauiui ia ratou e a muri noa ’tu i roto i te hoê po auahi.

TA TE BIBILIA E HAAPII RA: I te poheraa, e faaea te taata i te ora. “Aita roa te feia i pohe e ite faahou i te tahi mea è atu,” ia au i te Koheleta 9:5 (Te Bibilia Mo’a V.C.J.S., 1976). I te mea e eita tei pohe e nehenehe e ite, e mana‘o aore ra e faaû i te mau tupuraa atoa, eita ïa ratou e nehenehe e totoa—aore ra e tauturu—i tei ora.—Salamo 146:3, 4.

A hi‘o atoa i te Genese 3:19 e te Koheleta 9:6, 10.

 E tiaturiraa anei to tei pohe?

TUMU O TE UIRAA: Te hinaaro ra tatou e ora, e te hinaaro ra tatou e oaoa i te ora e te feia ta tatou e here ra. E hinaaro iho â tatou e ite â i to tatou feia here i pohe.

TA TE BIBILIA E HAAPII RA: E faatiahia mai te rahiraa o te taata i pohe. Ua fafau Iesu e ‘e haere mai te feia i roto i te [“mau menema mehararaa,” Traduction du monde nouveau] i rapae.’ (Ioane 5:28, 29) Ia au i ta te Atua opuaraa matamua, e ravea ta tei faatiahia mai ei taata no te ora i nia i te hoê fenua paradaiso. (Luka 23:43) I roto i teie oraraa fafauhia no a muri a‘e, e ô atoa te ea tia roa e te ora mure ore no te mau taata e faaroo. Te na ô ra te Bibilia: “E parahi te feia parau-tia i nia i te fenua, e parahi tamau â ratou i reira.”—Salamo 37:29.

A hi‘o atoa i te Ioba 14:14, 15; te Luka 7:11-17; e te Ohipa 24:15.

E nafea vau e pure ai e e faaroohia ’i e te Atua?

TUMU O TE UIRAA: Te pure ra te taata i roto fatata i te mau haapaoraa atoa. Te mana‘o ra râ e rave rahi e aita ta ratou mau pure e pahonohia ra.

TA TE BIBILIA E HAAPII RA: Ua haapii mai Iesu eiaha ia tahana noa i te mau ta‘o i roto i ta tatou mau pure. “Ia pure outou,” ta Iesu ïa i parau, “eiaha ia rahi te parau rii faufaa ore.” (Mataio 6:7) Ia hinaaro tatou e ia faaroo te Atua i ta tatou mau pure, ia pure tatou ma te ravea ta ’na e farii e tia ’i. No te na reira, ia haapii tatou eaha to te Atua hinaaro e ia pure i muri iho ia au i te reira e tia ’i. Te faataa ra te Ioane 1, 5:14: “Ia ani noa ’tu tatou i te mau mea atoa i au [i te Atua] ra, te faaroo maira ïa oia ia tatou.”

A hi‘o atoa i te Salamo 65:2; te Ioane 14:6, 14; e te Ioane 1, 3:22.

E nafea vau e oaoa ’i i te oraraa nei?

TUMU O TE UIRAA: Te tiaturi ra e rave rahi taata e e faaoaoa te moni, te roo aore ra te haviti ia ratou. No reira, te tapi ra ratou i teie mau mea—no te ite noa e aita ratou e oaoa ra.

TA TE BIBILIA E HAAPII RA: Ua faaite Iesu i te ravea no te oaoa ia ’na i parau: “E ao to tei ite i to ratou veve i te pae varua.” (Mataio 5:3, MN) E nehenehe e oaoa mau ia rave noa tatou i te mau taahiraa no te haamâha i to tatou hinaaro rahi roa ’‘e—to tatou poia i te parau mau pae varua no nia i te Atua e ta ’na opuaraa no tatou. Tei roto tera parau mau i te Bibilia. E tauturu mai te iteraa i te reira ia haroaroa i te mea faufaa mau e te mea faufaa ore. Ia vaiiho tatou i te parau mau Bibilia ia aratai i ta tatou mau faaotiraa e ohipa, e hopoi mai ïa i te hoê oraraa e auraa ’tu â to te reira.—Luka 11:28.

A hi‘o atoa i te Maseli 3:5, 6, 13-18 e te Timoteo 1, 6:9, 10.

 E hi‘oraa poto noa teie o te mau pahonoraa Bibilia i e ono uiraa. E hinaaro anei oe e ite hau atu â? Mai te peu e to rotopu oe i te feia i “ite i to ratou veve i te pae varua,” e hinaaro iho â ïa oe. E uiui paha oe i te tahi atu mau uiraa mai teie: ‘Mai te peu e te tapitapi maira te Atua, eaha oia i faatia ’i e ia rahi roa te ino e te mauiui i te roaraa o te tuatapaparaa? E nafea vau e haamaitai ai i to ’u oraraa utuafare?’ Te horoa ra te Bibilia i te mau pahonoraa mauruuru e te faahiahia i teie e i e rave rahi atu â uiraa.

Te taiâ ra râ e rave rahi i te hi‘o i roto i te Bibilia. No ratou, e buka roroa ïa e te fifi roa ia taa i te tahi mau taime. E hinaaro anei oe i te tauturu ia ite oe i te mau pahonoraa i roto i te Bibilia? Te pûpû ra te mau Ite no Iehova e piti ravea.

A tahi, ua faaineinehia te buka Eaha ta te Bibilia e haapii mau ra? no te tauturu i te mau taata ohipa roa ia hi‘opoa i te mau pahonoraa maramarama o te Bibilia i te mau uiraa faufaa roa. A piti, o te porotarama haapiiraa Bibilia tamoni ore ïa i te fare. Ma te tamoni ore, e nehenehe te hoê Ite no Iehova tapiri aravihi i te haapii i te Bibilia, e haere i ǒ oe aore ra i te tahi atu vahi e tano e e horoa maa taime i te mau hebedoma atoa no te aparau e o oe no nia i te Bibilia. Ua faufaahia e mirioni taata e ati a‘e te ao i teie porotarama. Teie te faaotiraa oaoa roa a e rave rahi o ratou: “Ua itehia ia ’u te parau mau!”

Aita ’tu e tao‘a rahi a‘e e itehia mai. E faatiamâ mai te parau mau Bibilia i te tiaturiraa niu ore, te taa ore, e te riaria tano ore. E horoa mai te reira i te tiaturiraa, te fa, e te oaoa. Ua parau Iesu: “E ite . . . outou i te parau mau, e na te parau mau outou e faatiamâ.”—Ioane 8:32.

No te ite atu â

No te aha e haapii ai i te Bibilia?

E horoa te Bibilia i te mau pahonoraa i te mau uiraa faufaa o te oraraa i te mau mirioni taata na te ao nei. E hinaaro anei oe e ite i tera mau pahonoraa?