Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ho‘i mai ia Iehova ra

 TUHAA TORU

Te inoino: Ia ‘parihia’ tatou

Te inoino: Ia ‘parihia’ tatou

“Ua pari hape mai te hoê tuahine o ta ’u amuiraa i te eiâraa i ta ’na moni. Ua faarooroo vetahi o te amuiraa i te reira e ua turu ratou ia ’na. I muri a‘e, ua parau mai te tuahine e ua faaroo oia i te tahi haamaramaramaraa apî o te faaore i teie pariraa. Noa ’tu e ua tatarahapa mai oia, ua ite au e eita roa ’tu vau e faaore i ta ’na hapa no te ohipa ta ’u i faaruru.”—Linda.

TE TAA ra ia oe i te huru aau o Linda o tei mauiui roa i te mau ohipa i ravehia e te hoê hoa Kerisetiano? Te vahi peapea râ, ua huru ê roa vetahi ê no te haerea o te tahi atu taata, i fifihia ’i ta ratou porotarama pae varua. Hoê â anei to oe tupuraa?

Aita hoê a‘e taata e nehenehe e “faataa ê ia tatou i te aroha o te Atua”

Mea papu, e nehenehe tatou e mana‘o e e mea fifi roa ia faaore i te hapa a te hoê hoa Kerisetiano o tei haamauiui mai. Inaha, mea titauhia ia here te mau Kerisetiano te tahi i te tahi. (Ioane 13:34, 35) Mai te peu e ua faainohia tatou e te hoê hoa Kerisetiano, e nehenehe te toaruaru e te oto e haaparuparu roa ia tatou.—Salamo 55:12.

Parau mau, te faataa ra te Bibilia e te vai ra te mau taime e ‘pari’ te mau Kerisetiano te tahi i te tahi. (Kolosa 3:13) Oia mau, ia tupu te reira i nia ia tatou iho, e ite tatou e e ere i te ohipa nainai ia faaruru i te reira. Eaha ïa te nehenehe e tauturu ia tatou? E hi‘o ana‘e e toru aratairaa Bibilia:

Ua taa i to tatou Metua i te ra‘i i te mau mea atoa. Te hi‘o mai ra Iehova i te mau mea atoa e tupu ra, oia hoi i te mau ohipa tia ore ta tatou e faaruru ra e te mauiui o ta te reira e faatupu. (Hebera 4:13) Hau atu â, te taa mai ra ia Iehova i to tatou mauiui. (Isaia 63:9) Eita roa oia e vaiiho e ‘na te ati, e na te ahoaho’ aore ra na te tahi atu mea, oia atoa na te tahi atu tavini e “faataa ê ia tatou i te aroha o te Atua.” (Roma 8:35, 38, 39) Eita anei tatou e na reira atoa, ma te ore e vaiiho i te hoê noa ’‘e mea aore ra taata e faataa ê ia tatou ia Iehova?

Te faaoreraa i te hapa, e ere ïa i te auraa e e fariihia ta te tahi taata i rave. Ia faaore tatou i ta vetahi ê hapa, eita tatou e haafaufaa ore ia ratou, e imi ra i te otoheraa aore ra eita tatou e farii i ta ratou i rave. A haamana‘o, aita roa ’tu Iehova e farii ra i te hara, e faaore râ oia i te hara mai te peu e te vai ra te hoê tumu e na reira ’i oia. (Salamo 103:12, 13; Habakuka 1:13) Ia faaitoito oia ia tatou ia faaore i ta te tahi hapa, te ani mai ra Iehova ia pee i to ’na hi‘oraa. Eita oia e ‘vaiiho maoro i to ’na riri e a muri noa ’tu.’—Salamo 103:9; Mataio 6:14.

Ia haapae tatou i te inoino, e faufaahia ïa tatou. E nafea? A feruri na i teie tupuraa. E rave oe i te hoê ofai, eiaha râ i te mea teiaha. E toro oe i to oe rima a tapea noa ’i i te ofai. Mea fifi paha no oe ia na reira no te hoê taime. Eaha râ te tupu ia tamata oe i te tapea maoro i te ofai? Ehia hora e nehenehe ta oe e tapea, tau minuti? hoê hora? aore ra hau atu â? Mea papu, e rohirohi roa to oe rima! Parau mau, aita te teiaha mau o te ofai i taui. Ia maoro noa ’tu â oe i te tapea i te ofai, rahi noa ’tu â te reira i te teiaha. Hoê â huru no te inoino. Ia tapea noa  ’tu â tatou i te inoino, noa ’tu mea iti roa te reira, rahi noa ’tu â to tatou mauiui. Mea papu, ua faaitoito Iehova ia tatou ia haapae i te inoino. Oia mau, ma te haapae i te reira, e maitai ïa tatou.—Maseli 11:17.

Ia haapae tatou i te inoino, e faufaahia ïa tatou

“No ’u, e au ra e te paraparau roa mai ra Iehova ia ’u”

Eaha tei tauturu ia Linda ia ore e tapea i te inoino no ta te hoê hoa Kerisetiano i rave i nia ia ’na? Ua feruri maite oia i nia i te mau tumu Bibilia no te faaore i ta vetahi ê hapa. (Salamo 130:3, 4) Ua itoitohia Linda i te taaraa e ia faaore tatou i ta vetahi ê hapa, e faaore atoa ïa Iehova i ta tatou hapa. (Ephesia 4:32–5:2) Te parau ra oia no nia i ta te reira i faatupu i nia ia ’na: “No ’u, e au ra e te paraparau roa mai ra Iehova ia ’u.”

I muri iho, ua nehenehe ta Linda e haapae i te inoino. Ua faaore ohie oia i te hapa a teie tuahine. I teie mahana, e hoa rahi roa raua. Ua maitai faahou mai o Linda i roto i ta ’na taviniraa ia Iehova. Ia papu maitai ia tatou e te hinaaro ra Iehova ia na reira atoa oe.