Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ho‘i mai ia Iehova ra

 TUHAA HOÊ

“Na ’u e imi i tei moe ra”

“Na ’u e imi i tei moe ra”

E nehenehe te mamoe e moe. Te auraa ïa e, a amu noa ’i i te aihere i roto i te aua, e atea ê oia i te tahi atu mau mamoe. I tera taime, eita oia e ite faahou i te nǎnǎ, oia atoa i te tiai mamoe. E te poiri maira hoi. A moe ai i roto i te hoê peho i reira e itehia ’i te mau animara oviri, aita to te mamoe e paruru faahou. Faaroo atura oia i te reo o tei matauhia e ana, o te tiai mamoe ïa, o te horo mai ra ia ’na ra, o te rave ia ’na, o te puohu ia ’na i roto i te opi o to ’na ahu e o te afai atu ia ’na i te fare.

UA FAAAU Iehova ia ’na e rave rahi taime i teie tiai mamoe. I roto i ta ’na Parau, te haapapu mai ra oia ia tatou: ‘Na ’u iho nei e imi i tau mau mamoe, e e aupuru.’—Ezekiela 34:11, 12.

‘Te nǎnǎ o ta ’u i aupuru’

O vai te mau mamoe a Iehova? Ei haapotoraa, o te feia ïa o te here e o te haamori ra ia ’na. Te parau ra te Bibilia: “E haere mai tatou, e haamori ma te pi‘o i raro; e tuu i to tatou turi i te aro o tei hamani ia tatou nei, ia Iehova; oia hoi to tatou Atua, o tatou hoi te nǎnǎ no ta ’na ra aua; te mau mamoe i arataihia e ta ’na rima.” (Salamo 95:6, 7) Mai te mamoe mau o te pee ra i te hoê tiai, te hinaaro rahi ra te feia haamori a Iehova e pee i to ratou Tiai. Ua hape anei ratou i te na reiraraa? Aita. No te mau tavini a te Atua, i te tahi mau taime, ua riro ratou mai ‘te nǎnǎ i purara,’ ‘te mamoe i moe’ e “te mamoe i haere ê.” (Ezekiela 34:12; Mataio 15:24; Petero 1, 2:25) Noa ’tu e e  atea ê te hoê taata, eita Iehova e faarue ia ’na mai te mea ra e aita e ravea faahou.

Te mana‘o ra anei oe e e nehenehe Iehova e riro ei Tiai no oe? E nafea Iehova e haapapu ai i te reira i teie mahana? E hi‘o ana‘e e toru ravea:

Te faaamu nei oia ia tatou i te pae varua. Te parau ra Iehova: “E faaamu au ia ratou i te maâ maitai rahi roa . . . E taoto ratou i reira i nia i te matie ruperupe, e e faaamu hia i te maâ haaporia.” (Ezekiela 34:14, Te Bibilia Mo’a V.C.J.S., 1976) Aita roa ’tu Iehova i haamoe i te horoa mai i te maa pae varua haumǎrû e rave rau i te taime au mau. Ua feruri anei oe i te hoê tumu parau, te hoê oreroraa parau aore ra i te tahi video o te pahono ra i te pure ta oe i faahiti no te tauturu ia oe? Aita anei te reira e haapapu ra e ua aupuru iho â Iehova ia oe?

E paruru e e turu oia ia tatou. Te fafau ra Iehova: “E ua faaho‘i mai i tei purara ê, e ua taamu hoi i tei fati ra, e na ’u e faaetaeta i tei ma‘ihia ra [aore ra tei paruparuhia].” (Ezekiela 34:16) Te faaitoito ra Iehova i te feia tei paruparu aore ra tei ahoaho mau ra. E taamu oia i te pepe o ta ’na mau mamoe, ma te tauturu ia ratou ia ora mai ia haamauiuihia ratou, peneia‘e na te mau hoa Kerisetiano. E faaho‘i mai oia i te feia o te purara ê e te feia o te aro ra i te mau mana‘o tano ore.

Ua hinaaro oia e haapao ia tatou. Te parau ra Iehova: “Ua faaora ia ratou i te mau vahi atoa i purara ’i ratou,” e “Na ’u e imi i tei moe ra.” (Ezekiela 34:12, 16) No Iehova, ia moe te hoê mamoe, e ere ïa te auraa e aita e ravea faahou. Ua ite oia e ia moe ana‘e te hoê mamoe, e haere oia e imi i tera mamoe e ia itehia mai ia ’na e oaoa ïa oia. (Mataio 18:12-14) Inaha, ua pii oia i ta ’na feia haamori mau ‘ta ’u nǎnǎ, te nǎnǎ o ta ’u i aupuru.’ (Ezekiela 34:31) O oe ïa hoê o teie mau mamoe.

No Iehova, ia moe te hoê mamoe, e ere ïa te auraa e aita e ravea faahou. E oaoa oia ia itehia mai teie mamoe

‘E faaapi oe i to matou mau mahana mai i tahito ra’

No te aha Iehova e imi ai ia oe e e titau manihini ai ia oe ia ho‘i mai ia ’na ra? No te mea te hinaaro ra oia ia oaoa oe. Ua tǎpǔ Iehova i te haamaitai i ta ’na mau mamoe. (Ezekiela 34:26) E ere te reira i te tǎpǔ faufaa ore. Ua ite a‘ena oe i teie mau haapapuraa.

A haamana‘o i ta oe i ite a haapii mai ai oe o vai Iehova. Ei hi‘oraa, eaha to oe huru a ite ai oe i te parau mau faahiahia mau no nia i te i‘oa o te Atua e i ta ’na opuaraa no te huitaata i te taime matamua? Te haamana‘o ra anei oe i te haumǎrû ia tahoê e te mau hoa Kerisetiano i te mau tairururaa? I te taime a nehenehe ai oe e faaite i te parau apî oaoa i te tahi atu taata o te faaite i te anaanatae mau, aita anei oe i ho‘i i te fare ma te oaoa rahi?

E nehenehe oe e ite faahou i teie huru oaoa. Ua pure te mau tavini a Iehova i tahito ra: “A faafariu mai oe, e te fatu e, ia matou ia oe na, e e fariu matou ia oe: e faaapi oe i to matou mau mahana mai te i tahito ra.” (Oto o Ieremia 5:21, V.C.J.S.) Ua pahono Iehova i teie pure e ua ho‘i mai to ’na nunaa no te tavini ia ’na ma te oaoa faahou. (Nehemia 8:17) E na reira atoa Iehova no oe.

No te ho‘i mai râ ia Iehova ra, mea ohie a‘e ia parau i te rave. E hi‘o mai tatou i te tahi mau tautooraa no te ho‘i mai e e nafea oe e nehenehe ai e faaruru i te reira.