Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ho‘i mai ia Iehova ra

Rata a te Tino aratai

Rata a te Tino aratai

E te hoa Kerisetiano here e:

Mai ta oe i ite, te rahiraa tuhaa o te Bibilia, no nia ïa i te taata. E rave rahi tane e vahine taiva ore o tei faaruru i te mau fifi, mai “ia tatou atoa te huru.” (Iakobo 5:17) Te vai ra vetahi o tei faateimahahia e te oto e te hepohepo. E no te tahi atu, ua mauiui roa ratou i te haerea o te mau melo o te utuafare aore ra i te mau hoa Kerisetiano. E rave rahi e faahapahapa ra ia ratou iho no te mau ohipa hape ta ratou i rave.

Ua faarue roa anei teie mau taata ia Iehova? Aita. Mai te fatu salamo, e rave rahi o te pure: “Ua haere ê au mai te mamoe i moe ra; e imi oe e faaho‘i i to tavini; aore hoi i moe ia ’u ta oe parau.” (Salamo 119:176) Tera atoa anei to oe mana‘o?

Eita roa ’tu Iehova e haamoe i to ’na feia haamori o tei faaatea ê i te aua. Te tauturu nei râ oia ia ratou, maoti to ratou mau hoa Kerisetiano. E hi‘o mai tatou mea nafea Iehova i te tautururaa i ta ’na tavini ra o Ioba, o tei faaruru e rave rahi ati, mai te fifi i te pae moni, mai te feia ta ’na i here o tei pohe e te hoê ma‘i ino mau. Ua faaruru atoa o Ioba i te mau parau haamauiui no ô mai i te feia tei mana‘ohia e e haere mai ratou e turu ia ’na. Aita râ oia i faarue ia Iehova, noa ’tu e ua hape to ’na mana‘o i te hoê taime. (Ioba 1:22; 2:10) Mea nafea Iehova i te tautururaa ia Ioba ia maitai faahou mai to ’na feruriraa?

Ua tauturu Iehova ia Ioba maoti te hoê hoa Kerisetiano, o Elihu te i‘oa. I to Ioba faaiteraa i to ’na hepohepo, ua faaroo o Elihu e ua turai te reira ia ’na ia paraparau. Eaha ïa ta ’na i parau? E faaino anei oia ia Ioba aore ra e tamata anei oia i te faahapa aore ra i te faahaama ’tu? Ua hau a‘e anei Elihu ia Ioba? Aita roa ’tu! Turaihia e te varua o te Atua, ua parau Elihu: ‘Teie au mai ia oe no te Atua mau, o to oe hoi ïa hinaaro; e araea atoa ra vau i te hamaniraahia ra.’ Ua haapapu atu oia ia Ioba: “E ore oe e mǎta‘u mai i to ’u nei hanahana, e ore hoi tau rima e teimaha i nia ia oe.” (Ioba 33:6, 7) Aita Elihu i faateimaha ia Ioba, ua horoa râ oia i te a‘oraa î i te here e te faaitoitoraa ta Ioba e hinaaro mau ra.

Ua ite oe, ua faaineine matou i teie buka rairai ma te hoê â huru feruriraa. Ua faaroo na mua matou, ua hi‘opoa maite i te mau tupuraa e te mau mana‘o o vetahi o tei faaatea ê. (Maseli 18:13) Ua rave matou i te mau maimiraa i roto i te mau Papai, ua hi‘opoa matou i te mau aamu na roto i te pure no te ite mea nafea Iehova i te tautururaa i ta ’na mau tavini i tahito ra o tei faaruru i te hoê â mau tupuraa. Ia oti, e amui matou i te mau faatiaraa Bibilia e i te mau tupuraa no teie mahana no te nenei i teie buka rairai. Te faaitoito atu nei matou ia oe ia hi‘opoa i teie buka rairai. Te haapapu atu nei matou i to matou here mau ia oe.

Tino aratai a te mau Ite no Iehova