Eaha to roto?

Mau faaho'iraa ê

Tapura tumu parau

Ite no Iehova

Tahiti

A ho‘i mai ia Iehova ra

 TUHAA PAE

A ho‘i mai i “te tiai e te tiaau o to outou ora”

A ho‘i mai i “te tiai e te tiaau o to outou ora”

Ua farerei anei oe hoê aore ra hau atu â tupuraa i faataahia i roto i teie buka rairai? Mai te peu e e, e ere o oe ana‘e. E rave rahi tavini taiva ore a te Atua i te tau tahito e i teie mahana o te faaruru i te hoê â tupuraa. Ua fana‘o ratou i ta Iehova tauturu no te faaruru i te mau tupuraa, e nehenehe atoa oe e fana‘o i te reira.

“Ua taa ’tu râ ia ’u e aita roa ’tu Iehova i faarue ia ’u, ua titauhia ia ’u ia imi i to ’u e‘a no te ho‘i mai ia ’na ra”

 A TIATURI, tei pihaiiho Iehova ia oe ia ho‘i mai oe ia ’na ra. E tauturu oia ia oe ia faaruru i te ahoaho, ia ore e inoino faahou, e ia ite i te hau o te feruriraa e o te aau maoti te hoê mana‘o haava mâ. I muri iho, e itoito faahou mai oe no te tavini ia Iehova e te mau hoa haamori. E au to oe tupuraa i to te tahi Kerisetiano i te senekele matamua o ta te aposetolo Petero i papai: “Mai te mamoe ra hoi outou tei atea ê, i teie nei râ ua ho‘i mai outou i te tiai e te tiaau o to outou ora.”—Petero 1, 2:25.

O te ho‘iraa ia Iehova ra te ravea maitai roa ’‘e o ta oe e nehenehe e rave. No te aha? No te mea e faaoaoa oe i te aau o Iehova. (Maseli 27:11) Mai ta oe i ite, e huru aau to Iehova. E nehenehe ïa ta tatou mau haaraa e ohipa i nia ia ’na. Mea papu, eita Iehova e faahepo ia tatou ia here e ia tavini ia ’na. (Deuteronomi 30:19, 20) Te na ô ra te hoê taata ite i te Bibilia: “Eita ta te hoê taata e nehenehe e haamahora i to oe aau no oe. Na oe iho â e haamahora ’tu.” Ma te haamori ia Iehova ma to tatou aau î i te here, e nehenehe tatou e maiti i te haamahora i to tatou aau. Ia na reira tatou, te horoa ra ïa tatou i te hoê ô faufaa roa, to tatou hapa ore o te faaoaoa rahi i to Iehova aau. Eita iho â tatou e nehenehe e faaau i te oaoa o ta tatou i ite ia horoa na Iehova i te haamoriraa e au ia ’na.—Ohipa 20:35; Apokalupo 4:11.

Hau atu â, ia rave faahou oe i ta oe haamoriraa Kerisetiano, e mâha ïa to oe hiaai i te mau mea pae varua. (Mataio 5:3) Te ui nei te taata e haaati a‘e te ao, ‘No te aha tatou e ora ’i?’ Te hinaaro rahi nei ratou e ite i te mau pahonoraa o te mau uiraa no nia i te tumu mau o te oraraa. Tera to ratou hinaaro, no te mea ua poiete Iehova ia ratou mai tera. Ua poiete oia ia tatou ia oaoa maite tatou i te tavini ia ’na. E ite atu â ïa tatou i te oaoa ia haamori ia Iehova no to tatou here ia ’na.—Salamo 63:1-5.

Ia papu ia oe e te hinaaro ra Iehova ia ho‘i mai oe ia ’na ra. E nafea e papu ai ia oe i te reira? A feruri na: Ma te pure rahi, ua faaineine-maitai-hia teie buka rairai. Ua hopoihia mai te reira na oe, peneia‘e na te hoê matahiapo aore ra na te hoê hoa Kerisetiano. Ua turaihia oe ia taio e ia ite i te pahonoraa o te reira. Te haapapu ra teie buka rairai e aita Iehova i haamoe ia oe. E haafatata mǎrû râ oia ia oe ia ho‘i mai oe ia ’na ra.—Ioane 6:44.

E tamahanahanahia tatou a ite ai e aita roa ’tu Iehova i haamoe i ta ’na mau tavini tei moe. Teie ta te hoê tuahine, o Donna te i‘oa, i haafaufaa. Ua parau oia: “Ua atea mǎrû noa vau i te parau mau, ua pinepine râ vau i te pee i te Salamo 139:23, 24, o te parau ra: ‘E hi‘opoa mai oe ia ’u, e te Atua, ia ite hoi oe i tau aau; e tamata hua mai ia ’u, e ia ite oe i tau mana‘o: e hi‘o mai, e eiaha ei haamainaina [aore ra e faaoto] to roto ia ’u ia oe ra. E aratai oe ia ’u i te e‘a e tia i te vai-maite-raa te maitai ra.’ Ua taa ia ’u e e ere au no teie nei ao, e ere roa ’tu tera to ’u vahi, tei roto râ i te faanahonahoraa a Iehova te vahi e hinaaro ai au e faaea. Ua taa ’tu râ ia ’u e aita roa ’tu Iehova i faarue ia ’u, ua titauhia ia ’u ia imi i to ’u e‘a no te ho‘i mai ia ’na ra. Ua oaoa roa vau i te na reiraraa!”

Tei pihaiiho Iehova ia oe ia ho‘i mai oe ia ’na ra

Te pure nei matou ma te aau haavare ore ia ite faahou oe i “te oaoa . . . no ǒ ia Iehova ra.” (Nehemia 8:10) Ia ho‘i mai oe ia Iehova ra, eita roa ’tu oe e tatarahapa.