Eaha to roto?

Mau faaho'iraa ê

Tapura tumu parau

Ite no Iehova

Tahiti

A ho‘i mai ia Iehova ra

 TUHAA MAHA

Te faahapa: “Tamâ hua mai ia ’u i ta ’u nei hara”

Te faahapa: “Tamâ hua mai ia ’u i ta ’u nei hara”

“E oraraa fana‘o to to ’u utuafare maoti ta ’u ohipa apî. Ua aratai râ te reira ia ’u i roto e rave rahi ohipa huru ê mau. Ua haamata vau i te faatupu i te mau oroa, i te apiti i te mau ohipa poritita, oia atoa i te haere i te fare pure. E Ite no Iehova vau, aita râ vau e haere faahou i te mau putuputuraa e te pororaa a 40 matahiti i teie nei. Rahi noa ’tu â te tau i te mairi, rahi atoa ’tu vau i te mana‘o e aita te reira i hau a‘e i ta Iehova faaoreraa i te hapa. I faahapa noa na vau ia ’u iho. Inaha, ua ite au i te parau mau hou a rave ai i te e‘a ino.”—Martha.

E NEHENEHE te faahapa e faateiaha roa ia tatou. Ua papai te arii Davida: “Ua na nia ta ’u nei mau hara i tau upoo, mai te hopoia teiaha e ore e maraa ia ’u ra.” (Salamo 38:4) Te vai ra vetahi mau Kerisetiano e ua teimaha roa ratou i te oto rahi, i mana‘o ai ratou e eita roa ’tu Iehova e faaore i ta ratou hapa. (Korinetia 2, 2:7) Mea tano anei ia mana‘o mai te reira? Noa ’tu e ua rave oe i te hara rahi, ua atea anei oe ia Iehova i ore roa ’tu ai oia e faaore i ta oe hapa? Aita roa ’tu!

“E faatiatia na tatou i te parau”

Eita Iehova e faarue i te feia hara tei tatarahapa. E haafatata ’tu hoi oia ia ratou! I roto i ta ’na parabole o te tamaiti haamâu‘a faufaa, ua faaau Iesu ia Iehova i te hoê metua î i te here. Ua faarue te tamaiti i to ’na utuafare e ua tapi i te oraraa taiata. I muri iho, ua faaoti te tamaiti i te ho‘i i te fare. “Tei te atea ê â [te tamaiti], ite maira to ’na metua tane ia ’na, aroha ihora, horo maira, tauahi maitai ihora ia ’na e apa maira.” (Luka 15:11-20) E hinaaro anei oe e haafatata ’tu â ia Iehova, noa ’tu e te mana‘o ra oe e ua atea ê oe ia ’na? Mai te metua tane i roto i ta Iesu parabole, e faaite iho â Iehova ia oe i te aumihi. Te tiai ru nei oia i te farii popou faahou ia oe.

E mana‘o anei oe e no te ino mau e no te rahi o ta oe hara, eita ’i Iehova e faaore i te reira? A hi‘o na i te titau-manihini-raa a Iehova ia au i te Isaia 1:18: “E tena na, e faatiatia na tatou i te parau, te na reira maira Iehova: ia uteute roa ta outou mau hara ra, e riro ïa mai te hiona.” Oia atoa, mai te hara i faaauhia i te hoê ahu uouo o te porao i te uteute e o te ore e tumâhia, aita te reira i hau a‘e i ta Iehova faaoreraa i te hapa.

Aita Iehova e hinaaro ra ia mauiui noa oe ma te hoê mana‘o faahapa. E nafea râ oe e ite ai i te tamǎrû no ô mai i te Atua o te faaore i te hara e e faaite ai i te hoê mana‘o haava mâ? A hi‘o na e piti taahiraa ta te arii Davida i rave. A tahi, ua parau oia: “E fa‘i au i tau hara ia Iehova ra.” (Salamo 32:5) A haamana‘o, ua titau manihini a‘ena Iehova ia oe ia haafatata ’tu ia ’na na roto i te pure e ia “faatiatia . . . i te parau” e o ’na. A fa‘i i ta oe mau hara ia Iehova e a faaite i to oe huru aau ia ’na. No ta ’na iho i ite, i nehenehe ai Davida e pure ma te papu: “Tamâ hua mai ia ’u i ta ’u nei hara. . . . Te aau paruparu ra e te oto ra, e ore roa te Atua e vahavaha i te reira.”—Salamo 51:2, 17.

Te piti, ua fana‘o Davida i te tauturu a te hoê tia o ta te Atua i maiti, o Natana te i‘oa. (Samuela 2, 12:13) I teie mahana, maoti Iehova, ua faaineinehia te mau matahiapo o te amuiraa no te  tauturu i te feia o tei tatarahapa ia haamaitai i to ratou auhoaraa e o Iehova. Ia tapiri atu oe i te mau matahiapo, e faaohipa ratou i te mau Papai e e pure ratou ma te haavare ore no te tamǎrû i to oe aau, no te faaiti aore ra no te faaore i to oe mau mana‘o tano ore. E tauturu ïa te reira ia oe ia maitai mai i te pae varua.—Iakobo 5:14-16.

Te hinaaro ra Iehova ia ite oe i te tamǎrûraa o te hoê mana‘o haava

“E ao to ’na! to tei faaorehia ta ’na hara”

Parau mau, e mana‘o paha oe e mea fifi roa ia fa‘i i ta oe mau hara i te Atua ra o Iehova e ia haafatata ’tu i te mau matahiapo. Tera atoa to Davida mana‘o. No te hoê taime, ua “mamû noa” oia no nia i ta ’na mau hara. (Salamo 32:3) I muri a‘e râ, ua ite oia i te haamaitairaa ma te fa‘i i ta ’na mau hara e ma te faatitiaifaro i to ’na haerea.

Hoê o te maitai rahi ta Davida i fana‘o, o te ite-faahou-raa ïa i te oaoa. Ua papai oia: “E ao to ’na! to tei faaorehia ta ’na hara, e tei tapo‘ihia to ’na ino.” (Salamo 32:1) Ua pure atoa oia: “E vevete na oe, e Iehova, i tau vaha, e na tau vaha e arue ia oe.” (Salamo 51:15) Aita faahou e mana‘o faahapa to Davida e ua mauruuru roa oia no te faaoreraa te Atua i ta ’na hara. No reira oia i itoitohia ’i no te faaite ia vetahi ê no nia ia Iehova.

Te hinaaro ra Iehova ia ite oe i te tamǎrûraa o te hoê mana‘o haava. E te hinaaro atoa ra oia ia faaite oe ia vetahi ê no nia ia ’na e i ta ’na mau opuaraa, eiaha ma te mana‘o faahapa, ma te aau haavare ore râ e ma te oaoa rahi. (Salamo 65:1-4) A haamana‘o i teie titau-manihini-raa, “ia tumâhia ta outou mau hara, a horoa noa mai ai Iehova i te anotau haumârû.”—Ohipa 3:19.

O ta Martha ïa i ite. Te faataa ra oia: “E hapono mai ta ’u tamaiti i te mau vea Te Pare Tiairaa e te A ara mai na! Ua haamata mǎrû noa to ’u taairaa e o Iehova. Te tuhaa fifi roa no te ho‘i mai, o te tatarahaparaa ïa no te mau hara atoa ta ’u i rave. I muri iho, ua haafatata ’tu vau i te Atua na roto i te pure e ua ani atu vau ia ’na ia faaore mai i ta ’u mau hara. Mea fifi ia tiaturi e 40 matahiti tei mairi hou a ho‘i mai ai ia Iehova ra. Te ite ra vau i te haapapuraa, e noa ’tu ehia rahiraa matahiti tei mairi, e taime â no te hoê taata no te tavini faahou i te Atua e no te fana‘o i to ’na here.”

No te ite atu â

E haafatata ’tu ia Iehova

Te hoê Atua i “ineine i te faaore i te hara”

Mai te peu e e haamana‘o te Atua i te mau mea atoa, e nafea oia e faaore ai i te hara a ore atu ai e haamana‘o faahou i te reira?