Eaha to roto?

Mau faaho'iraa ê

Tapura tumu parau

Ite no Iehova

Tahiti

O vai te rave nei i to Iehova hinaaro i teie mahana?

 HAAPIIRAA 14

Eaha te haapiiraa faataahia no te mau pionie?

Eaha te haapiiraa faataahia no te mau pionie?

Marite

Haapiiraa no Gileada, Patterson, New York

Panama

Mea maoro te haapiiraa Kerisetiano i te riroraa ei ohipa faufaa no te mau Ite no Iehova. E haapiiraa taa ê tei faataahia no te feia e poro nei i te Faatereraa arii ma te taime taatoa, ia nehenehe ratou e “rave faahope roa i ta [ratou] taviniraa.”—Timoteo 2, 4:5.

Haapiiraa no te mau pionie. I muri a‘e i ta ’na matahiti taviniraa matamua, e tapaohia te hoê pionie tamau i te hoê haapiiraa e 6 mahana e tupu i te hoê Piha a te Basileia fatata. Te fa o teie haapiiraa, e tauturu ïa i te pionie ia piri atu â ia Iehova, ia aravihi atu â i roto i te mau tuhaa atoa o te taviniraa, e ia tamau noa o ’na i te tavini ei pionie.

Haapiiraa no te feia poro i te parau apî oaoa o te Basileia. E faaineine teie haapiiraa e piti ava‘e i te mau pionie aravihi o te farii i te faarue i to ratou fenua no te tavini i te vahi e tonohia ’i ratou. Teie hoi ta ratou e parau: “Inaha, teie au; o vau ta oe e tono.” Te pee ra ïa ratou ia Iesu Mesia, o tei poro rahi na i te parau apî oaoa i te fenua nei. (Isaia 6:9; Ioane 7:29) E titauhia paha ia haamatau ratou ia ratou i te hoê huru oraraa haihai, te peu, te huru o te reva e te maa i ǒ. Ia haapii atoa paha i te hoê reo ê. Teie haapiiraa, no te mau taeae e tuahine taa noa ïa e no te mau taeae e ta ratou iho vahine faaipoipo, mai te 23 tae atu i te 65 matahiti. E tauturuhia ratou ia faahotu atu â i te mau huru maitatai faufaa roa no ta ratou taviniraa e ia aravihi atu â, a faaohipa rahi atu â ’i Iehova e ta ’na faanahonahoraa ia ratou.

Haapiiraa Bibilia no Gileada. E “Ite” te auraa o te ta‘o “Gileada” na roto i te reo Hebera. Mai te haamauraahia o Gileada i 1943 mai â, hau atu i te 8 000 piahi o teie haapiiraa tei tonohia ei mitionare no te poro haere “e tae noa ’tu i te hopea o te fenua.” E maitai rahi tei itehia. (Ohipa 13:47) I to vetahi o ratou tae-matamua-raa ’tu i Peru, aita e amuiraa. I teie nei, ua hau ïa i te 1 000. I te haamataraa ta matou mau mitionare i te poro i Tapone, aita i raea 10 Ite no Iehova i reira. I teie nei, ua hau ratou i te 200 000. I te haapiiraa no Gileada e pae ava‘e, e haapii-hohonu-hia te Parau a te Atua. Te titau-manihini-hia nei te mau pionie taa ê, mitionare, mero o te Betela aore ra tiaau haaati i tera haapiiraa. E faaineine-maitai-hia ratou ia turu i te mau-papu-raa o te ohipa e ravehia ra i te ao nei.

  • Eaha te fa o te Haapiiraa no te mau pionie?

  • No vai ma te Haapiiraa no te feia poro i te parau apî oaoa o te Basileia?