Mai te peu e te haapii ra oe e te hoê Ite no Iehova, eita e ore e e faaineine oe i ta oe haapiiraa. Mea maitai roa ia na reira atoa oe hou a haere ai i te putuputuraa a te amuiraa maoti ïa te hoê porotarama tano maitai.

A faataa i te taime e te vahi no te haapii. Eaha te taime maitai aˈe no oe no te feruriruri? Te aahiata anei hou te ohipa, aore ra te po ia taoto te mau tamarii? A faaoti ehia minuti aore ra hora ta oe e nehenehe e faataa no te haapii ma te ore e vaiiho i te tahi mea ia haafifi ia oe. A imi i te hoê vahi maniania ore e a tupohe i te radio, te afata teata e te vini. E tamǎrû te pure hou te haapiiraa i te ahoaho no te oraraa, a nehenehe atu ai oe e feruri maite i te Parau a te Atua.—Philipi 4:6, 7.

A faaineine i te tumu parau e i te pahono. Ia ite oe na mua i te manaˈo tumu. A feruri ïa i te upoo parau o te tumu parau aore ra o te pene, i te taairaa i rotopu i te mau upoo parau iti e te manaˈo tumu, e a hiˈo i te mau hohoˈa e te mau uiraa haamanaˈoraa o te haamataratara i te mau manaˈo faufaa. Ia oti, a taio i te paratarafa tataitahi e a imi i te pahonoraa o te uiraa. A taio i te mau irava i horoahia e a feruri e nafea te reira e tuea ˈi i te tumu parau. (Ohipa 17:11) Ia itehia ia oe te pahonoraa, a reni i te tahi noa mau taˈo faufaa o te paratarafa. I te putuputuraa, e haamanaˈo ïa oe i te pahonoraa. E ia hinaaro oe, a amo i te rima i nia e a pahono poto noa ˈtu na roto i ta oe iho parau.

Ma te hiˈopoa i te mau tumu parau rau e aparauhia i te mau putuputuraa i te mau hebedoma atoa, e apo mai oe i te mau manaˈo apî, a pue atu â ˈi to oe ite i te Bibilia.—Mataio 13:51, 52.

• Eaha te porotarama ta oe e nehenehe e haamau no te faaineine ia oe no te mau putuputuraa?

• E nafea ia faaineine i te hoê pahonoraa no te putuputuraa?