Te mau tavana 13:1-25
13 Rave faahou aˈera te ati Iseraela i te mea ino i te aro o Iehova,+ e tuu ihora Iehova ia ratou i te rima o te mau Philiseti+ e 40 matahiti.
2 I tera mau mahana, te vai ra hoê tane no Zora+ no te fetii o te ati Dana,+ o Manoa+ te iˈoa. Mea fanau ore ta ˈna vahine faaipoipo e te tamarii ore.+
3 I te hoê mahana, fa maira ta Iehova melahi i te vahine e na ô maira ia ˈna: “Inaha, mea fanau ore oe e te tamarii ore. E hapû e e fanau râ oe i te tahi tamaiti.+
4 Teie nei, a haapao maitai eiaha oe e inu i te uaina aore ra te tahi atu ava,+ e eiaha e amu i te tahi mea viivii.+
5 Inaha, e hapû e e fanau oe i te tahi tamaiti, e eiaha to ˈna upoo ia hahuhia,+ no te mea e riro te tamarii ei Nazira na te Atua mai to ˈna fanauraa mai,* e na ˈna e faaora ia Iseraela i te rima o te mau Philiseti.”+
6 Haere ihora te vahine e parau i ta ˈna tane faaipoipo: “E taata no te Atua mau tei haere mai ia ˈu. E au oia i te melahi a te Atua mau ia hiˈohia ˈtu, mea mǎtaˈu roa. Aita vau i ui atu nohea mai oia, aita atoa oia i faaite mai i to ˈna iˈoa.+
7 Na ô maira râ oia ia ˈu: ‘Inaha, e hapû e e fanau oe i te tahi tamaiti. Teie nei, eiaha e inu i te uaina aore ra te tahi atu ava, e eiaha e amu i te tahi mea viivii, no te mea e riro te tamarii ei Nazira na te Atua mai to ˈna fanauraa mai* tae roa i te mahana e pohe ai oia.’”
8 Taparu ihora Manoa ia Iehova: “E Iehova, teie ta ˈu aniraa: ia haere faahou mai te taata no te Atua mau ta oe i tono mai nei no te haapii ia mâua i ta mâua e rave i te tamarii te fanauhia mai.”
9 Faaroo ihora ïa te Atua mau ia Manoa, e haere faahou maira te melahi a te Atua mau i te vahine ra a parahi ai oia i rapae. Aita ta ˈna tane faaipoipo o Manoa ia ˈna ra.
10 Horo haavitiviti ihora te vahine e parau i ta ˈna tane faaipoipo: “Inaha, ua fa mai ia ˈu te taata tei haere mai ia ˈu i tera mahana ra.”+
11 Tia maira Manoa e haere atura na muri i ta ˈna vahine faaipoipo. Tae atura oia i taua taata ra, e na ô atura ia ˈna: “O oe anei te taata tei paraparau i ta ˈu vahine faaipoipo?” Na ô maira oia: “O vau.”
12 Na ô atura Manoa: “Ia tupu iho â ta oe mau parau! Mai teihea te huru oraraa o te tamarii e eaha ta ˈna ohipa?”+
13 Na ô maira ïa ta Iehova melahi ia Manoa: “Ia haapae ta oe vahine faaipoipo i te mau mea atoa ta ˈu i faahiti ia ˈna.+
14 Eiaha oia ia amu i te tahi mea hamanihia i te vine, eiaha oia ia inu i te uaina aore ra te tahi atu ava,+ e eiaha oia ia amu i te tahi mea viivii.+ Pauroa ta ˈu i faaue ia ˈna, ia haapao oia.”
15 Na ô atura Manoa i ta Iehova melahi: “A faaea mai na, e faaineine mâua i te tahi fanauˈa puaaniho na oe.”+
16 Na ô maira râ ta Iehova melahi ia Manoa: “Ia faaea noa mai au, eita vau e amu i ta oe maa. Ia hinaaro râ oe e pûpû i te tahi tusia taauahi ia Iehova, e nehenehe oe e pûpû i te reira.” Aita Manoa i ite e melahi oia na Iehova.
17 Na ô atura Manoa i ta Iehova melahi: “O vai to oe iˈoa,+ ia nehenehe mâua e faahanahana ia oe ua tupu anaˈe ta oe parau?”
18 Tera râ, na ô maira ta Iehova melahi ia ˈna: “Eaha oe e ui mai ai o vai to ˈu iˈoa? E iˈoa faahiahia hoi.”
19 Rave maira Manoa i te puaaniho apî e te tusia huero maa e pûpû aˈera i te reira ia Iehova i nia iho i te ofai. E te rave ra te Atua i te tahi ohipa maere a hiˈo noa ˈi Manoa e ta ˈna vahine faaipoipo.
20 A pee ai te ura auahi i te raˈi mai nia mai i te fata, reva aˈera ta Iehova melahi i nia na roto i te ura auahi mai nia mai i te fata, a hiˈo noa ˈi Manoa e ta ˈna vahine faaipoipo. I reira iho, tipapa ihora raua i raro i te repo.
21 Aita ˈtura ta Iehova melahi i fa faahou mai ia Manoa e ta ˈna vahine faaipoipo. Taa ihora ia Manoa e melahi oia na Iehova.+
22 Na ô atura Manoa i ta ˈna vahine faaipoipo: “Papu e pohe tâua, no te mea o te Atua ta tâua i ite.”+
23 Na ô maira râ ta ˈna vahine faaipoipo ia ˈna: “Ahani ua hinaaro Iehova e haapohe ia tâua, eita oia e farii i te tusia taauahi+ e te tusia huero maa no roto i to tâua rima, eita oia e faaite ia tâua i teie mau mea atoa, e eita oia e parau ia tâua i teie mau parau.”
24 I muri aˈe, fanau maira te vahine i te tahi tamaiti e topa ihora ia ˈna i te iˈoa o Samasona.+ E a paari mai ai te tamaroa, haamaitai noa maira Iehova ia ˈna.
25 I te hoê mahana, haamata ihora to Iehova varua i te ohipa i nia ia ˈna+ i Mahane-dana,+ i ropu ia Zora e ia Esetaola.+
