Salamo 68:1-35
Na te aratai o te feia himene. Salamo a Davida. Himene.
68 Ia tia mai te Atua, ia haapurarahia to ˈna mau enemi,E te feia o te hae ra ia ˈna, ia horo ê ïa mai mua mai ia ˈna.+
2 Mai te au auahi e pee i te mataˈi, a tiahi atoa ia ratou.Mai te tapau e tahe i mua i te auahi,Ia pohe te feia ino i mua i te Atua.+
3 Ia oaoa râ te feia parau-tia.+Ia oaoa roa ratou i mua i te Atua.Ia umere ratou ma te oaoa.
4 A himene i te Atua, a himene i te arueraa* i to ˈna iˈoa.+
A himene i Tei haere na te mau vahi papu pâpâmǎrô.*
O Ia* to ˈna iˈoa!+ A oaoa i mua ia ˈna!
5 E metua no te mau otare e e paruru* no te mau vahine ivi,+O te Atua ïa i to ˈna ra nohoraa moˈa.+
6 Te horoa ra te Atua i te nohoraa i te feia moˈemoˈe.+Te faaora nei oia i tei mau i te fare auri a faarahi atu ai i ta ratou faufaa.+
Area te feia haapaari,* te parahi ra ïa i te hoê fenua mǎrô.+
7 E te Atua e, i to oe aratairaa i to nunaa,+I to oe haereraa na te medebara, (Sela)
8 Ua aueue te fenua.+Ua faatopa mai te raˈi i te ûa rahi* no te Atua.Ua aueue Sinai no te Atua, te Atua o Iseraela.+
9 Ua faatopa mai oe i te ûa rahi, e te Atua e.Ua faaitoito faahou oe i to oe nunaa* o tei rohirohi.
10 Ua parahi ratou i roto i to puhapa.+No to maitai, ua aupuru oe i te feia veve, e te Atua e.
11 E horoa Iehova i te faaueraa.E nuu rahi te mau vahine e faaite ra i te parau apî oaoa.+
12 Te horo ra te mau arii o te mau nuu,+ te horo ra!
E tuhaa atoa ta te vahine e faaea ra i te fare i roto i te faufaa i haruhia mai.+
13 I taoto na outou i te pae auahi i rotopu i te puhaparaa,*E haru râ outou i reira i te hoê uupa e pererau ario to ˈnaE te hiti pererau auro.
14 I te haapurararaa te Manahope i te mau arii no taua fenua ra,*+Topa maira te hiona* i Zalamona.
15 E mouˈa na te Atua* te mouˈa o Basana.+Mea teitei te mau tupuai mouˈa o Basana.
16 E teie mau mouˈa teitei e, eaha outou e hiˈo ai ma te nounouI te mouˈa ta te Atua i maiti* ei nohoraa no ˈna?+
Oia mau, e parahi Iehova i reira e a muri noa ˈtu.+
17 E ahuru tausani pereoo tamaˈi ta te Atua, e tausani i te tausaniraa.+
Ua haere mai Iehova mai Sinai mai i roto i te vahi moˈa.+
18 Ua haere oe i nia.+Ua rave oe i te taata ei tîtî.Ua rave oe i te taata ei ô,+Oia atoa te taata haapaari,+ no te parahi i rotopu ia ratou, e te Atua e Ia.
19 Ia aruehia Iehova, o te amo noa ra i ta tatou hopoia i te mau mahana atoa,+Te Atua mau o to tatou faaoraraa. (Sela)
20 No tatou, e Atua o te faaora te Atua mau.+E faaora te Arii hau ê e Fatu ra o Iehova i te pohe.*+
21 Oia, e vavahi te Atua i te upoo o to ˈna mau enemi,Te upoo o te taata atoa o te tamau noa i te rave i te hara.+
22 Ua parau Iehova: “E faahoˈi mai au ia ratou mai Basana mai,+E faahoˈi mai au ia ratou mai roto mai i te miti hohonu,
23 Ia rari to avae i te toto o to oe mau enemi+E ia mitimiti te arero o ta oe mau urî i to ratou toto.”
24 Te ite ra ratou i ta oe mau poroteraa, e te Atua e,Te mau poroteraa a to ˈu Atua, to ˈu Arii, i roto i te vahi moˈa.+
25 Te haere ra te feia himene i mua e tei muri ia ratou te feia hauti upaupa taura.+I ropu ia ratou, o te mau vahine apî ïa e tairiiri ra i te tariparau.+
26 A arue i te Atua i roto i te amuiraa rahi.A arue ia Iehova, e te feia no roto mai i te Tumu o Iseraela.+
27 I reira, te haavî nei Beniamina,+ te mea apî aˈe, ia ratou,Te huiarii atoa o Iuda e to ratou nahoa taata ahoahoa,Te huiarii o Zebuluna, te huiarii o Naphatali.
28 Ua faaue to Atua e horoahia te puai ia oe ra.
A faaite i to puai, e te Atua e, ua ohipa hoi oe no matou.+
29 No to oe hiero i Ierusalema,+E hopoi mai te mau arii e rave rahi i te ô na oe.+
30 A aˈo i te mau animara oviri o te mau aeho,Te nǎnǎ puaatoro oni+ e ta ratou mau fanauˈa,E haere noa mai ai te mau nunaa e tipapa i mua ia oe a hopoi mai ai* i te moni ario.
A haapurara i te mau nunaa mea au na ratou i te tamaˈi.
31 E ravehia te taoˈa veo mai Aiphiti mai.+E oioi roa o Kusa i te pûpû i te ô i te Atua.
32 E te mau faatereraa arii o te fenua, a himene i te Atua,+A himene* ia Iehova, (Sela)
33 I tei horo na nia i te mau raˈi tahito ra.+
Inaha, te faaharuru nei oia i to ˈna reo, to ˈna reo puai.
34 A arue i te Atua no to ˈna puai.+
Tei nia ia Iseraela to ˈna tiaraa no te faatere,E tei te mau raˈi* to ˈna puai.
35 Mea riaria te Atua mai roto mai i to ˈna* nao* rahi.+
O ˈna te Atua o Iseraela,O te horoa i te puai e te mana i te nunaa.+
Ia aruehia te Atua.
Nota i raro i te api
^ Aore ra “hauti i te upaupa.”
^ Huri-atoa-hia “na nia i te mau ata.”
^ E haapotoraa “Ia” o te iˈoa Iehova.
^ Heb: “haava.”
^ Aore ra “orure hau.”
^ Heb: “Ua topatapata mai te raˈi.”
^ Heb: “ta oe tuhaa tutuuhia.”
^ Huri-atoa-hia “te mau aua mamoe.”
^ Heb: “to ˈna mau arii.”
^ Aore ra “Mai te huru ra e ua topa te hiona.”
^ Aore ra “mouˈa faahiahia.”
^ Aore ra “e hinaaro ra.”
^ E taahia e faahoˈi mai i te taata mai te pohe mai i te ora.
^ Huri-atoa-hia “haere noa mai te mau nunaa e taataahi.”
^ Aore ra “hauti i te upaupa.”
^ Heb: “roto i te mau ata.”
^ Heb: “to oe.”
