Ruta 3:1-18

  • Ta Naomi faaueraa ia Ruta (1-4)

  • Ruta e Boaza i te vahi tairiiriraa huero maa (5-15)

  • Hoˈiraa Ruta ia Naomi ra (16-18)

3  Parau maira Naomi to ˈna metua vahine hoovai ia ˈna: “Ta ˈu tamahine eiaha anei au e imi i te hoê nohoraa* no oe,+ ia maitai hoi oe?  E ere anei e auraa fetii to Boaza ia tâua?+ Na ˈna te mau tavini vahine apî outou te ohiparaa. I teie po, i te vahi tairiiriraa huero maa,* e hue oia i te kerite i nia.  No reira, a hopu i te pape e a parai ia oe i te monoˈi noˈanoˈa, a oomo atu ai i to oe ahu tapoˈi, a pou atu ai i te vahi tairiiriraa huero maa. Eiaha e faaite ia oe i taua tane ra, haapao paia roa o ˈna.  Ia tarava oia, a hiˈo i te vahi e tarava ˈi oia, a haere atu ai oe e tatara i te ahu tapoˈi i to ˈna avae, a tarava ˈtu ai i reira. Na ˈna e parau ia oe eaha ta oe e rave.”  Pahono atura Ruta: “Pauroa ta oe e parau mai, e rave au.”  Haere atura ïa oia i te vahi tairiiriraa huero maa e rave atura pauroa ta to ˈna metua vahine hoovai i faaue ia ˈna.  I taua taime ra, te tamaa ra e te inu ra Boaza e te oaoa ra to ˈna aau. Haere atura oia e taoto i pihai iho i te haapueraa kerite. I muri iho, haere mǎrû noa maira Ruta, tatara ihora i te ahu tapoˈi i te avae o Boaza e tarava ihora.  I te tuiraa po, haamata ihora Boaza i te rûrû, parahi maira e ite ihora e vahine te tarava ra i to ˈna pae avae.  Parau maira oia: “O vai oe?” Pahono atura te vahine: “O Ruta, to tavini. A paruru* i to tavini, e tiaraa hoi to oe e hoo mai ia ˈu.”+ 10  Na ô maira Boaza: “Ia haamaitai Iehova ia oe, ta ˈu tamahine. Ua faaite oe i to here taiva ore i teie nei taime hau aˈe i te taime matamua,+ ma te ore e na muri i te mau tane apî, te veve aore ra te taoˈa rahi. 11  E i teie nei, ta ˈu tamahine, eiaha e mǎtaˈu. E rave au no oe pauroa ta oe e parau,+ ua ite hoi to te oire atoa* e vahine maitai roa oe. 12  E tiaraa iho â to ˈu e hoo mai ia oe,+ te vai ra râ te tahi atu tane e tiaraa to ˈna e hoo mai ia oe, mea piri aˈe o ˈna ia oe ia ˈu.+ 13  A faaea noa i ǒ nei i teie po, e mai te peu na ˈna e hoo mai ia oe ia poipoi, mea maitai ïa! Na ˈna ïa e hoo mai ia oe.+ Tera râ, ia ore oia e hinaaro e hoo mai ia oe, na ˈu iho ïa e hoo mai ia oe, o ta ˈu ïa horeo i te ora o Iehova te Atua ora. A tarava noa i ǒ nei e poipoi noa ˈtu.” 14  No reira, taoto ihora oia i te pae avae o Boaza e poipoi noa ˈtura, e tia aˈera aita â i ao atura a ore atu ai e itehia o vai tera. Parau maira Boaza: “Eiaha ia itehia e vahine tei haere mai i te vahi tairiiriraa huero maa.” 15  Parau atoa maira oia: “A rave mai na te ahu tapoˈi i nia iho ia oe, e a hohora na.” Hohora ihora Ruta i te ahu. Tuu ihora Boaza e ono faito* kerite i roto, tuu ihora i te reira i nia ia ˈna e haere atura i te oire. 16  Haere atura Ruta i ǒ to ˈna metua vahine hoovai, tei parau mai: “Eaha ˈtura no oe,* ta ˈu tamahine?” Faatia pauroa ˈtura oia i ta Boaza i rave no ˈna. 17  Na ô atoa ˈtura oia: “Ua horoa mai oia teie e ono faito kerite e ua parau mai: ‘Eiaha oe e haere i ǒ to oe metua vahine hoovai ma te ore e afai atu i te tahi mea.’” 18  Parau maira Naomi: “A tiai i ǒ nei, ta ˈu tamahine, haapao ite roa oe eaha te hopea o taua ohipa ra, e imi hoi taua tane ra i te mau ravea atoa ia oti roa taua ohipa ra i teie mahana.”

Nota i raro i te api

Heb: “vahi hau.”
Hiˈo i te titionare.
Aore ra “A hohora mai na i to hiti ahu i nia.”
Heb: “te mau uputa atoa o to ˈu nunaa.”
Peneiaˈe e ono faito sea, aore ra piri i te 44 L. Hiˈo i te tuhaa hau B14.
Heb: “O vai oe?”