Ruta 2:1-23

  • Ohi-haere-raa Ruta i roto i ta Boaza faaapu (1-3)

  • Farereiraa Ruta e Boaza (4-16)

  • Faaiteraa Ruta ia Naomi i to Boaza hamani maitai (17-23)

2  E auraa fetii to Naomi ia Boaza+ te hoê taata taoˈa rahi i te pae o ta ˈna tane faaipoipo, e hoê â opu fetii to raua Elimeleka.  Na ô atura Ruta te vahine ati Moabi ia Naomi: “A vaiiho na ia ˈu ia haere i te faaapu e ohi haere+ i te peenave huero maa na muri i te feia e hiˈo maitai mai ia ˈu.” Pahono maira ïa Naomi: “A haere, ta ˈu tamahine.”  Haere atura oia e haamata ˈtura i te ohi haere i roto i te faaapu na muri i te feia ooti. Tano maitai, tei nia oia i te hoê tâpû fenua o Boaza,+ hoê â opu fetii to raua Elimeleka.+  Inaha, tae maira Boaza na Betelehema mai e na ô maira i te feia ooti: “Ei ia outou na Iehova.” Pahono atura ratou: “Ia haamaitai Iehova ia oe.”  Ani maira Boaza i te tane apî e tiaau ra i te feia ooti: “Na vai teie tamahine apî?”  Pahono atura te tane apî: “E ati Moabi+ teie tamahine apî, ua na muri mai oia ia Naomi tei hoˈi mai na te tuhaa fenua o Moabi mai.+  Ua ani mai oia: ‘Nehenehe anei au e ohi haere+ e e haaputu i te peenave huero maa tâpûhia* tei vaiihohia e te feia ooti?’ E mai teie poipoi mai â oia i te tia-noa-raa e tae roa mai i teie taime, a tahi ra oia a parahi ai i raro aˈe i te tamaru no te faafaaea rii.”  Parau maira Boaza ia Ruta: “A faaroo mai na, ta ˈu tamahine. Eiaha e haere i roto i te tahi atu faaapu e ohi haere ai, e eiaha e haere i te tahi atu vahi, a faaea noa i pihai iho i ta ˈu mau tavini vahine apî.+  A haapao noa i te faaapu ta ratou e ooti ra, e a haere na muri ia ratou. Ua parau vau i te mau tane apî eiaha e hauti* ia oe. Ia poihâ oe, a haere i te mau farii pape e a inu i ta te mau tane apî i huti mai.” 10  Tuturi ihora oia, piˈo ihora i raro e parau atura: “No te aha oe e hiˈo maitai mai ai ia ˈu? Eaha hoi oe e haapao ai ia ˈu, e vahine no te hoê nunaa ê hoi au?”+ 11  Pahono maira Boaza: “Ua faatiahia mai ia ˈu te mau mea atoa ta oe i rave no to metua vahine hoovai i muri iho i te poheraa ta oe tane faaipoipo, e to oe vaiihoraa i to metua tane e to metua vahine e te fenua o to fetii no te haere i te hoê nunaa ta oe i ore i matau.+ 12  Ia haamaitai Iehova ia oe no ta oe i rave,+ e ia fanaˈo oe i te hoê faahoˈiraa tia roa* no ǒ mai ia Iehova te Atua o Iseraela, tei raro aˈe hoi i to ˈna pererau oe i te imiraa i te haapuraa.”+ 13  Parau atura Ruta: “Ia hiˈo maitai noa mai oe ia ˈu, ta ˈu fatu, ua tamahanahana hoi oe ia ˈu e ua paraparau oe ma te mǎrû i* to tavini, noa ˈtu e ere au hoê o ta oe mau tavini.” 14  Na ô maira Boaza ia ˈna i te taime tamaaraa: “A haere mai i ǒ nei, a amu maa faraoa, e a faarari i ta oe tâpû faraoa i roto i te vineta.” Parahi ihora ïa o ˈna i pihai iho i te feia ooti. Horoa maira Boaza maa huero maa tunu paa na ˈna, amu ihora o ˈna e paia ˈtura, e ua toe mai ta ˈna maa. 15  I to Ruta tiaraa no te ohi haere,+ faaue maira Boaza i ta ˈna mau tavini tane apî: “A vaiiho ia ˈna ia ohi haere i te peenave huero maa tâpûhia,* e eiaha e rave ino ia ˈna.+ 16  Mea tano atoa ia rave outou maa peenave huero maa na ˈna mai roto mai i te mau ruru e a vaiiho atu ia ohi haere o ˈna, e eiaha e parau atu i te tahi mea e faaea ˈi oia i te ohi haere.” 17  No reira, ohi haere noa ˈtura oia i roto i te faaapu e po noa ˈtura.+ I to ˈna tairiiriraa i ta ˈna i ohi haere, piri i te hoê epha* kerite tei noaa mai. 18  Rave ihora oia i te reira e haere atura i te oire. Ite atura to ˈna metua vahine hoovai eaha ta ˈna i ohi haere. Tatara atoa maira Ruta i te maa aita i pau+ ia ˈna i te amu e horoa ˈtura na ˈna. 19  Na ô maira to ˈna metua vahine hoovai ia ˈna: “Ihea roa oe i te ohi-haere-raa i teie mahana? Ihea roa oe i te ohiparaa? Ia haamaitaihia tei hiˈo maitai mai ia oe.”+ Parau atura oia i to ˈna metua vahine hoovai i roto i ta vai faaapu o ˈna i te ohiparaa: “O Boaza te iˈoa o te tane na ˈna te faaapu i roto vau i te ohiparaa i teie mahana.” 20  Na ô maira Naomi i ta ˈna hunoa vahine: “Ia haamaitaihia oia e Iehova, o tei faaite iho â i to ˈna here taiva ore i te feia ora e tei pohe.”+ Na ô â maira Naomi: “E auraa fetii to tâua i teie taata.+ Hoê o na taata teie e tiaraa to ˈna e hoo mai ia tâua.”+ 21  Na ô atura Ruta te vahine ati Moabi: “Ua parau atoa mai oia: ‘A faaea noa i pihai iho i ta ˈu mau tavini apî e ia oti noa ˈtu ia ratou i te ooti i ta ˈu mau faaapu.’”+ 22  Parau maira Naomi ia Ruta ta ˈna hunoa vahine: “Mea maitai aˈe, ta ˈu tamahine, ia haere oe na muri i ta ˈna mau tavini vahine apî, aˈunei oe e rave-ino-hia ˈi i roto i te tahi atu faaapu.” 23  No reira, faaea noa ˈtura oia i pihai iho i te mau tavini vahine apî a Boaza e ohi haere atura e hope noa ˈtu te ootiraa kerite+ e te ootiraa sitona. Parahi noa ˈtura oia i pihai iho i to ˈna metua vahine hoovai.+

Nota i raro i te api

Huri-atoa-hia “ruru kerite.”
Aore ra “haapeapea.”
Aore ra “haamaitairaa rahi.”
Heb: “i te aau o.”
Huri-atoa-hia “ruru kerite.”
Piri i te 22 L. Hiˈo i te tuhaa hau B14.