Te rata i to Philipi 1:1-30
1 O Paulo e o Timoteo, na tavini a te Mesia ra o Iesu, i te feia moˈa atoa tei hoê e te Mesia ra o Iesu e oia atoa i te mau tiaau e te mau tavini tauturu+ i Philipi:+
2 Ei ia outou te hamani maitai rahi e te hau no ǒ mai i te Atua ra to tatou Metua e i te Fatu ra o Iesu Mesia.
3 E haamauruuru noa vau i to ˈu Atua ia manaˈo vau ia outou
4 i roto i ta ˈu mau taparuparuraa atoa no outou paatoa. E taparuparu noa vau ma te oaoa,+
5 no to outou tururaa i* te parau apî oaoa mai te mahana matamua mai â e tae roa mai i teie mahana.
6 Ua papu hoi ia ˈu e e faaoti iho â te Atua i teie ohipa maitai ta ˈna i haamata i rotopu ia outou+ e tae noa ˈtu i te mahana o te Mesia ra o Iesu.+
7 E mea tano iho â ia na reira vau i te manaˈo ia outou atoa, tei roto hoi outou i to ˈu nei aau. Outou hoi tei turu mai ia ˈu i roto i te fare tapearaa+ e oia atoa i te patururaa e te haapapuraa i te parau apî oaoa i mua i te ture.+ No reira ïa outou e o vau iho nei e fanaˈo ai i te hamani maitai rahi o te Atua.
8 O te Atua hoi te ite ra e te hinaaro roa nei au e ite ia outou paatoa no to ˈu here rahi ia outou mai to te Mesia ra o Iesu.
9 E teie ta ˈu e ani noa nei na roto i te pure, ia rahi noa ˈtu â to outou here+ ma te ite mau+ e te haroˈaroˈa i te hinaaro o te Atua.+
10 E ia taa maitai ia outou eaha te mea faufaa roa ˈˈe,+ i reira ïa outou e riro mai ai ei feia viivii ore e te faaturori ore ia vetahi ê+ e tae noa ˈtu i te mahana o te Mesia.
11 E na roto ia Iesu Mesia, ia nehenehe outou ia rave atu â i ta te parau-tia+ e faatupu no te faahanahana e te arue i te Atua.
12 Taeae ma, te hinaaro nei au ia ite outou e ua nuu te ohipa o te parau apî oaoa no ta ˈu i faaruru,
13 ua atutu hoi te parau+ o to ˈu tapearaahia+ no te Mesia i rotopu i te mau tiai atoa a te emepera Roma e te tahi atu mau taata.
14 E teie nei ua puaihia mai te rahiraa o te mau taeae e tavini ra i te Fatu no to ˈu tapearaahia, e ua rahi roa to ratou itoito i te faaiteraa i te parau a te Atua ma te mǎtaˈu ore.
15 Oia mau, mea na roto i te pohehae e te aimârô e poro ai vetahi i te Mesia, te tahi atu râ mea na roto ïa i te aau tae.
16 Mea na roto hoi i te here taua feia nei e faaite haere ai i te Mesia, ua ite hoi ratou e ua faatoroahia vau no te paturu i te parau apî oaoa.+
17 Area te feia matamua, mea na roto ïa i te tatamaˈiraa, no te mau tumu tano ore, te manaˈo ra hoi ratou e haapeapea mai ia ˈu i te fare tapearaa.
18 Eaha ˈtura ïa? Noa ˈtu eaha te tupuraa, ma te haavarevare anei aore ra ma te parau mau, te faaite-haere-hia ra te Mesia, o ta ˈu ïa e oaoa nei. E e tamau noa vau i te oaoa,
19 ua ite hoi au e e ora vau i ta outou taparuparuraa+ e na roto i te fanaˈoraa i te varua o Iesu Mesia.+
20 Te tiai ru nei au e te tiaturi nei au e eita roa vau e haama, no te mea râ te paraparau ra vau ma te mǎtaˈu ore, te faateitei nei au i te Mesia mai ta ˈu i na reira noa na. E faateitei au ia ˈna i to ˈu nei tino, ia ora aore ra ia pohe noa ˈtu vau.+
21 Ia ora vau, e ora vau no te Mesia+ e ia pohe noa ˈtu vau,+ o vau te faufaahia.
22 E teie nei ia ora â vau ei taata, e hotu â ïa ta ˈu ohipa. Ahiri na ˈu e faaoti, eita ïa vau e faaite atu.
23 Te feaapiti nei au, te hinaaro nei hoi au e haere e e parahi e te Mesia,+ o te mea maitai roa ˈˈe ïa.+
24 Tera râ, no to outou maitai e mea faufaa ia ora noa vau.
25 Ua papu ia ˈu te reira, ua ite au e e ora â vau e e apiti noa vau ia outou paatoa ia maitai atu â ta outou taviniraa i te Atua e ia oaoa outou i roto i to outou faaroo,
26 e ia parahi faahou vau i ǒ outou e rahi roa ˈi to outou oaoa no te mea e pǐpǐ outou na te Mesia ra o Iesu.
27 Ia tura noa to outou haerea ia au i te parau apî oaoa no nia i te Mesia,+ e ia haere noa ˈtu vau e hiˈo ia outou aore ra aita anaˈe au i rotopu ia outou, ia faarooroo vau e te mau papu ra outou ma te manaˈo* hoê e ma te aau*+ hoê* i te rohi-amui-raa ia vai noa to outou faaroo i te parau apî oaoa,
28 e eiaha roa e mǎtaˈu i to outou mau enemi. Te haapapu ra teie mau mea atoa e e haamouhia ratou,+ area outou e faaorahia ïa.+ O te Atua te faaite maitai ra i te reira.
29 Mea horoahia mai teie fanaˈoraa taa ê ia outou eiaha noa ia tiaturi outou i te Mesia, ia mauiui atoa râ no ˈna.+
30 Te faaruru nei hoi outou i te hoê â patoiraa e ta ˈu,+ e ua faaroo outou e te faaruru noa ra vau i te reira.
