Iosua 1:1-18
1 I muri iho i te poheraa o Mose te tavini a Iehova, na ô maira Iehova ia Iosua,*+ te tamaiti a Nuna, te tauturu+ a Mose:
2 “Ua pohe ta ˈu tavini o Mose.+ A tia i nia i teie nei, a haere i te tahi atu pae o Ioridana, o oe e teie nunaa taatoa, e a tomo i te fenua ta ˈu e horoa nei no ratou, te nunaa o Iseraela.+
3 E horoa vau no outou i te mau vahi atoa e taahi ai to outou avae mai ta ˈu i fafau ia Mose.+
4 Na te medebara mai to outou tuhaa fenua e tae roa i Lebanona e i te anavai rahi, o Eupharate, pauroa te fenua o te ati Heta,+ e tae roa i te miti Rahi* i te pae tooa o te râ.*+
5 Aita roa e taata e nehenehe e patoi ia oe a ora noa ˈi oe.+ Mai ta ˈu i rave ia Mose, e na reira atoa vau ia oe.+ Eita vau e taiva ia oe, eita atoa vau e faarue ia oe.+
6 Ia itoito e ia puai oe,+ na oe hoi e faafatu i teie nunaa i te fenua ta ˈu i horeo i to ratou mau tupuna e horoa no ratou.+
7 “Oia mau, ia itoito e ia puai oe, e a haapao maitai i te Ture taatoa ta Mose ta ˈu tavini i faaue ia oe. Eiaha e fariu ê i te reira i te pae atau aore ra i te pae aui,+ ia ohipa noa oe ma te paari i te mau vahi atoa ta oe e haere.+
8 Eiaha teie buka o te Ture ia atea ê i to oe vaha.+ E taio maitai* oe i te reira i te po e te ao, ia haapao maitai oe i te mau parau atoa i papaihia i roto.+ I reira ïa oe e manuïa ˈi i roto i to oe oraraa e e ohipa ˈi oe ma te paari.+
9 E ere anei na ˈu i faaue ia oe? Ia itoito e ia puai oe. Eiaha e riaria aore ra e mǎtaˈu, tei ia oe ra hoi Iehova to Atua i te mau vahi atoa ta oe e haere.”+
10 Poroi atura Iosua i te feia toroa o te nunaa:
11 “A haere na roto i te puhapa e a faaue i te nunaa: ‘A faaineine i te maa na outou, no te mea i roto e toru mahana, e na roto atu outou i te pape Ioridana no te tomo e no te fatu i te fenua ta Iehova to outou Atua e horoa nei no outou ia fatu.’”+
12 Na ô atura Iosua i te ati Reubena, te ati Gada e te afaraa o te opu o Manase:
13 “A haamanaˈo i ta Mose te tavini a Iehova i faaue ia outou:+ ‘Ua horoa Iehova to outou Atua i te faafaaearaa no outou e ua horoa ˈtu i teie fenua.
14 E parahi ta outou mau vahine faaipoipo, ta outou mau tamarii e ta outou mau animara i te fenua ta Mose i horoa no outou i teie pae mai* o Ioridana.+ Area outou pauroa te aito puai,+ a faaineine ia outou no te aroraa e a haere i te tahi atu pae na mua i to outou mau taeae.+ E tauturu outou ia ratou
15 e ia horoa roa mai Iehova i te faafaaearaa no to outou mau taeae, mai ta ˈna i horoa no outou, e e fatu atoa ratou i te fenua ta Iehova to outou Atua e horoa nei no ratou. I reira outou e hoˈi ai i te fenua i horoahia ia parahi e ia fatu outou, te fenua ta Mose te tavini a Iehova i horoa no outou i te pae hitia o te râ o Ioridana.’”+
16 Pahono maira ratou ia Iosua: “E rave matou i te mau parau atoa ta oe i faaue, e e haere matou i te mau vahi atoa e tono ai oe ia matou.+
17 Mai ia matou i faaroo i te mau parau atoa a Mose, e na reira atoa matou i te faaroo ia oe. Ei pihai iho noa Iehova to Atua ia oe mai ia ˈna i pihai iho noa na ia Mose.+
18 E haapohehia+ te taata atoa e orure hau i ta oe faaueraa e te ore e faaroo i te mau faaueraa atoa ta oe e horoa ia ratou. Oia mau, ia itoito e ia puai oe.”+
Nota i raro i te api
^ Aore ra “Iehosua,” “E faaoraraa Iehova” te auraa.
^ Oia hoi Mediteranea.
^ Aore ra “toparaa o te mahana.”
^ Aore ra “taio mǎrû,” “feruriruri.”
^ Oia hoi te pae hitia o te râ.
