Ieremia 7:1-34
7 Teie te parau a Iehova tei tae mai ia Ieremia:
2 “A tia i te uputa o te fare o Iehova e a poro i reira i teie poroi: ‘A faaroo i te parau a Iehova, outou pauroa te nunaa o Iuda e tomo ra na teie mau uputa no te piˈo i mua ia Iehova.
3 Teie ta Iehova o te mau nuu,* te Atua o Iseraela, e parau ra: “A faatitiaifaro i to outou haerea e ta outou mau ohipa, e e vaiiho vau ia outou ia parahi â i teie vahi.+
4 Eiaha e tiaturi i te mau parau haavare e eiaha e parau: ‘Teie* te hiero o Iehova, te hiero o Iehova, te hiero o Iehova!’+
5 Ia faatitiaifaro mau â outou i to outou haerea e ta outou mau ohipa, ia paturu mau â outou i te parau-tia ia haavahia te tahi taata e to ˈna taata tupu,+
6 ia ore outou e haavî i te taata ěê e noho ra i rotopu ia outou, te otare* e te vahine ivi,+ ia ore outou e haamanii i te toto hara ore i teie vahi, e ia ore outou e pee i te tahi atu mau atua a fifi hoi outou,+
7 e vaiiho ïa vau ia outou ia parahi â i teie vahi, i teie fenua ta ˈu i horoa no to outou mau tupuna e a muri noa ˈtu.”’”*
8 “Te tiaturi nei râ outou i te mau parau haavare,+ eita roa ˈtu outou e faufaahia i te reira.
9 Mea tia anei ia eiâ+ outou, ia haapohe i te taata, ia faaturi, ia horeo i te parau haavare,+ ia pûpû i te tusia* ia Baala,+ ia pee i te mau atua aita outou i matau,
10 a haere mai ai i muri iho e tia i mua ia ˈu i roto i teie fare tei mairihia i to ˈu iˈoa e a na ô ai: ‘E faaorahia matou,’ noa ˈtu teie mau mea faufau atoa ta outou e rave ra?
11 Te hiˈo ra anei outou i teie fare tei mairihia i to ˈu iˈoa ei ana no te eiâ?+ Tera hoi ta ˈu e ite ra,” te parau ra Iehova.
12 “‘Tera râ, a haere i teie nei i to ˈu nao* i Silo,+ i reira to ˈu haamauraa i to ˈu iˈoa no te taime matamua,+ e a hiˈo eaha ta ˈu i rave i to ˈu nao no te ino o to ˈu nunaa o Iseraela.+
13 Ua tamau noa râ outou i te rave i teie mau mea atoa,’ te parau ra Iehova, ‘e noa ˈtu ua paraparau noa â vau ia outou,* aita outou i faaroo.+ Ua tamau noa vau i te pii ia outou, aita râ outou i pahono mai.+
14 No reira, mai ta ˈu iho â i rave ia Silo,+ e na reira atoa vau i te fare tei mairihia i to ˈu iˈoa+ e ta outou e tiaturi ra,+ e i teie vahi ta ˈu i horoa no outou e no to outou mau tupuna.
15 E tiahi au ia outou mai mua i to ˈu aro, mai ta ˈu iho â i tiahi i to outou mau taeae atoa, pauroa te huaai o Epheraima.’+
16 “O oe râ, eiaha e pure no teie nunaa. Eiaha e tiaoro mai, e pure mai aore ra e taparuparu mai ia ˈu no ratou,+ eita hoi au e faaroo ia oe.+
17 Aita anei oe e ite ra i ta ratou e rave ra i roto i te mau oire o Iuda e na te mau aroâ o Ierusalema?
18 Te ohi ra te mau tamarii i te vahie, te tutui ra te mau metua tane i te auahi, te ôi ra te mau vahine faaipoipo i te faraoa no te hamani i te pane ei tusia na te Arii vahine o te raˈi,*+ e te ninii ra ratou i te tusia uaina na te tahi atu mau atua no te faainoino ia ˈu.+
19 ‘O vau anei râ ta ratou e haamauiui* ra?’ te parau ra Iehova. ‘E ere anei o ratou iho, a haama ˈtu ai ratou?’+
20 Teie ïa ta te Arii hau ê e Fatu ra o Iehova e parau ra: ‘Inaha, e manii atu to ˈu riri e to ˈu riri rahi tahoo i nia i teie vahi,+ i nia i te taata e te animara, i nia i te tumu raau o teie fenua e te maa o te repo. E ura to ˈu riri e eita e pohe.’+
21 “Teie ta Iehova o te mau nuu, te Atua o Iseraela, e parau ra: ‘A haere a apiti i ta outou mau tusia taauahi taatoa i ta outou mau tusia ê atu, e a amu i te reira.+
22 I te mahana hoi a aratai mai ai au i to outou mau tupuna i rapae i te fenua o Aiphiti, aita vau i parau aore ra i faaue i te tahi mea ia ratou no nia i te mau tusia taauahi taatoa e te tahi atu mau tusia.+
23 Teie râ ta ˈu i faaue ia ratou: “A faaroo i to ˈu reo, e e riro vau ei Atua no outou, e e riro outou ei nunaa no ˈu.+ Ia haere outou na te eˈa ta ˈu e faaite ia outou, ia maitai hoi outou.”’+
24 Aita râ ratou i faaroo aore ra i fariu mai i to ratou tariˈa.+ Ua haapao ratou i ta ratou iho mau opuaraa,* a onoono ai i te pee i to ratou aau ino,+ e ua otohe ratou, aita i haere i mua,
25 mai te mahana mai â i haere mai ai to outou mau tupuna i rapae i te fenua o Aiphiti tae roa mai i teie mahana.+ Ua tamau noa ïa vau i te tono i ta ˈu mau tavini atoa te mau peropheta ia outou ra, a tono noa ˈi ia ratou i tera e tera mahana.*+
26 Aita râ ratou i hinaaro e faaroo ia ˈu, e aita i fariu mai i to ratou tariˈa.+ Ua haapaari ratou,* e ua rave i te ohipa ino aˈe i ta to ratou mau tupuna!
27 “E parau iho â oe i teie mau parau atoa ia ratou,+ eita râ ratou e faaroo ia oe. E pii iho â oe ia ratou, eita râ ratou e pahono ia oe.
28 E e na ô oe ia ratou: ‘Teie te nunaa aita i faaroo i te reo o Iehova to ratou Atua e aita i farii i ta ˈna aˈo. Ua moˈe te haapao maitai e aita atoa ratou i faahiti i te reira.’*+
29 “A tâpû haapoto roa ino i to oe rouru aita i tâpûhia aˈenei* e a faarue atu, e i nia i te mau aivi ruperupe ore a himene i te tahi himene oto, aita hoi Iehova i hinaaro faahou i teie uˈi tei faariri ia ˈna e e faarue oia ia ratou.
30 ‘Ua rave hoi te nunaa o Iuda i te mea ino i to ˈu aro,’ te parau ra Iehova. ‘Ua tuu ratou i ta ratou mau idolo faufau i roto i te fare tei mairihia i to ˈu iˈoa, no te haaviivii i te reira.+
31 Ua patu ratou i te mau vahi teitei o Topheta, tei te peho o te Tamaiti a Hinoma,*+ no te tanina i ta ratou mau tamaiti e ta ratou mau tamahine,+ e ohipa ta ˈu i ore i faaue e tei ore i tupu aˈenei i roto i to ˈu aau.’*+
32 “‘No reira,’ te parau ra Iehova, ‘inaha te haere mai ra te mau mahana e ore ai teie vahi e parau-faahou-hia o Topheta aore ra te peho o te Tamaiti a Hinoma,* te peho râ o te taparahi-pohe-raa. E hunahia te taata pohe i Topheta haapao apǐ roa.+
33 E e riro te tino pohe o teie nunaa ei maa na te mau manu o te raˈi e na te mau animara o te fenua, aita hoê e faariaria ia ratou.+
34 E faaore au i te tutuô o te popou e o te oaoa, te reo o te tane faaipoipo-apî-hia e te reo o te vahine faaipoipo-apî-hia,+ i roto i te mau oire o Iuda e na te mau aroâ o Ierusalema, e faaanohia hoi teie fenua.’”+
Nota i raro i te api
^ Aore ra “sabaota.”
^ Oia hoi te taatoaraa o te paturaa o te hiero.
^ Aore ra “tamarii aita e metua tane.”
^ Aore ra “mai tahito mai e a muri noa ˈtu.”
^ Aore ra “tusia au auahi.”
^ Heb: “ua paraparau vau ia outou, a tia ˈi i te poipoi roa e a paraparau atu ai.”
^ Tiaraa o te hoê ruahine haamorihia e te ati Iseraela taiva. E ruahine paha o te faahapû i te mau vahine.
^ Aore ra “faainoino,” “faatihaehae.”
^ Aore ra “aˈoraa.”
^ Heb: “a tia ˈi i te poipoi roa pauroa te mahana e a tono ai ia ratou.”
^ Heb: “Ua faaetaeta ratou i to ratou aˈî.”
^ Heb: “e ua faaorehia te reira mai roto mai i to ratou vaha.”
^ Aore ra “rouru pûpûhia.”
^ Aore ra “feruriraa.”
