Ieremia 37:1-21
37 E haamata ihora te arii Zedekia+ te tamaiti a Iosia i te faatere ei mono ia Konia*+ te tamaiti a Iehoiakima, ua faariro hoi Nebukanesa te arii o Babulonia ia ˈna ei arii no te fenua o Iuda.+
2 Aita râ oia, ta ˈna mau tavini e te mau taata o te fenua i faaroo i te mau parau ta Iehova i faahiti na roto ia Ieremia te peropheta.
3 E tono ihora te arii Zedekia ia Iehukala+ te tamaiti a Selemia e ia Zephania+ te tamaiti a Maaseia te tahuˈa ia Ieremia te peropheta no te parau atu: “A pure na ia Iehova to tatou Atua no tatou.”
4 Te haere noa ra Ieremia ma te tiamâ na rotopu i te nunaa, aita â hoi oia i tuuhia ˈtura i roto i te fare tapearaa.+
5 Ua tere mai hoi te nuu a Pharao mai Aiphiti mai.+ I to te mau Kaladaio o te haaati ra ia Ierusalema faarooraa i te reira, faarue maira ratou ia Ierusalema.+
6 Tae maira ïa te parau a Iehova ia Ieremia te peropheta e na ô ra:
7 “Teie ta Iehova te Atua o Iseraela e parau ra: ‘Teie ta orua e parau i te arii o Iuda o tei tono mai ia orua e uiui ia ˈu: “Inaha, te nuu a Pharao o te haere mai ra e tauturu ia outou, e hoˈi ïa i to ˈna fenua, o Aiphiti.+
8 E e hoˈi mai te mau Kaladaio, e aro, e haru e e tanina i teie oire.”+
9 Teie ta Iehova e parau ra: “Eiaha outou e haavare ia outou iho a na ô ai: ‘E haere ê iho â te mau Kaladaio ia tatou nei,’ no te mea eita ratou e haere ê.
10 Noa ˈtu e tairi outou i te nuu taatoa a te mau Kaladaio o te aro ra ia outou e o to ratou noa mau taata pepe te toe mai, e tia mai taua mau taata ra mai roto mai i to ratou mau fare ie e e tanina ratou i teie oire.”’”+
11 I to te nuu Kaladaio faarueraa mai ia Ierusalema no te nuu a Pharao,+
12 hinaaro ihora Ieremia e haere mai Ierusalema mai i te fenua o Beniamina+ no te fanaˈo i ta ˈna tuhaa i reira i rotopu i to ˈna nunaa.
13 I to ˈna râ taeraa i te Uputa o Beniamina, haru ihora te tiai tiaau, o Iriia te iˈoa te tamaiti a Selemia te tamaiti a Hanania ia Ieremia te peropheta e na ô maira: “Te horo ra oe i ǒ te mau Kaladaio!”
14 Na ô atura râ Ieremia: “Ua hape oe! Aita vau e horo ra i ǒ te mau Kaladaio.” Aita râ Iriia i faaroo ia ˈna. Tapea ihora ïa oia ia Ieremia e aratai ihora ia ˈna i te huiarii ra.
15 Ua riri te huiarii ia Ieremia,+ e tairi aˈera ratou ia ˈna e tapea ˈtura ia ˈna+ i roto i te tapearaa* i roto i te fare o Iehonatana te papai parau, tei faarirohia ei fare tapearaa.
16 Ua tuuhia Ieremia i roto i te piha tapearaa* i roto hoê o na piha i raro i te fenua, e e rave rahi mahana to ˈna faaearaa i reira.
17 Faaue ihora te arii Zedekia ia tiihia Ieremia, e uiui omoˈe atura te arii ia ˈna i roto i to ˈna aorai.*+ Ui atura oia: “Ua paraparau anei Iehova ia oe?” Pahono maira Ieremia: “E!” e na ô faahou maira: “E tuuhia oe i te rima o te arii o Babulonia!”+
18 Na ô atoa maira Ieremia i te arii Zedekia: “Eaha ta ˈu hara i rave ia oe, i ta oe mau tavini e i teie nunaa, i tuuhia ˈi au i roto i te fare tapearaa?
19 Teihea ˈtura ïa ta outou mau peropheta tei tohu ia outou: ‘Eita te arii o Babulonia e aro mai ia outou e i teie fenua’?+
20 I teie nei, a faaroo mai na, e to ˈu fatu te arii. A farii na i ta ˈu taparuparuraa. Eiaha e faahoˈi ia ˈu i te fare o Iehonatana+ te papai parau, a pohe au i ǒ.”+
21 Faaue ihora ïa te arii Zedekia ia tapeahia Ieremia i roto i te Aua tiairaa,+ e pauroa te mahana e horoahia na ˈna hoê tâpû faraoa no ǒ mai i te aroâ o te feia eu faraoa,+ haapao pau roa te faraoa i roto i te oire.+ E faaea noa ihora Ieremia i roto i te Aua tiairaa.
Nota i raro i te api
^ Piihia Iehoiakina e Iekonia.
^ Heb: “huri atura ia ˈna i roto i te fare o te fifi auri.”
^ Heb: “te fare o te tura pape.”
^ Heb: “fare.”
