Ieremia 12:1-17
12 Mea parau-tia oe, e Iehova,+ ia autâ vau ia oe ra,Ia paraparau vau ia oe no nia i te parau-tia.
No te aha râ te eˈa o te feia ino e manuïa ˈi,+E no te aha te feia taiva e ore ai e haapeapea?
2 Ua tanu oe ia ratou, e ua tupu to ratou aˈa.
Ua tupu ratou e ua hotu.
Te faahiti noa nei ratou ia oe, mea atea râ to ratou aau* ia oe.+
3 Ua matau maitai râ oe ia ˈu, e Iehova,+ te ite mai ra oe ia ˈu.Ua hiˈopoa oe i to ˈu aau e ua ite oe no oe anaˈe to ˈu aau.+
A faataa ê ia ratou mai te mamoe te tupaihia,E a tuu ia ratou i te hiti no te mahana o te haapoheraa.
4 Ehia â maororaa e ino ai te fenuaE e mǎrô roa ˈi te aihere o te mau faaapu atoa?+
No te ino o te feia e parahi ra i nia iho,Ua faaorehia te mau animara e te mau manu.
Ua parau hoi ratou: “Eita oia e ite mai i tei roohia e matou.”
5 Mai te peu e rohirohi oe ia horo e te taata,E nafea oe e nehenehe ai e faatitiaua e te puaahorofenua?+
Noa ˈtu eita oe e taiâ i te fenua o te hau,E nafea oe e na roto atu ai i te mau uru aihere meumeu na te hiti Ioridana?
6 To oe atoa hoi mau taeae, te utuafare o to oe metua tane,Tei taiva ia oe.+
Ua pii ratou ia oe ma te reo puai.
Eiaha e tiaturi ia ratou,Noa ˈtu e parau maitai ta ratou ia oe.
7 “Ua faarue au i to ˈu fare.+ Ua haapae au i ta ˈu tuhaa.+
Ua tuu vau i to ˈu hoa here i te rima o to ˈna mau enemi.+
8 Ua riro ta ˈu tuhaa no ˈu mai te hoê liona i roto i te uru raau.
Ua uuru oia ia ˈu.
No reira vau i hae ai ia ˈna.
9 E au ta ˈu tuhaa no ˈu mai te hoê manu aˈuaˈu animara û rau.*E haaati te tahi atu mau manu aˈuaˈu animara ia ˈna e e aˈuaˈu ia ˈna.+
A haere mai, a haaputuputu mai, outou pauroa te animara o te fenua,A haere mai a amu ia ˈna.+
10 E rave rahi tiai mamoe tei vavahi i ta ˈu faaapu vine.+Ua taataahi ratou i to ˈu tuhaa fenua.+
Ua faariro ratou i to ˈu tuhaa fenua nehenehe mau ei fenua pâpâmǎrô taata ore.
11 Ua riro te reira ei fenua tuinohia.
Ua mǎrô* te fenua.E vai taata ore te reira i mua ia ˈu.+
Ua faarirohia teie fenua taatoa ei fenua taata ore,Aita râ hoê e tâuˈa ra.+
12 Na te mau eˈa atoa na roto i te medebara i tae mai ai te feia haamou,Te pau ra hoi te fenua i te ˈoˈe a Iehova mai te hoê otia fenua e tae atu i te tahi atu otia.+
Aita hoê taata e ora hau noa.
13 E sitona ta ratou i ueue, e raau taratara râ ta ratou i ooti.+
Ua tautoo ratou i te ohipa, no te faufaa ore râ.
E haama ratou i ta ratou mau hotuNo te riri ura o Iehova.”
14 Teie ta Iehova e parau ra i to ˈu mau taata tupu ino atoa, o te hauti nei i te tuhaa ta ˈu i faafatu i to ˈu nunaa Iseraela:+ “Teie au e iriti tumu nei ia ratou mai nia mai i to ratou fenua,+ e e iriti au i te nunaa o Iuda mai rotopu ia ratou.
15 Ua iriti tumu anaˈe râ vau ia ratou, e aroha hamani maitai faahou vau ia ratou e e faahoˈi ia ratou tataitahi i ta ˈna tuhaa e to ˈna fenua.”
16 “E ia haapii mau â ratou i te haerea o to ˈu nunaa e ia horeo i to ˈu ora, a na ô ai: ‘Te horeo nei au i te ora o Iehova!’ mai ta ratou iho â i haapii i to ˈu nunaa ia horeo i te iˈoa o Baala, i reira e horoahia ˈi te hoê vahi no ratou i rotopu i to ˈu nunaa.
17 Ia ore râ ratou ia hinaaro e faaroo, e iriti tumu atoa vau i tera nunaa, e iriti tumu e e haamou roa vau ia ratou,” te parau ra Iehova.+
Nota i raro i te api
^ Aore ra “huru aau hohonu roa ˈˈe.” Heb: “mape.”
^ Aore ra “purepure.”
^ Huri-atoa-hia “Te oto ra.”
