Ezera 9:1-15
9 E i te otiraa iho â taua mau ohipa ra, tapiri maira te huiarii ia ˈu e parau maira: “Aita te nunaa o Iseraela e te mau tahuˈa e te ati Levi i faataa ê ia ratou i te mau nunaa o te mau fenua e ta ratou mau peu hairiiri,+ ta te ati Kanaana, te ati Heta, te ati Perizi, te ati Iebusi, te ati Amona, te ati Moabi, to Aiphiti+ e te ati Amori.+
2 Ua rave ratou vetahi o ta ratou mau tamahine ei vahine faaipoipo na ratou iho e ta ratou mau tamaiti.+ Ua amui ratou, te huaai moˈa,+ i te mau nunaa o te mau fenua.+ O te huiarii e te huitoofa na mua tei rave i teie ohipa taiva.”
3 I te faarooraa iho â vau i te reira, hahae ihora vau i to ˈu ahu e to ˈu pereue aita e rima, hutihuti ihora vau i to ˈu rouru e to ˈu huruhuru taa, e parahi ihora vau ma te ahoaho.
4 Putuputu aˈera te taata atoa tei faatura i* te mau parau a te Atua o Iseraela ati aˈe ia ˈu no te taivaraa te nunaa tei hopoi-ê-hia, a parahi ai au ma te ahoaho tae roa i te pûpûraa tusia huero maa o te ahiahi.+
5 I te taime o te pûpûraa tusia huero maa o te ahiahi,+ i muri aˈe i te faahaehaaraa vau ia ˈu, tia aˈera vau, ua mahae to ˈu ahu e to ˈu pereue aita e rima, tuturi ihora vau e hohora ihora i to ˈu rima ia Iehova to ˈu Atua.
6 Parau ihora vau: “E to ˈu Atua, te haama nei e te huru ê nei au i te fariu i to ˈu aro ia oe, e to ˈu Atua, ua rahi hoi ta matou mau hape i nia i to matou upoo e ua tae roa ta matou hapa i nia i te raˈi.+
7 Mai te mau mahana mai â o to matou mau tupuna tae roa mai i teie mahana ua rahi ta matou hapa,+ e no ta matou mau hape, ua tuuhia matou, to matou mau arii e to matou mau tahuˈa i te rima o te mau arii o te mau fenua, i te ˈoˈe,+ i te hopoi-ê-raa,+ i te eiâraa+ e i te haama, mai i teie mahana.+
8 I teie nei râ no te hoê taime poto, ua hamani maitai mai oe ia matou, e Iehova to matou Atua, a vaiiho ai i te tahi toea ia ora ˈtu e a horoa mai ai i te tahi vahi papu* i roto i to oe vahi moˈa,+ no te faaanaana i to matou mata, e to matou Atua, e no te faaoraora rii ia matou i to matou faatîtîraahia.
9 Noa ˈtu hoi e tîtî matou,+ aita oe, to matou Atua, i faarue ia matou i to matou faatîtîraahia. Ua faarahi râ oe i to oe here taiva ore ia matou i mua i na arii no Peresia,+ no te faaoraora ia matou no te patu faahou i te fare o to matou Atua,+ no te faatia faahou i to ˈna pueraa repo e no te horoa mai i te tahi aua ofai* i Iuda e i Ierusalema.
10 “I teie nei râ eaha ta matou e nehenehe e parau, e to matou Atua, i muri iho i tera ohipa? Ua faarue hoi matou i ta oe mau faaueraa,
11 ta oe i horoa mai na roto i to mau tavini te mau peropheta, a na ô ai: ‘Te fenua ta outou e fatu, e fenua viivii ïa no te viivii o te mau nunaa o te mau fenua, no ta ratou mau peu hairiiri, i î ai taua fenua ra i to ratou viivii+ mai te tahi otia i te tahi otia.
12 No reira, eiaha e horoa i ta outou mau tamahine na ta ratou mau tamaiti, eiaha atoa e farii i ta ratou mau tamahine na ta outou mau tamaiti,+ e eiaha roa e imi i te hau e te maitai no ratou,+ ia nehenehe outou e puaihia mai a amu atu ai i te mau mea maitatai o te fenua a fatu atu ai i te reira no ta outou mau tamarii e a muri noa ˈtu.’
13 E i teie nei ua roohia matou i teie mau mea atoa no ta matou mau ohipa ino e ta matou hapa rahi, aita hoi oe, e to matou Atua, i rave ia matou ia au i ta matou hape,+ e ua vaiiho oe ia matou ia ora ˈtu.+
14 Ia ofati faahou anei ïa matou i ta oe mau faaueraa e e taati anei matou na roto i te faaipoiporaa* i te mau nunaa e rave ra i teie mau mea hairiiri?+ Eita anei oe e riri roa ia matou a haamou roa ˈi ia matou, a ore atu ai e vaiiho i te tahi ia toe aore ra ia ora ˈtu?
15 E Iehova te Atua o Iseraela, mea parau-tia oe,+ ua ora mai hoi matou ei toea tae roa mai i teie mahana. Teie matou i mua ia oe i roto i ta matou hapa, eita hoi e nehenehe e tia i mua ia oe no te reira.”+
Nota i raro i te api
^ Heb: “tei rûrû no.”
^ Heb: “naero rahi.”
^ Aore ra “aua paruru.”
^ Aore ra “e faaipoipo anei matou te tahi i te tahi.”
