Ezera 8:1-36
8 E teie te mau upoo o te mau utuafare e te feia tapaohia ia au i te pǎpǎraa tupuna o tei pauma na muri ia ˈu mai Babulonia mai a faatere ai te arii Aretehasaseta:+
2 no te mau tamaiti a Phinehasa,+ o Geresoma, no te mau tamaiti a Itamara,+ o Daniela, no te mau tamaiti a Davida, o Hatusa,
3 no te mau tamaiti a Sekania, no te mau tamaiti a Parosa, o Zekaria, e na muri ia ˈna, 150 tane tei tapaohia,
4 no te mau tamaiti a Pahata-moabi,+ o Elieho-enai te tamaiti a Zerahia, e 200 tane na muri ia ˈna,
5 no te mau tamaiti a Zatu,+ o Sekania te tamaiti a Iahaziela, e 300 tane na muri ia ˈna,
6 no te mau tamaiti a Atina,+ o Ebeda te tamaiti a Ionatana, e 50 tane na muri ia ˈna,
7 no te mau tamaiti a Elama,+ o Iesaia te tamaiti a Atalia, e 70 tane na muri ia ˈna,
8 no te mau tamaiti a Sephatia,+ o Zebadia te tamaiti a Mihaela, e 80 tane na muri ia ˈna,
9 no te mau tamaiti a Ioaba, o Obadia te tamaiti a Iehiela, e 218 tane na muri ia ˈna,
10 no te mau tamaiti a Bani, o Selomita te tamaiti a Iosiphia, 160 tane na muri ia ˈna,
11 no te mau tamaiti a Bebai,+ o Zekaria te tamaiti a Bebai, e 28 tane na muri ia ˈna,
12 no te mau tamaiti a Azagada,+ o Iohanana te tamaiti a Hakatana, e 110 tane na muri ia ˈna,
13 no te mau tamaiti a Adonikama,+ o ratou te hopea, e teie to ratou iˈoa: Eliphaleta, Ieiela e Semaia, e 60 tane na muri ia ratou,
14 e no te mau tamaiti a Bigavai,+ Utai raua Zabuda, e 70 tane na muri ia raua.
15 Haaputuputu ihora vau ia ratou i te anavai e tahe ra i Ahava,+ e puhapa ihora matou i reira e toru mahana. I to ˈu râ hiˈopoaraa i te mau taata e te mau tahuˈa, aita vau i ite mai i te tahi ati Levi.
16 Faaue atura vau e tii ia Eliezera, Ariela, Semaia, Elenatana, Iariba, Elenatana, Natana, Zekaria e Mesulama, e tane aratai ratou, e ia Ioiariba e Elenatana, e orometua raua.
17 Horoa ˈtura vau i te hoê faaueraa no nia ia Ido te aratai i te vahi piihia Kasiphia. Ua parau vau ia ratou e parau ia Ido e to ˈna mau taeae, te mau tavini o te hiero* i Kasiphia, ia hopoi mai ia matou ra i te tahi mau tavini no te fare o to tatou Atua.
18 I te mea tei ia matou ra to matou Atua hamani maitai, hopoi maira ratou hoê tane haroˈaroˈa no te mau tamaiti a Maheli+ te mootua a Levi te tamaiti a Iseraela, oia hoi Serebia+ e ta ˈna mau tamaiti e to ˈna mau taeae, 18 tane,
19 e Hasabia, e o Iesaia tei na muri ia ˈna no te mau tamaiti a Merari,+ to ˈna mau taeae e ta ratou mau tamaiti, e 20 tane.
20 E e 220 tavini o te hiero,* ta Davida e te huiarii i horoa no te taviniraa a te ati Levi, ua faahitihia ratou pauroa i to ratou iˈoa.
21 Poroi atura vau i te hoê haapaeraa maa i reira i te anavai Ahava, no te faahaehaa ia matou i mua i to tatou Atua, no te imi i ta ˈna aratairaa no to matou tere, no matou, ta matou mau tamarii e pauroa ta matou faufaa.
22 E haama vau i te ani i te arii i te faehau e te feia faahoro puaahorofenua no te paruru ia matou i te mau enemi na nia i te purumu, no te mea ua parau matou i te arii: “Tei te feia atoa e imi ra ia ˈna to matou Atua hamani maitai,+ tei nia râ to ˈna puai e to ˈna riri i te feia atoa e faarue ra ia ˈna.”+
23 Haapae aˈera ïa matou i te maa e ani aˈera i to tatou Atua i te aratairaa no to matou tere, e faaroo maira oia i ta matou taparuraa.+
24 Faataa ˈtura vau 12 no roto i te mau tahuˈa aratai, oia hoi Serebia raua Hasabia,+ e 10 o to raua mau taeae.
25 Faito atura vau no ratou i te ario e te auro e te mau taihaa, te ô ta te arii, to ˈna mau taata aˈo, to ˈna huiarii e pauroa te ati Iseraela i reira i pûpû no te fare o to tatou Atua.+
26 Faito e horoa ˈtura ïa vau 650 taleni* ario ia ratou, 100 taihaa ario e piti taleni, 100 taleni auro,
27 20 auˈa auro nainai 1 000 darekona,* e 2 taihaa veo maitai roa e te uteute anaana, mai te auro ra te faufaa.
28 Parau atura vau ia ratou: “Mea moˈa outou no Iehova,+ e mea moˈa te mau taihaa, e e ô horoa noa te ario e te auro na Iehova te Atua o to outou mau tupuna.
29 A tiai maitai i te reira e ia faito-roa-hia i mua i te mau tahuˈa aratai, te ati Levi e te huiarii o te mau utuafare o Iseraela i Ierusalema,+ i roto i te mau piha* o te fare o Iehova.”
30 Rave maira te mau tahuˈa e te ati Levi i te ario, te auro e te mau taihaa tei faitohia no ratou no te hopoi i Ierusalema i te hiero o to tatou Atua.
31 Faarue aˈera matou i te anavai Ahava+ i te 12 o te mahana o te avaˈe matamua+ no te haere i Ierusalema, e tei ia matou ra to tatou Atua, e faaora ihora oia ia matou i te rima o te enemi e tei tamoemoe ia matou na nia i te purumu.
32 Tae maira ïa matou i Ierusalema+ e faaea ihora i reira e toru mahana.
33 E i te maha o te mahana, faito aˈera matou i te ario, te auro e te mau taihaa i roto i te fare o to tatou Atua+ e tuu atura i te reira ia Meremota+ te tamaiti a Urîa te tahuˈa, e tei ia ˈna ra o Eleazara te tamaiti a Phinehasa, e tei ia raua ra na ati Levi Iosabada+ te tamaiti a Iesua e Noadia te tamaiti a Binui.+
34 Ua taiohia e ua faitohia te mau mea atoa, e ua papaihia te mau faito atoa.
35 Hopoi aˈera te feia tei hoˈi mai na te hopoi-ê-raa mai i te tusia taauahi i te Atua o Iseraela, 12 puaatoro oni+ no Iseraela taatoa, 96 mamoe oni,+ 77 fanauˈa mamoe oni, e 12 puaaniho oni+ ei tusia no te hara. E tusia taauahi anaˈe te reira ia Iehova.+
36 Horoa ˈtura matou i te mau faaueraa mana a te arii+ i te mau tavana hau* e te mau tavana o te tuhaa fenua o tera ˈtu pae o te Anavai,*+ paturu maira ratou i te nunaa e horoa maira i te ô no te hiero o te Atua mau.+
Nota i raro i te api
^ Aore ra “Netinimi.” Heb: “tei horoahia.”
^ Aore ra “Netinimi.” Heb: “tei horoahia.”
^ 1 taleni: 34,2 kg. Hiˈo i te tuhaa hau B14.
^ E moni auro no Peresia. Hiˈo i te tuhaa hau B14.
^ Aore ra “piha tamaaraa.”
^ E tiaraa Peresia o “te mau paruru o te fenua o te arii” te auraa. I ǒ nei, o te mau tavana ïa o te mau fenua o te hau emepera Peresia.
^ Oia hoi Eupharate.