Ezera 5:1-17
5 Faahiti aˈera na peropheta Hagai+ e Zekaria+ te mootua a Ido+ i te tahi parau tohu i te ati Iuda e faaea ra i Iuda e i Ierusalema, i te iˈoa o te Atua o Iseraela e aratai ra ia ratou.
2 I reira to Zerubabela+ te tamaiti a Sealatiela e Iesua+ te tamaiti a Iehozadaka haamataraa i te patu faahou i te hiero o te Atua,+ tei Ierusalema. E tei ia raua ra te mau peropheta a te Atua, e te turu ra ia raua.+
3 I tera mau mahana, haere maira Tatenai te tavana o te tuhaa fenua i tera ˈtu pae o te Anavai,* Setara-bozenai e to raua mau apiti e ui maira ia ratou: “Na vai i faaue ia outou e patu i teie fare e e faaoti i teie paturaa?”*
4 E ui maira ratou: “O vai te iˈoa o te mau tane e rave ra i te ohipa i nia i teie paturaa?”
5 Te hiˈo mai ra râ te* Atua i te mau matahiapo o te ati Iuda,+ e aita ˈtura ratou i faaea e ia faatae-roa-hia ˈtu te parau faataa ia Dariu ra a faataehia mai ai te hoê parau mana no nia i te reira.
6 Teie te rata ta Tatenai te tavana o te tuhaa fenua i tera ˈtu pae o te Anavai, Setara-bozenai e to ˈna mau apiti, te tahi atu mau tavana o te tuhaa fenua i tera ˈtu pae o te Anavai, i faatae i te arii Dariu.
7 Ua faatae ratou i te parau faataa ia ˈna, e teie ta ratou i papai:
“I te arii Dariu:
“Ei ia oe na te hau!
8 Ia ite te arii e ua haere matou i te fenua o Iuda i te fare o te Atua rahi, e te patuhia ra te reira i te mau ofai rahi tei turaihia i to ratou vairaa, e te tuuhia ra te raau i roto i te mau patu o te aua. Te rave ra te taata i te ohipa ma te itoito e te nuu maitai ra te ohipa maoti ta ratou mau rohiraa.
9 Ua ui matou i to ratou mau matahiapo: ‘Na vai i faaue ia outou e patu i teie fare e e faaoti i teie paturaa?’*+
10 Ua ani atoa matou i to ratou iˈoa e ua tapao matou i te reira ia ite oe o vai te mau tane e aratai ra i te ohipa.
11 “Teie ta ratou i pahono ia matou: ‘O te mau tavini matou na te Atua o te raˈi e te fenua, e te patu faahou nei matou i te fare tei patuhia e rave rahi matahiti i teie nei, ta te hoê arii rahi no Iseraela i patu e i faaoti.+
12 Tera râ, no te mea ua faatupu to matou mau metua i te riri o te Atua o te raˈi,+ tuu atura oia ia ratou i te rima o te arii Nebukanesa+ no Babulonia, te Kaladaio, tei vavahi i teie fare+ a hopoi ê atu ai i te nunaa i Babulonia.+
13 Tera râ, i te matahiti matamua o te arii Kuro no Babulonia, faaue ihora te arii Kuro ia patu-faahou-hia teie fare o te Atua.+
14 Hau atu â, ua tuu te arii Kuro i rapae i te hiero o Babulonia i te mau farii auro e ario o te fare o te Atua ta Nebukanesa i rave i roto i te hiero i Ierusalema a hopoi atu ai i te hiero o Babulonia.+ Horoahia ˈtura te reira i te hoê tane o Sesebazara*+ te iˈoa, ta Kuro i faatavana.+
15 Parau atura Kuro ia ˈna: “A rave i teie mau farii. A haere a vaiiho i te reira i te hiero i Ierusalema, e ia patu-faahou-hia te fare o te Atua i to ˈna vairaa na mua ˈˈe.”+
16 Tae maira teie Sesebazara, e haamau ihora i te mau niu o te fare o te Atua,+ tei Ierusalema. E patu-noa-hia ˈtura te reira tae roa mai i teie nei, aita â râ i oti atura.’+
17 “Teie nei, ia tia i te arii, ia maimihia i roto i te pueraa taoˈa a te arii i reira i Babulonia, ia itehia mai e ua faaue anei te arii Kuro ia patu-faahou-hia tera fare o te Atua i Ierusalema,+ e ia faataehia mai te faaotiraa a te arii no nia i te reira.”
Nota i raro i te api
^ Oia hoi Eupharate.
^ Aore ra “tamau i teie mau pou.”
^ Ar: “Tei nia râ te mata o to ratou.”
^ Aore ra “tamau i teie mau pou.”
