Ezera 3:1-13

  • Hamani-faahou-hia te fata e pûpûhia te mau tusia (1-7)

  • Haamata te hiero i te hamani-faahou-hia (8, 9)

  • Haamauhia te niu o te hiero (10-13)

3  I te taeraa i te hitu o te avaˈe+ e to roto te ati Iseraela* i to ratou mau oire, amui aˈera ratou pauroa i Ierusalema.  Tia aˈera Iesua+ te tamaiti a Iehozadaka e te tahi atu mau tahuˈa, Zerubabela+ te tamaiti a Sealatiela+ e to ˈna mau taeae, e hamani aˈera i te fata a te Atua o Iseraela, ia nehenehe ratou e pûpû i te tusia taauahi i nia iho, mai tei papaihia i roto i te Ture a Mose+ te taata o te Atua mau.  Faatia aˈera ïa ratou i te fata i to ˈna vairaa na mua ˈˈe, noa ˈtu to ratou mǎtaˈu i te mau nunaa o te mau fenua ati aˈe,+ e pûpû aˈera i nia iho i te mau tusia taauahi ia Iehova, te mau tusia taauahi o te poipoi e to te ahiahi.+  Faatupu aˈera ratou i te Oroa patiaraa tiahapa* ia au i tei papaihia,+ e pûpû aˈera i tera e tera mahana i te rahiraa tusia taauahi faataahia, tei titauhia no te mahana tataitahi.+  I muri iho, pûpû aˈera ratou i te tusia taauahi tamau+ e te mau tusia no te mau avaˈe apî+ e to te mau oroa moˈa atoa+ a Iehova, oia atoa ta te taata atoa tei pûpû i te tusia horoa noa+ ia Iehova ma te aau tae.  Mai te mahana matamua mai â o te hitu o te avaˈe+ to ratou pûpûraa i te tusia taauahi ia Iehova, noa ˈtu aita â te niu o te hiero o Iehova i haamauhia ˈtura.  Horoa aˈera ratou i te moni na te feia tarai ofai+ e te rimaî,+ i te maa, te inu e te hinu na to Sidona e to Turia no te hopoiraa mai i te raau arezi i te uahu o Iopa+ mai Lebanona mai, ia au i te faatiaraa horoahia e te arii Kuro no Peresia ia ratou.+  I te piti o te matahiti i muri aˈe i to ratou taeraa i te hiero o te Atua mau i Ierusalema, i te piti o te avaˈe, haamata aˈera Zerubabela te tamaiti a Sealatiela, Iesua te tamaiti a Iehozadaka, e te toea o to ratou mau taeae, te mau tahuˈa e te ati Levi, e te feia atoa tei tae mai i Ierusalema na te hopoi-ê-raa,+ i te ohipa. Faatoroa aˈera ratou i te ati Levi mai te 20 matahiti e nia ˈtu no te tavini ei tiaau i te ohipa i te hiero o Iehova.  Amui aˈera ïa Iesua, ta ˈna mau tamaiti, to ˈna mau taeae, e Kadamiela e ta ˈna mau tamaiti, te mau tamaiti a Iuda, no te tiaau i te feia e rave ra i te ohipa i te hiero o te Atua mau, e te mau tamaiti a Henadada,+ ta ratou mau tamaiti e to ratou mau taeae, te ati Levi. 10  I te haamauraa te feia patu i te niu o te hiero o Iehova,+ tia aˈera te mau tahuˈa ma to ratou ahu no te hiero e te pu,+ e te ati Levi, te mau tamaiti a Asapha ma te sumebalo, no te arue ia Iehova ia au i te aratairaa a te arii Davida no Iseraela.+ 11  Haamata aˈera ratou i te himene te tahi i muri iho i te tahi+ ma te arue e te haamauruuru ia Iehova, “e Atua maitai hoi oia. E vai â to ˈna here taiva ore ia Iseraela e a muri noa ˈtu.”+ Umere aˈera te nunaa taatoa ma te reo puai i te arueraa ia Iehova no te mea ua haamauhia te niu o te hiero o Iehova. 12  Auê aˈera e rave rahi tahuˈa, ati Levi, e upoo o te mau utuafare, te feia paari tei ite i to na mua ˈˈe hiero,+ i to ratou iteraa i te niu o teie hiero e haamauhia ra, a umere ai e rave rahi atu â ma te reo puai mau.+ 13  Aita ˈtura ïa te nunaa i nehenehe e faataa ê i te umere i te auê, mea puai hoi te nunaa i te tutuôraa i faaroohia ˈi te reira i te atea roa.

Nota i raro i te api

Heb: “te mau tamarii a Iseraela.”
Aore ra “tamaru no tau mahana noa.”