Ezera 1:1-11
1 I te matahiti matamua o te faatereraa a Kuro+ te arii no Peresia, ia tupu te parau ta Iehova i faahiti na roto ia Ieremia,+ faaaraara ihora Iehova i te aau o Kuro te arii no Peresia ia faatae oia i te tahi poroi na ta ˈna faatereraa arii atoa, ta ˈna atoa i haapapai,+ a na ô ai:
2 “Teie ta Kuro te arii no Peresia i parau: ‘Ua horoa mai Iehova te Atua o te raˈi i te mau faatereraa arii atoa o te fenua na ˈu,+ e ua faaue oia ia ˈu e hamani i te hoê fare no ˈna i Ierusalema+ i Iuda.
3 Te taata no ˈna i rotopu ia outou, ei ia ˈna ra to ˈna Atua, e ia pauma oia i Ierusalema i Iuda e ia hamani faahou i te fare o Iehova te Atua o Iseraela, oia te Atua mau, tei Ierusalema to ˈna fare.*
4 Te taata e parahi ra ei taata ê,+ noa ˈtu te vahi, ia tauturuhia oia e to ˈna mau taata tapiri* ma te horoa na ˈna i te ario e te auro, te faufaa e te animara, e te tusia horoa noa no te fare o te Atua mau+ i Ierusalema.’”
5 Te mau upoo o te mau utuafare o Iuda e o Beniamina e te mau tahuˈa e te ati Levi, pauroa te taata ta te Atua mau i faaaraara i te aau, faaineine aˈera ïa e pauma i Ierusalema no te hamani faahou i te hiero o Iehova.
6 Turu maira* te feia atoa ati aˈe ia ratou, ma te horoa mai i te taihaa ario e auro, te faufaa, te animara e te taoˈa moni rahi, hau atu i te taatoaraa o te mau tusia horoa noa.
7 Hopoi atoa maira te arii Kuro i te mau taihaa o te hiero o Iehova ta Nebukanesa i rave i Ierusalema a tuu atu ai i roto i te hiero o to ˈna atua.+
8 Hopoi maira Kuro te arii no Peresia i te reira i raro aˈe i te tiaauraa a Miteredata te haapao faufaa, o tei tapura i te reira no Sesebazara*+ te raatira o Iuda.
9 Teie tei tapurahia: 30 farii auro, 1 000 farii ario, 29 farii ê atu,
10 30 auˈa auro nainai, 410 auˈa ario nainai, 1 000 taihaa ê atu.
11 Pauroa te taihaa auro e ario, e 5 400 ïa. Hopoi aˈera Sesebazara pauroa te reira i te hoˈiraa te feia tei hopoi-ê-hia+ i Ierusalema mai Babulonia mai.
Nota i raro i te api
^ Huri-atoa-hia “tei Ierusalema oia.”
^ Heb: “te mau taata o to ˈna vahi.”
^ Heb: “Haapuai aˈera i to ratou rima.”
