Deuteronomi 4:1-49
4 “I teie nei, e Iseraela, a faaroo i te mau faaueraa e te mau faaotiraa ta ˈu e haapii nei ia outou ia haapao, ia nehenehe outou e ora noa,+ e tomo e e fatu i te fenua ta Iehova, te Atua o to outou mau tupuna, e horoa nei no outou.
2 Eiaha outou e apiti i te tahi parau i ta ˈu e faaue nei ia outou, eiaha atoa outou e tatara i te tahi parau o te reira,+ ia auraro hoi outou i te mau faaueraa a Iehova to outou Atua ta ˈu e faaue nei ia outou.
3 “Ua ite mata outou i ta Iehova i rave, o te Baala no Peora te tumu. Ua haamou Iehova to outou Atua i rotopu ia outou i te mau taata atoa tei pee i te Baala no Peora.+
4 Area outou pauroa e ati maite nei ia Iehova to outou Atua, te ora nei ïa i teie mahana.
5 A hiˈo, ua haapii au ia outou i te mau faaueraa e faaotiraa haavaraa,+ mai ta Iehova iho â to ˈu Atua i faaue ia ˈu. E haapao outou i te reira i te fenua ta outou e fatu.
6 E pee maite outou i te reira,+ no te mea mea na reira outou e faaite ai e taata feruriraa paari+ outou e te maramarama+ i mua i te mau nunaa o te faaroo no nia i teie mau faaueraa atoa, a parau atu ai ratou: ‘E feia feruriraa paari e te maramarama+ mau â teie nunaa rahi.’
7 O vai hoi nunaa rahi mea piri to ratou mau atua ia ratou mai ia Iehova to tatou Atua mea piri ia tatou i te mau taime atoa e tiaoro ai tatou ia ˈna?+
8 E o vai hoi nunaa rahi e faaueraa e e faaotiraa haavaraa parau-tia ta ratou mai teie Ture taatoa ta ˈu e tuu nei i mua ia outou i teie mahana?+
9 “A haapao maitai noa râ e a ara maitai ia outou iho,* ia ore ia moˈe ia outou te mau mea ta outou i ite mata, e ia ore te reira ia atea ê i to outou aau i te mau mahana atoa o to outou oraraa. Ia faaite atoa outou i te reira i ta outou mau tamarii e mootua.+
10 I te mahana i tia ˈi outou i mua ia Iehova to outou Atua i Horeba, ua parau Iehova ia ˈu: ‘A haaputuputu i te nunaa ia ˈu nei, ia nehenehe ratou e faaroo i ta ˈu mau parau,+ ia nehenehe ratou e haapii i te mǎtaˈu ia ˈu+ i te mau mahana atoa e ora ˈi ratou i te fenua, e ia nehenehe ratou e haapii i ta ratou mau tamarii.’+
11 “Tapiri maira ïa outou e tia noa ihora i te tumu o te mouˈa, e te ura ra te mouˈa i te auahi e tae roa i te raˈi,* e poiri, e ata e te rumaruma rahi.+
12 Paraparau maira Iehova ia outou na roto mai i te auahi.+ Ua faaroo noa outou i te mau taˈo, aita râ i ite ia ˈna,+ e reo anaˈe.+
13 Faaite maira oia i ta ˈna faufaa ia outou,+ ta ˈna i faaue ia outou ia haapao, na Ture Ahuru.*+ I muri iho, papai atura oia i te reira i nia e piti pǎpǎ ofai.+
14 I taua taime ra, faaue maira Iehova ia ˈu ia haapii ia outou i te mau faaueraa e faaotiraa haavaraa, ta outou e haapao e tia ˈi i te fenua e tomo ai outou no te fatu atu.
15 “No reira, a ara maitai ia outou iho, i te mea e i te mahana i paraparau ai Iehova ia outou i Horeba na ropu i te auahi, aita outou i ite ia ˈna,
16 ia ore outou ia rave i te tahi ohipa viivii a hamani ai no outou i te tahi tii taraihia e hohoˈa to ˈna no te tahi tapao, te hohoˈa o te tahi tane aore ra vahine,+
17 te hohoˈa o te tahi animara i nia i te fenua aore ra te hohoˈa o te tahi manu e rere ra i te raˈi,+
18 te hohoˈa o te tahi animara e nee ra i te fenua aore ra te hohoˈa o te tahi iˈa i roto i te pape.+
19 E ia hiˈo outou i te raˈi e ia ite outou i te mahana, te avaˈe e te mau fetia, te nuu taatoa o te raˈi, eiaha e hema a tuturi atu ai i mua e a tavini atu ai i te reira.+ Ua horoa Iehova to outou Atua i te reira na te mau nunaa atoa i raro aˈe i te raˈi taatoa.
20 O outou râ te feia ta Iehova i rave e i aratai i rapae i te umu faatahe auri, i rapae i Aiphiti, ia riro outou ei nunaa no ˈna.*+ O outou ïa i teie mahana.
21 “Riri ihora Iehova ia ˈu no outou,+ e horeo ihora eiaha vau e na roto atu i te pape Ioridana aore ra e tomo i te fenua maitai ta Iehova to outou Atua e horoa nei ei fenua no outou.+
22 E pohe hoi au i teie fenua. Eita vau e na roto atu i te pape Ioridana,+ o outou râ te na roto atu e te fatu i tera fenua maitai.
23 A haapao maitai ia ore ia moˈe ia outou te faufaa a Iehova to outou Atua ta ˈna i faaau ia outou,+ e eiaha e hamani no outou i te tahi tii taraihia, i te hohoˈa o te tahi mea ta Iehova to outou Atua i opani ia outou.+
24 E auahi ura hoi Iehova to outou Atua,+ e Atua o te titau ra ia haamorihia o ˈna anaˈe.+
25 “Ia fanauhia ta outou e tamarii e e mootua, ia ora maoro outou i tera fenua e ia rave i te ino a hamani ai i te tahi tii taraihia+ e a rave ai i te ino i te aro o Iehova to outou Atua ia inoino oia,+
26 e rave mau â vau i te raˈi e te fenua ei ite no te faahapa ia outou i teie mahana, e mou oioi iho â outou i nia i tera fenua ta outou e fatu ma te na roto atu i te pape Ioridana. Eita outou e maoro i nia iho, e mou roa râ outou.+
27 E haapurara Iehova ia outou i rotopu i te mau nunaa,+ e vetahi noa o outou te ora mai+ i rotopu i te mau nunaa e tiahi ai Iehova ia outou.
28 I reira outou e tavini ai i te mau atua raau e te ofai hamanihia e te rima taata,+ e atua o te ore e nehenehe e ite, e faaroo, e tamaa aore ra e hauˈa.
29 “Ia imi outou ia Iehova to outou Atua mai reira mai, e ite iho â outou ia ˈna,+ ia imi outou ia ˈna ma to outou aau atoa e ma to outou ora* atoa.+
30 Ia rahi roa to outou ahoaho e ia roohia outou i teie mau mea atoa a muri aˈe, e hoˈi ïa outou ia Iehova to outou Atua e e faaroo outou i to ˈna reo.+
31 E Atua aroha hamani maitai hoi Iehova to outou Atua.+ Eita oia e faarue aore ra e haamou ia outou, e eita e moˈe ia ˈna te faufaa ta ˈna i faaau i to outou mau tupuna na roto i te hoê horeo.+
32 “A uiui i teie nei no nia i te mau mahana hou to outou tau, mai te mahana i poiete ai te Atua i te taata i nia i te fenua, a imi i te reira mai te hoê pae raˈi i te tahi atu pae raˈi. Ua tupu aˈena anei te tahi ohipa mai teie te faahiahia? Aore ra ua faaroohia aˈena anei te tahi mea mai teie te huru?+
33 Ua faaroo aˈena anei te tahi atu nunaa i te reo o te Atua i te paraparauraa na roto mai i te auahi mai ta outou i faaroo a ora noa ˈi?+
34 Aore ra ua tamata aˈena anei te Atua i te rave i te tahi nunaa no ˈna i roto i te tahi atu nunaa na roto i te faautuaraa,* te tapao, te semeio,+ te tamaˈi,+ te rima puai,+ te rima faatorohia, e te ohipa riaria mau+ mai ta Iehova to outou Atua i rave no outou i Aiphiti i mua maitai i to outou mata?
35 Ua faaitehia teie mau mea ia outou ia ite outou e o Iehova te Atua mau,+ e aita ˈtu maori râ o ˈna anaˈe.+
36 Ua rave oia ia faaroo outou i to ˈna reo mai te raˈi mai no te aˈo ia outou, e i te fenua nei, ua faaite oia ia outou i ta ˈna auahi rahi, e ua faaroo outou i ta ˈna mau parau na roto mai i te auahi.+
37 “No te mea ua here o ˈna i to outou mau tupuna e ua maiti i to ratou huaai i muri mai ia ratou,+ arataihia maira outou i rapae i Aiphiti i mua i to ˈna iho mata ma to ˈna mana rahi.
38 Ua tiahi oia mai mua ia outou i te mau nunaa rahi aˈe e te puai aˈe ia outou, no te aratai ia outou i nia iho i to ratou fenua ta ˈna e horoa ei fenua no outou, mai i teie mahana.+
39 Ia ite râ outou i teie mahana, e ia haamanaˈo outou i roto i to outou aau e o Iehova te Atua mau i te raˈi i nia, e i te fenua i raro nei,+ e aita ˈtu.+
40 E haapao outou i ta ˈna mau ture e ta ˈna mau faaueraa ta ˈu e faaue nei ia outou i teie mahana, ia maitai outou e ta outou mau tamarii i muri mai ia outou, ia ora maoro outou i te fenua ta Iehova to outou Atua e horoa nei no outou.”+
41 I taua taime ra, faataa ihora Mose e toru oire i te pae hitia o te râ o Ioridana.+
42 Ia haapohe te tahi taata i to ˈna taata tupu ma te opua ore e aita oia i hae ia ˈna na mua ˈtu,+ ia horo oia i te hoê o taua mau oire ra a ora ˈtu ai.+
43 Tera mau oire, o Bezera+ no te ati Reubena i te medebara i te vahi papu i nia i te mouˈa, o Ramota+ i Gileada no te ati Gada, e Golana+ i Basana no te ati Manase.+
44 Tera ïa te Ture+ ta Mose i tuu i mua i te nunaa o Iseraela.
45 Tera te mau haamanaˈoraa, faaueraa e faaotiraa haavaraa ta Mose i horoa i te ati Iseraela i muri aˈe i to ratou haereraa i rapae i Aiphiti,+
46 i te tuhaa fenua o Ioridana, i te peho i mua ia Bete-peora,+ i te fenua o Sihona arii o te ati Amori e parahi ra i Hesebona,+ tei pau ia Mose e te ati Iseraela i muri aˈe i to ratou haereraa i rapae i Aiphiti.+
47 Fatu aˈera ratou i to ˈna fenua e te fenua o Oga+ arii o Basana, na arii e piti o te ati Amori i te tuhaa fenua hitia o te râ o Ioridana,
48 mai Aroera+ i te hiti o te peho o Aranona, tae roa i te mouˈa Siona, oia hoi Heremona,+
49 e pauroa te Araba i te tuhaa fenua hitia o te râ o Ioridana, e tae roa i te miti o te Araba,* i te tumu o te mau taha aivi o Pisega.+
Nota i raro i te api
^ Heb: “te ropuraa o te raˈi.”
^ Heb: “na parau ahuru.”
^ Aore ra “o ˈna te fatu.”
^ Aore ra “tamataraa.”
^ Oia hoi te miti Avaava aore ra te miti Pohe.
