Deuteronomi 27:1-26

  • E papaihia te ture i nia i te mau ofai (1-10)

  • I te mouˈa Ebala e te mouˈa Gerizima (11-14)

  • Faahiti-faahou-hia te mau ati (15-26)

27  Faaue aˈera Mose, e te mau matahiapo atoa o Iseraela, i te nunaa: “A haapao pauroa te faaueraa ta ˈu e horoa nei ia oe i teie mahana.  E i te mahana e haere ai oe na roto i te pape Ioridana i te fenua ta Iehova to Atua e horoa nei no oe, e faatia oe i te ofai rarahi e e parai oe i te reira i te pǎte.*+  E papai oe i nia iho i taua mau ofai ra pauroa te parau o teie Ture ua tae anaˈe oe i te tahi atu pae, ia tomo hoi oe i te fenua ta Iehova to Atua e horoa nei no oe, e fenua e tahe noa te û e te meri, mai ta Iehova iho â, te Atua o to mau tupuna, i fafau ia oe.+  Ua tae anaˈe oe i te tahi atu pae o Ioridana, e faatia oe i tera mau ofai i nia i te mouˈa Ebala,+ e parai oe i te reira i te pǎte,* mai ta ˈu iho â e faaue nei ia oe i teie mahana.  E hamani atoa oe i te hoê fata i reira no Iehova to Atua, e fata ofai. Eiaha oe e faaohipa i te mauhaa auri no te tâpû i tera mau ofai.+  E hamani oe i te fata a Iehova to Atua i te mau ofai aita i tâpûhia e e pûpû oe i te tusia taauahi ia Iehova to Atua i nia iho.  E pûpû oe i te tusia no te hau+ i reira, e amu oe i te reira,+ e e oaoa oe i mua ia Iehova to Atua.+  A papai maitai i nia i tera mau ofai pauroa te parau o teie Ture.”+  Paraparau aˈera Mose e te mau tahuˈa ati Levi ia Iseraela taatoa, a na ô ai: “A faaea i te paraparau e a faaroo mai, e Iseraela. I teie mahana ua riro mai oe ei nunaa no Iehova to Atua.+ 10  E faaroo oe i te reo o Iehova to Atua e e faaohipa oe i ta ˈna mau faaueraa+ e ta ˈna mau ture, ta ˈu e faaue nei ia oe i teie mahana.” 11  I taua mahana ra, faaue ihora Mose i te nunaa: 12  Ua tae anaˈe outou i te tahi atu pae o Ioridana, teie te mau opu te tia i nia i te mouˈa Gerizima+ no te haamaitai i te nunaa: to Simeona, to Levi, to Iuda, to Isakara, to Iosepha e to Beniamina. 13  E teie te mau opu te tia i nia i te mouˈa Ebala+ no te faahiti i te ati: to Reubena, to Gada, to Asera, to Zebuluna, to Dana e to Naphatali. 14  E e paraparau te ati Levi i te taata atoa o Iseraela ma te reo puai:+ 15  “‘Ua ati te taata o te hamani i te hoê tii taraihia+ aore ra te hoê tii faatôhia,*+ mea faufau hoi no Iehova,+ e ohipa na te rima o te hoê rimaî,* e tei huna i te reira.’ (E e pahono te nunaa taatoa: ‘Amene!’*) 16  “‘Ua ati te taata o te vahavaha i to ˈna metua tane aore ra to ˈna metua vahine.’+ (E e parau te nunaa taatoa: ‘Amene!’) 17  “‘Ua ati te taata o te hauti i te tapao otia o te fenua o to ˈna taata tupu.’+ (E e parau te nunaa taatoa: ‘Amene!’) 18  “‘Ua ati te taata o te faahahi ê i te tahi taata matapo i to ˈna eˈa.’+ (E e parau te nunaa taatoa: ‘Amene!’) 19  “‘Ua ati te taata o te faahuru ê i te haavaraa+ i te hoê taata ê e noho ra i ǒ oe, te hoê tamarii aita e metua tane,* aore ra te hoê vahine ivi.’+ (E e parau te nunaa taatoa: ‘Amene!’) 20  “‘Ua ati te taata o te taoto i te vahine faaipoipo a to ˈna metua tane, ua faatae hoi oia i te haama i nia i* to ˈna metua tane.’+ (E e parau te nunaa taatoa: ‘Amene!’) 21  “‘Ua ati te taata o te taoto i te animara.’+ (E e parau te nunaa taatoa: ‘Amene!’) 22  “‘Ua ati te taata o te taoto i to ˈna tuahine, te tamahine a to ˈna metua tane aore ra te tamahine a to ˈna metua vahine.’+ (E e parau te nunaa taatoa: ‘Amene!’) 23  “‘Ua ati te taata o te taoto i to ˈna metua vahine hoovai.’+ (E e parau te nunaa taatoa: ‘Amene!’) 24  “‘Ua ati te taata o te tamoemoe e o te haapohe i to ˈna taata tupu.’+ (E e parau te nunaa taatoa: ‘Amene!’) 25  “‘Ua ati te taata o te farii ia petahia oia no te haapohe i te tahi taata aita ta ˈna e hara.’+ (E e parau te nunaa taatoa: ‘Amene!’) 26  “‘Ua ati te taata o te ore e turu i te mau parau o teie Ture ma te faaohipa i te reira.’+ (E e parau te nunaa taatoa: ‘Amene!’)

Nota i raro i te api

Aore ra “puˈa.”
Aore ra “puˈa.”
Aore ra “Na reira ïa!”
Aore ra “tupai auri e tamuta raau.”
Aore ra “faatahehia.”
Aore ra “otare.”
Heb: “heheu hoi oia i te ahu o.”