Deuteronomi 23:1-25
23 “Aita e tane tei patehehia, ua perehu anei to ˈna hua aore ra ua tâpûhia to ˈna mero atiraa, e ô i roto i te amuiraa a Iehova.+
2 “Aita e tamarii tei fanauhia i te peu taotoraa tia ore* e ô i roto i te amuiraa a Iehova.+ Tae noa ˈtu i te ahuru o te uˈi, aita hoê aˈe o to ˈna huaai e ô i roto i te amuiraa a Iehova.
3 “Aita e ati Amona e aita e ati Moabi e ô i roto i te amuiraa a Iehova.+ Tae noa ˈtu i te ahuru o te uˈi, aita hoê aˈe o to ratou huaai e ô i roto i te amuiraa a Iehova,
4 no te mea aita ratou i tauturu ia outou ma te horoa ˈtu i te maa e te pape a haere ai outou i to outou tere i rapae ia Aiphiti,+ e no te mea ua tarahu ratou ia Balaama te tamaiti a Beora no Petora i Mesopotamia no te faatae i te ino i nia ia outou.+
5 Aita râ Iehova to Atua i faaroo ia Balaama.+ Ua taui hoi Iehova to Atua i te ino tei faataehia i nia ia oe ei haamaitairaa no oe,+ no te mea mea here na Iehova to Atua ia oe.+
6 Eiaha roa ˈtu oe e rave i te tahi mea ia maitai ratou aore ra ia rahi ta ratou faufaa i te mau mahana atoa o to oraraa.+
7 “Eiaha oe e hae i te hoê ati Edoma, e taeae hoi o ˈna no oe.+
“Eiaha oe e hae i te hoê taata Aiphiti, i ora na hoi oe ei taata ê i to ˈna fenua.+
8 O te toru o te uˈi o ta ratou mau tamarii i fanauhia mai te nehenehe e ô i roto i te amuiraa a Iehova.
9 “Ua haere anaˈe oe e aro i to oe mau enemi, e haapae oe i te mau ohipa ino atoa.*+
10 Ia viivii te hoê tane no te taheraa mai to ˈna pape tane i te po,+ e haere ïa oia i rapaeau i te puhapa e eiaha e hoˈi faahou mai i roto i te puhapa.
11 Ia ahiahi, e horoi oia ia ˈna i te pape, e i reira oia e nehenehe ai e hoˈi mai i roto i te puhapa i te toparaa mahana.+
12 E faataahia te tahi vahi moˈemoˈe* i rapae i te puhapa, e i reira oe e haere ai.
13 Ei ope nainai atoa to roto i ta oe mau mauhaa. Ia parahi oe no te haumiti i rapae, e ô oe i te hoê apoo i te ope nainai e e tapoˈi oe i to oe tutae.
14 Te hahaere nei hoi Iehova to Atua na roto i to puhapa+ no te faaora ia oe e no te tuu mai i to oe mau enemi ia oe. Ia moˈa ïa to puhapa,+ ia ore oia e ite i te tahi mea au ore i ǒ oe a ore atu ai oia e huri tua ia oe.
15 “Eiaha oe e faahoˈi i te tahi tavini i to ˈna fatu ia horo ê oia i to ˈna fatu e ia haere mai ia oe ra.
16 E nehenehe oia e parahi i rotopu ia outou i te vahi atoa ta ˈna e maiti i te hoê o to mau oire, i te vahi atoa ta ˈna e hinaaro. Eiaha oe e rave ino ia ˈna.+
17 “Eiaha hoê o te mau tamahine a Iseraela e riro ei taiata,*+ eiaha atoa hoê o te mau tamaiti a Iseraela e riro ei taiata.*+
18 Eiaha oe e hopoi mai i roto i te fare o Iehova to Atua no te tahi euhe i tei aufauhia i te hoê vahine taiata aore ra tei aufauhia* i te hoê tane taiata,* mea faufau hoi te reira no Iehova to Atua.
19 “Eiaha oe e faaaufau i to taeae i te apî,+ te apî anei i nia i te moni, te maa, aore ra te tahi atu mea e nehenehe e titau i te apî.
20 E nehenehe oe e faaaufau i te tahi taata ê i te apî,+ eiaha râ oe e faaaufau i to taeae i te apî,+ ia haamaitai Iehova to Atua ia oe i ta oe mau ohipa atoa i te fenua ta oe e fatata i te fatu.+
21 “Ia euhe oe ia Iehova to Atua,+ eiaha oe e haamarirau i te haapao i te reira.+ E titau mai iho â Iehova to Atua ia oe i te reira. Ia haamarirau oe i te na reira, e riro ïa ei hara na oe.+
22 Ia ore râ oe e euhe, eita ïa oe e hara.+
23 E haapao oe i te parau a to vaha,+ e e rave oe mai ta to oe iho vaha i euhe ei tusia horoa noa ia Iehova to Atua.+
24 “Ia tomo oe i roto i te faaapu vine a to taata tupu, e nehenehe oe e amu i te vine e ia paia roa, eiaha râ oe e tuu i te vine i roto i ta oe farii.+
25 “Ia haere oe i roto i te faaapu huero maa a to taata tupu, e nehenehe oe e hutihuti i te peenave paari i to rima, eiaha râ oe e ooti i te huero maa a to taata tupu i te tipi fefe.+
Nota i raro i te api
^ Oia hoi te hoê tamarii tei fanauhia aita na metua i faaipoipo te tahi i te tahi.
^ Aore ra “ohipa atoa o te haaviivii.”
^ Oia hoi te tahi haumitiraa.
^ Heb: “taiata o te hiero.”
^ Heb: “taiata o te hiero.”
^ Aore ra “tei noaa mai.”
^ Heb: “urî.”
