Deuteronomi 20:1-20

  • Faatureraa no te tamaˈi (1-20)

    • Feia o te ore e haere i te tamaˈi (5-9)

20  “Ia haere oe i te tamaˈi e aro i to oe mau enemi e ia ite oe e mea rahi aˈe ta ratou mau puaahorofenua e pereoo tamaˈi e nuu i ta oe, eiaha e mǎtaˈu ia ratou, tei ia oe ra hoi Iehova to Atua tei aratai ia oe i rapae i te fenua o Aiphiti.+  Ua fatata anaˈe oe i te haere i te aroraa, e tapiri mai te tahuˈa e e paraparau oia i te nunaa.+  E parau oia ia ratou: ‘A faaroo mai, e Iseraela, ua fatata outou i te haere e aro i to outou mau enemi. Eiaha outou ia ere i te itoito. Eiaha e mǎtaˈu, eiaha e riaria e eiaha e rûrû no ratou,  te haere nei hoi Iehova to outou Atua e o outou no te aro no outou i to outou mau enemi e no te faaora ia outou.’+  “E parau atoa te feia toroa i te nunaa: ‘O vai tei hamani i te fare apî e aita i avari i te reira? Ia hoˈi oia i to ˈna fare. Ia ore anaˈe, e nehenehe oia e pohe i te aroraa e na te tahi atu e avari i te fare.  E o vai tei tanu i te vine e aita i pofai i te reira? Ia haere e ia hoˈi oia i to ˈna fare. Ia ore anaˈe, e nehenehe oia e pohe i te aroraa e na te tahi atu e pofai i te vine.  E o vai tei momoˈa i te tahi vahine e aita i faaipoipo ia ˈna? Ia haere e ia hoˈi oia i to ˈna fare.+ Ia ore anaˈe, e nehenehe oia e pohe i te aroraa e na te tahi atu tane e faaipoipo i tera vahine.’  E ui atoa te feia toroa i te nunaa: ‘O vai te mǎtaˈu ra e tei ere i te itoito?+ Ia hoˈi oia i to ˈna fare, eiaha te aau o to ˈna mau taeae ia ere i te itoito mai ia ˈna no ˈna aˈe.’+  Ua oti anaˈe i te feia toroa i te paraparau i te nunaa, e faatoroa ratou i te mau raatira nuu no te aratai i te nunaa. 10  “Ia tapiri atu oe i te tahi oire no te aro atu, e faaite atoa ˈtu ïa oe i te mau parau no te faatupu i te hau.+ 11  Mai te peu e horoahia mai te tahi pahonoraa hau e e iritihia mai te uputa ia oe, e riro to reira mau taata atoa ei tavini no oe, e e tavini ratou ia oe.+ 12  Mai te peu râ e patoi ratou i te faatupu i te hau e o oe e e aro mai ratou ia oe, e haaati ïa oe i taua oire ra. 13  E tuu mai iho â Iehova to Atua i taua oire ra i to rima, e e tairi oe pauroa te tane i reira i te ˈoˈe. 14  Area te mau vahine, te mau tamarii, te mau animara, te mau mea atoa i roto i te oire, pauroa tei haruhia, e nehenehe oe e rave na oe,+ e e amu oe i te mau mea a to oe mau enemi tei haruhia, ta Iehova to Atua i horoa na oe.+ 15  “Tera ta oe e rave i te mau oire atoa mea atea roa ia oe, e ere i te mau oire o teie mau nunaa tapiri. 16  I roto râ i te mau oire o teie mau nunaa, ta Iehova to Atua e horoa nei no oe ei tuhaa tutuuhia, eiaha oe e vaiiho i te tahi noa ˈˈe taata ia ora.+ 17  E faataa râ oe ia ratou pauroa no te haamouraa, te ati Heta, te ati Amori, te ati Kanaana, te ati Perizi, te ati Hevi e te ati Iebusi,+ mai ta Iehova iho â to Atua i faaue ia oe, 18  ia ore ratou e haapii ia oe i te pee i ta ratou mau peu hairiiri ta ratou i rave no to ratou mau atua, a hara ˈtu ai oe ia Iehova to Atua.+ 19  “Ia haaati e ia haru oe i te tahi oire i muri iho i te aroraa ˈtu e rave rahi mahana, eiaha oe e faaore i ta ratou mau tumu raau ma te tâpû i te reira i te opahi.* E nehenehe oe e amu i te maa hotu i nia iho, eiaha râ oe e tâpû i te mau tumu raau.+ E tairi anei hoi oe i te tahi tumu raau mai ta oe e tairi i te tahi taata? 20  O te tumu raau anaˈe ua ite oe eita e horoa mai i te maa ta oe e nehenehe e faaore. E nehenehe oe e tâpû i te reira e e hamani i te aua no te haaati i te oire e aro mai ra ia oe, e ia pau atu.

Nota i raro i te api

Aore ra “toˈi.”