Deuteronomi 12:1-32
12 “Teie te mau faaueraa e te mau faaotiraa haavaraa ia haapao maitai outou i te faaohipa i te mau mahana atoa e ora ˈi outou i te fenua ta Iehova te Atua o to outou mau tupuna e horoa ˈtu ia fatu outou.
2 E haamou roa outou i te mau vahi atoa i reira te mau nunaa ta outou e faaere i to ratou fenua i haamori ai i to ratou mau atua,+ i nia anei i te mau mouˈa teitei, te mau aivi aore ra i raro aˈe i te tahi tumu raau ruperupe.
3 E huri outou i ta ratou mau fata i raro, e tuparari i ta ratou mau pou haamoriraa,+ e tanina i ta ratou mau raau haamoriraa,* e e tâpû i te mau tii nanaˈohia o to ratou mau atua,+ a faaore atu ai i to ratou mau iˈoa mai taua vahi ra.+
4 “Eiaha outou e haamori ia Iehova to outou Atua mai tera.+
5 A imi râ i te vahi ta Iehova to outou Atua e maiti no te haamau i to ˈna iˈoa e to ˈna vahi nohoraa i rotopu i to outou mau opu atoa, e a haere i reira.+
6 I reira e titauhia ˈi ia hopoi outou i ta outou mau tusia taauahi,+ ta outou mau tusia, ta outou mau tuhaa ahuru,+ te ô a to outou rima,+ ta outou mau tusia euhe, ta outou mau tusia horoa noa,+ e te fanauˈa matamua o ta outou nǎnǎ puaatoro e nǎnǎ mamoe e puaaniho.+
7 E tamaa outou e to outou mau utuafare i reira i mua ia Iehova to outou Atua+ e e oaoa outou i ta outou mau ohipa atoa,+ no te mea ua haamaitai Iehova to outou Atua ia outou.
8 “Eiaha outou e rave mai ta tatou e rave nei i ǒ nei i teie mahana, te rave nei hoi te taata atoa i te mea tia i ta ratou hiˈoraa,*
9 no te mea aita â outou i tae atura i te vahi faafaaearaa+ e te tuhaa ta Iehova to outou Atua e horoa nei no outou.
10 Ia na roto atu outou i te pape Ioridana+ e ia parahi i te fenua ta Iehova to outou Atua e horoa ˈtu nei ia fatu outou, e paruru mau â oia ia outou i to outou mau enemi atoa ati aˈe ia outou, e e parahi outou ma te taiâ ore.+
11 E hopoi outou pauroa ta ˈu e faaue nei ia outou i te vahi ta Iehova to outou Atua e maiti no te haamau i to ˈna iˈoa,+ ta outou mau tusia taauahi, ta outou mau tusia, ta outou mau tuhaa ahuru,+ te ô a to outou rima, e te mau tusia euhe atoa ta outou e euhe ia Iehova.
12 E oaoa outou i mua ia Iehova to outou Atua,+ outou e ta outou mau tamaiti, ta outou mau tamahine, ta outou mau tavini tane e tavini vahine, e te ati Levi i roto i to outou mau oire,* aita hoi to ˈna e fenua, aita atoa ta ˈna e tuhaa e o outou.+
13 A ara eiaha outou e pûpû i ta outou mau tusia taauahi i te tahi atu vahi tei au ia outou.+
14 E pûpû outou i ta outou mau tusia taauahi i te vahi noa ta Iehova e maiti i roto i te tuhaa fenua o te hoê o to outou mau opu, e i reira outou e rave ai pauroa ta ˈu e faaue nei ia outou.+
15 “I te mau taime atoa e hiaai ai outou, e nehenehe outou e tupai hoê o ta outou mau animara e e amu i te iˈo,+ ia au i te haamaitairaa ta Iehova to outou Atua i horoa ˈtu i roto i to outou mau oire* atoa. E nehenehe te taata viivii e te taata viivii ore e amu i te reira, mai ia outou e amu i te zabi aore ra te aili.
16 Eiaha râ outou e amu i te toto.+ E ninii outou i te reira i raro i te repo mai te pape.+
17 Eita ta outou e nehenehe e amu i roto i to outou mau oire* i te tuhaa ahuru o ta outou huero maa, ta outou uaina apî, ta outou hinu, te fanauˈa matamua o ta outou nǎnǎ puaatoro e nǎnǎ mamoe e puaaniho,+ te tahi o ta outou mau tusia euhe, ta outou mau tusia horoa noa, aore ra te ô a to outou rima.
18 E amu outou i te reira i mua ia Iehova to outou Atua i te vahi ta Iehova to outou Atua e maiti,+ outou e ta outou tamaiti, ta outou tamahine, ta outou tavini tane e tavini vahine, e te ati Levi i roto i to outou mau oire,* e e oaoa outou i mua ia Iehova to outou Atua i ta outou mau ohipa atoa.
19 A ara eiaha e haamoˈe i te ati Levi+ a ora noa ˈi outou i to outou fenua.
20 “Ia faarahi Iehova to Atua i to tuhaa fenua,+ mai ta ˈna i fafau ia oe,+ e ia na ô oe: ‘E hinaaro vau e amu i te iˈo,’ no te mea te hiaai ra oe e amu i te iˈo, e nehenehe oe e amu i te iˈo i te mau taime atoa e hiaai ai oe.+
21 Mai te peu mea atea ia oe te vahi ta Iehova to Atua e maiti no te haamau i to ˈna iˈoa,+ e tupai ïa oe i te tahi puaatoro, mamoe, aore ra puaaniho o ta oe nǎnǎ ta Iehova i horoa na oe, mai ta ˈu i faaue ia oe, e e amu oe i te iˈo i roto i to mau oire* i te mau taime atoa e hiaai ai oe.
22 E nehenehe oe e amu i te iˈo mai ta oe e amu i te zabi e te aili.+ O te taata viivii e te taata viivii ore atoa te nehenehe e amu i te reira.
23 Tera noa râ, a faaoti papu eiaha e amu i te toto+ no te mea o te ora te toto.+ Eiaha oe e amu i te ora e te iˈo.
24 Eiaha oe e amu i te reira. E ninii oe i te reira i raro i te repo mai te pape.+
25 Eiaha oe e amu i te reira, ia maitai hoi oe e ta oe mau tamarii i muri mai ia oe, no te mea te rave nei oe i te mea tia i te aro o Iehova.
26 E rave oe i ta oe noa mau mea moˈa e ta oe mau tusia euhe ia haere mai oe i te vahi ta Iehova e maiti.
27 I reira oe e pûpû ai i ta oe mau tusia taauahi, te iˈo e te toto,+ i nia i te fata a Iehova to Atua, a niniihia ˈtu ai te toto o ta oe mau tusia ê atu i pihai iho i te fata+ a Iehova to Atua. Area te iˈo, e nehenehe oe e amu.
28 “A haapao maitai i te faaroo i teie mau parau atoa ta ˈu e faaue nei ia oe, ia maitai noa oe e ta oe mau tamarii i muri mai ia oe, no te mea te rave nei oe i te mea maitai e te mea tia i te aro o Iehova to Atua.
29 “Ia haamou Iehova to Atua i te mau nunaa ta oe e faaere i to ratou fenua,+ e ia ora oe i to ratou fenua,
30 a ara eiaha oe ia hema i muri iho i to ratou haamouraahia mai mua ia oe. Eiaha e uiui no nia i to ratou mau atua, a na ô ai: ‘Mea nafea tera mau nunaa i tavini ai i to ratou mau atua? E na reira atoa vau.’+
31 Eiaha oe e haamori ia Iehova to Atua mai tera, no te mea te rave ra ratou no to ratou mau atua i te mau mea hairiiri atoa mea hae na Iehova, tae roa i te taninaraa i ta ratou mau tamaiti e ta ratou mau tamahine i te auahi no to ratou mau atua.+
32 Pauroa te parau ta ˈu e faaue nei ia oe, o ta oe ïa e haapao maitai i te rave.+ Eiaha oe e apiti i te tahi atu parau i te reira, eiaha atoa e tatara i te tahi parau o te reira.+
Nota i raro i te api
^ Aore ra “ta ratou e manaˈo ra e mea tia.”
^ Heb: “uputa.”
^ Heb: “uputa.”
^ Heb: “uputa.”
^ Heb: “uputa.”
^ Heb: “uputa.”
