Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Tito 2:1-15

HAAPOTORAA O TE MAU TUMU PARAU

  • Haapiiraa maitai no te feia apî e te ruhiruhia (1-15)

    • Haapae i te haerea ino (12)

    • Itoito rahi i roto i te mau ohipa nehenehe (14)

2  Area oe, a tamau i te parau i te mea e au i te haapiiraa maitai.*  Ei haerea au noa to te mau tane paari a‘e, te tura, te mana‘o paari, te itoito i roto i te faaroo, te here e te faaoromai tamau.  Na reira atoa, ei haerea e au i te feia mo‘a to te mau vahine paari a‘e, eiaha te pari haavare e te inu-hua-raa i te uaina, ei vahine râ e haapii atu i te mea maitai,  a nehenehe atu ai ratou e a‘o* i te mau vahine apî a‘e ia here i ta ratou iho tane faaipoipo, ia here i ta ratou mau tamarii,  ei mana‘o paari to ratou, te haerea mâ, te rave i te ohipa i te fare,* te maitai e te auraro i ta ratou iho tane faaipoipo ia ore te parau a te Atua ia faainohia.  Na reira atoa, a tamau i te onoono i te mau tane apî a‘e ei mana‘o paari to ratou,  ma te faaite atu i te hi‘oraa i roto i te mau ohipa maitai roa atoa. A haapii atu i te mea viivii ore* ma te feruriraa paari,  ma te faaohipa i te parau maitai* te ore e nehenehe e faahapahia, a haama ’tu ai te feia e patoi mai, aita roa hoi ta ratou e parau faaino ia tatou.  Ia auraro te mau tîtî i to ratou mau fatu i te mau mea atoa, ia mauruuru to ratou fatu ia ratou, ma te ore e vaha ’tu 10  e ma te ore e eiâ ia ratou, ei feia tiaturi-roa-hia râ a faanehenehe roa ’tu â ’i ratou i te haapiiraa a to tatou Faaora, te Atua. 11  Ua faaitehia hoi to te Atua hamani maitai rahi, o te horoa mai i te faaoraraa i te mau huru taata atoa. 12  E haapii mai te reira ia tatou ia haapae i te haerea ino e oia atoa te mau hinaaro o teie nei ao, e ia ora ma te mana‘o paari e te parau-tia e te haamori i te Atua ana‘e i roto i teie nei faanahoraa o te ao nei,* 13  a tiai noa ’i tatou i te tiaturiraa faahiahia e te faaiteraa mai o te Atua Mana hope e o to tatou Faaora o Iesu Mesia ia raua ma te hanahana, 14  ua horoa hoi te Mesia ia ’na iho no te faaora* ia tatou i te mau ohipa ino atoa e no te tamâ i te hoê nunaa no ’na iho ei feia i maiti-taa-ê-hia no ’na e te itoito rahi i roto i te mau ohipa maitai roa. 15  A tamau i te faahiti i teie mau mea e te a‘o* e te faaite atu i te hapa ma te mana rahi. Eiaha ei taata e vahavaha ia oe.

Nota i raro i te api

Aore ra “faufaa.”
Aore ra “haamana‘o,” “haapii.”
Aore ra “te atuatu i to ratou fare.”
Nehenehe atoa e hurihia “ma te viivii ore.”
Aore ra “faufaa.”
Aore ra “teie nei tau.” A hi‘o i te titionare.
“No te hoo mai,” “no te faatiamâ” na roto i te reo Heleni.
Aore ra “faaitoito.”