Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Timoteo 2, 4:1-22

4  E faaueraa mana ta ’u e tuu atu ia oe i te aro o te Atua e o te Mesia ra o Iesu, o te haava i te feia ora e te feia pohe, e na roto i to ’na faaiteraa mai ia ’na iho e ta ’na Faatereraa arii:*  A poro i te parau. A rave ru i te reira i te taime maitai e te taime fifi. A faaite atu i te hapa, a a‘o atu e a faaitoito atu ma te faaoromai atoa e te aravihi i te haapii.  E haere mai hoi te hoê tau e tâhiti roa ’i ratou i te haapiiraa maitai,* ia au râ i to ratou iho mau hinaaro, e imi ratou i te tahi mau orometua na ratou no te faanavenave i to ratou tari‘a.*  E fariu ê ratou i to ratou tari‘a i te parau mau a faaroo atu ai i te mau aai.  O oe râ, a feruri maite noa i te mau mea atoa, a faaruru i te fifi, a rave i te ohipa a te hoê taata poro evanelia,* a rave faahope roa i ta oe taviniraa.  Mai te tusia uaina hoi au e niniihia nei i nia i te fata, e ua fatata roa te taime e pohe ai au.  Ua aro vau i te aroraa maitai roa, ua hope ia ’u te hororaa, ua pee au i te faaroo.  Mai teie atu nei, ua faahereherehia no ’u te hei upoo o te parau-tia ta te Fatu, te haava parau-tia, e horoa na ’u i te mahana haavaraa ei haamaitairaa, eiaha noa râ na ’u, na te feia atoa râ tei tiai ru i to ’na faaiteraa mai ia ’na iho.  A imi i te mau ravea atoa ia tae oioi mai oe ia ’u ra. 10  Ua faarue hoi Dema ia ’u no to ’na nounou i te faanahoraa nei o te ao nei* e ua reva ’tu i Tesalonia, o Kerese i Galatia e o Tito i Dalemetia. 11  O Luka ana‘e tei ia ’u nei. A rave ia Mareko na muri ia oe, e tauturu rahi hoi oia no ’u i roto i te taviniraa. 12  Tera râ, ua tono vau ia Tuhiko i Ephesia. 13  Ia haere mai oe, a afai mai i te ahu roa mahanahana ta ’u i vaiiho i Teroa i ǒ Karepo, e te mau otaro, te mau otaro iri animara iho â râ. 14  Ua hamani-ino-rahi-hia vau e Alesanedero te taata tupai veo. Na Iehova* e faautua ia ’na ia au i ta ’na i rave mai. 15  O oe atoa, a haapao maitai ia ’na, ua patoi u‘ana roa mai oia i ta matou poroi. 16  I to ’u tiaraa i mua i te feia mana no te taime matamua, aita hoê a‘e i turu mai ia ’u, ua faarue paatoa râ ratou ia ’u. Eiaha râ ratou ia faahapahia no te reira. 17  Tera râ, ua turu e ua haapuai mai te Fatu ia ’u ia hope roa te parau apî oaoa i te porohia na roto ia ’u e ia faaroo te mau nunaa atoa i te reira. E ua faaorahia vau i te vaha o te liona. 18  E faaora te Fatu ia ’u i te mau ohipa ino atoa e e faaherehere oia ia ’u no ta ’na Faatereraa arii i te ra‘i. Ei ia ’na ra te hanahana e a muri noa ’tu. Amene. 19  A aroha ’tu ia Periseka raua o Akuila e te utuafare o Onesiphoro. 20  Ua faaea o Eraseto i Korinetia, ua vaiiho râ vau ia Terophimo i Mileto no te mea e ma‘i to ’na. 21  A imi i te mau ravea atoa ia tae mai oe hou te tau to‘eto‘e. Te aroha ’tu nei o Eubalo, na reira atoa o Pude, o Lino e o Kalaudia e te mau taeae atoa. 22  Ia haamaitai te Fatu i to oe huru feruriraa. E ia hamani maitai rahi oia ia outou.

Nota i raro i te api

Aore ra “to ’na Basileia.”
Aore ra “faufaa.”
Aore ra “ia parauhia mai i ta ratou e hinaaro e faaroo.”
Aore ra “a tamau i te poro i te parau apî oaoa.”
Aore ra “te tau nei.” A hi‘o i te titionare.
A hi‘o i te titionare.