Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Timoteo 2, 2:1-26

HAAPOTORAA O TE MAU TUMU PARAU

  • Tuu atu i te poroi i te mau tane aravihi (1-7)

  • Faaoromai i te mauiui no te parau apî oaoa (8-13)

  • Faaohipa maitai i te parau a te Atua (14-19)

  • Horo ê i te mau hinaaro o te apîraa (20-22)

  • E nafea i te feia patoi? (23-26)

2  No reira ta ’u tamaiti, ia noaa noa ia oe te puai maoti te hamani maitai rahi e vai ra i te Mesia ra o Iesu.  E te mau parau ta oe i faaroo ia ’u e tei haapapuhia e te ite e rave rahi, o ta oe ïa e tuu atu i te mau tane haapao maitai, a ite atoa ’tu ai ratou i te haapii maitai ia vetahi ê.  Ei faehau mau na te Mesia ra o Iesu, ia ineine oe i te faaruru i te ati.  Aita e taata e tavini ra ei faehau e faaô* i roto i te ohipa tapihooraa o te oraraa nei,* ia mauruuru hoi te taata tei rave ia ’na ei faehau.  I roto atoa i te mau tata‘uraa, eita te re* e noaa i te taata tata‘u ia ore oia ia haapao i te mau faatureraa.  O te taata faaapu itoito te amu na mua i te mau maa hotu ta ’na i tanu.  A haamana‘o noa i ta ’u e parau nei. E maramarama oe* i te mau mea atoa maoti te Fatu.  A haamana‘o e ua faatiahia Iesu Mesia mai te pohe mai, e huaai o ’na no Davida* ia au i te parau apî oaoa ta ’u e poro nei,  no taua parau ra hoi e mauiui ai au e e mau ai i te fare tapearaa mai te hoê taata ohipa ino. Tera râ, aita te parau a te Atua i tapeahia. 10  No reira ïa vau e faaoromai noa ’i i te mau mea atoa no te maitai o te feia maitihia, ia noaa atoa ia ratou te faaoraraa maoti te Mesia ra o Iesu, e te hanahana mure ore atoa. 11  E parau papu teie: Ia pohe tatou e o ’na, e ora atoa ïa tatou e o ’na. 12  Ia faaoromai noa tatou, e faatere atoa ïa tatou ei arii e o ’na. Ia parau tatou aita tatou i ite ia ’na, e parau atoa ïa o ’na aita o ’na i ite ia tatou. 13  Ia ore noa ’tu tatou e tapea i ta tatou parau, e tapea noa oia i ta ’na parau, e haa noa hoi oia ia au i to ’na huru mau. 14  A haamana‘o noa ia ratou i teie mau parau, ma te a‘o* ia ratou i te aro o te Atua eiaha e mârô, aita roa hoi e faufaa no te mea e haamauiui* te reira i te feia e faaroo ra. 15  A tutava ia fariihia oe e te Atua ei rave ohipa aita e haama ra i ta ’na i rave, o te faaohipa maitai i te parau o te parau mau. 16  Eiaha râ e faaroo i te mau parau faufaa ore e patoi i te mea mo‘a, e faaatea ê hoi te reira i te taata i te Atua, 17  e e parare ta ratou mau parau mai te ma‘i ‘a‘ai. To roto atoa o Humenaio e o Phileto ia ratou. 18  Ua hahi ê raua i te parau mau, te parau nei hoi raua e ua tupu a‘ena te tia-faahou-raa, e te tuino nei raua i te faaroo o te tahi pae. 19  Noa ’tu râ, te mau papu noa ra te niu ta te Atua i haamau ma teie tapao i nia iho: “Ua ite Iehova* i to ’na mau taata,” e “Ia haapae te feia atoa e tiaoro ra i te i‘oa o Iehova* i te parau-tia ore.” 20  E teie nei, i roto i te hoê fare rahi, e ere ïa i te farii* auro e te ario ana‘e, e farii raau atoa râ e te araea, no te hoê faaohiparaa tura vetahi, area vetahi atu no te hoê ïa faaohiparaa tura ore. 21  No reira, ia atea ê mai te tahi i te mau farii no te hoê faaohiparaa tura ore, e riro ïa oia ei mauhaa* no te hoê faaohiparaa tura, tei haamo‘ahia, faufaa no to ’na fatu, tei faaineinehia no te mau ohipa maitatai atoa. 22  No reira, a horo ê i te mau hinaaro o te apîraa, a tapi râ i te parau-tia, te faaroo, te here, te hau e te feia atoa e tiaoro ra i te Fatu ma te aau mâ. 23  Hau atu â, eiaha e faaroo i te mau aimârôraa a te maamaa e te feia ite ore, ua ite hoi oe e e faatupu te reira i te tatama‘iraa. 24  Eiaha roa hoi te hoê tavini a te Fatu e tatama‘i, e hamani maitai râ oia i te taata atoa, ua ite oia i te haapii atu, te haavî ia ’na iho ia hamani-ino-hia mai, 25  te haapii atu na roto i te mǎrû i te feia mârô. Peneia‘e e faatia te Atua ia ratou ia tatarahapa* a ite papu atu ai ratou i te parau mau, 26  ia feruri maitai faahou ratou e ia ora mai i te marei a te Diabolo, inaha hoi ua haru-ora-noa-hia ratou e ana no te rave i to ’na hinaaro.

Nota i raro i te api

“Haafifi ia ’na” na roto i te reo Heleni.
Nehenehe atoa e hurihia “te mau ohipa o te mau mahana atoa.”
“Hei upoo” na roto i te reo Heleni.
Aore ra “E haro‘aro‘a ia oe.”
“E huero o ’na no roto mai ia Davida” na roto i te reo Heleni.
“Faaite maitai” na roto i te reo Heleni.
Aore ra “vavahi,” “tuino.”
A hi‘o i te titionare.
A hi‘o i te titionare.
Aore ra “au‘a.”
Aore ra “farii,” “au‘a.”
Aore ra “ia taui i to ratou mana‘o.”