Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Timoteo 1, 6:1-21

HAAPOTORAA O TE MAU TUMU PARAU

  • Ia faatura te mau tîtî i to ratou mau fatu (1, 2)

  • Orometua haavare e nounou moni (3-10)

  • Faaueraa no te taata o te Atua (11-16)

  • Ia rahi te ohipa maitatai (17-19)

  • A tapea noa i tei tuuhia ’tu ia oe (20, 21)

6  Ia faatura maite noa te mau tîtî* i to ratou mau fatu ia ore roa te i‘oa o te Atua e ta ’na haapiiraa ia faainohia.  Eiaha atoa te mau tîtî ia hi‘o ino i to ratou mau fatu e tiaturi ra ia Iesu no te mea e taeae ratou. Tera râ, ia tavini atu â ratou ma te aau tae, no te mea te feia e fana‘o i ta ratou ohipa maitai, te tiaturi ra ïa ia Iesu e e taeae herehia ratou. A tamau i te haapii atu i teie mau mea e te horoa ’tu i teie mau a‘oraa.  Ia haaparare noa ’tu te tahi taata i te mau haapiiraa hape, e ia ore oia ia farii i te haapiiraa maitai* no ǒ mai i to tatou Fatu ra o Iesu Mesia e te haapiiraa e au i te haamoriraa i te Atua,  e taata faaoru ïa e te teoteo, e aita oia e taa ra i te hoê noa ’‘e mea. To nia noa to ’na feruriraa* i te mau uiuiraa e te aimârôraa parau. E faatupu te reira i te nounou, te peapea, te parau faaino,* te mana‘o ino,  te tatama‘iraa hopea ore i nia i te mau parau rii faatupuhia e te taata feruriraa viivii e tei ere i te parau mau, ma te mana‘o e e apîhia ratou i te haamoriraa i te Atua.  Oia iho â, e apî rahi to te haamoriraa i te Atua ana‘e e te mauruururaa i te mea e vai ra.  Aita hoi ta tatou e tao‘a i hopoi mai a fanauhia mai ai tatou i roto i teie nei ao, e aita ta tatou e tao‘a e hopoi na muri ia tatou ia pohe tatou.  No reira, te vai ra ta tatou maa e te ahu,* e mauruuru tatou i te reira.  Area te feia e onoono ra i te titau i te tao‘a rahi, e topa ïa i roto i te faahemaraa, te marei e te hinaaro ino e te maamaa e rave rahi, a mou roa ’tu ai ratou. 10  O te nounou moni hoi te tumu o te mau mea ino atoa, e no te nounou moni i atea ê ai te tahi pae i te faaroo e i roohia ’i i te mauiui e rave rahi. 11  O oe râ te taata no te Atua, a horo ê oe i teie mau mea. A tapi râ i te parau-tia, te haamoriraa i te Atua ana‘e, te faaroo, te here, te faaoromai tamau e te mǎrû. 12  A aro i te aroraa maitai roa o te faaroo. A mau maite i te ora mure ore i titau-manihini-hia ’i oe e ta oe i faaite maitai i mua e rave rahi ite. 13  I te aro o te Atua o te horoa nei i te ora i te mau mea atoa, e to te Mesia ra o Iesu tei horoa i te hoê faaiteraa maitai i mua ia Ponotio Pilato, te faaue nei au ia oe 14  ia haapao i te faaueraa ma te viivii ore e te hapa ore e ia faaite-roa-hia mai to tatou Fatu ra o Iesu Mesia. 15  Ia tae i te tau faataahia e faaite mai ai te Arii oaoa hoê roa ia ’na iho. Oia te Arii o te feia e faatere ra ei arii, e te Fatu o te feia e faatere ra ei fatu, 16  tei ia ’na ana‘e ra te pohe ore, te parahi ra oia i roto i te maramarama eita e raeahia, aita hoê a‘e taata i ite ia ’na, e ore atoa e nehenehe e hi‘o atu. Ei ia ’na ra te hanahana e te puai mure ore. Amene. 17  A poroi* i te feia tao‘a rahi o te faanahoraa nei o te ao nei* eiaha e teoteo,* e ia tuu i to ratou tiaturiraa, eiaha i te mau tao‘a e pê, i te Atua râ o te horoa mai i te mau mea atoa ta tatou e fana‘o ra. 18  A parau ia ratou ia rave i te maitai, ia rahi ta ratou ohipa maitai roa, ia horoa noa e ia tufa ’tu ma te aau tae, 19  ma te faaherehere no ratou i te hoê niu maitai roa no a muri a‘e a mau papu atu ai ia ratou te ora mau. 20  Timoteo, a tapea noa i tei tuuhia ’tu ia oe, ma te fariu ê i te mau parau faufaa ore e patoi ra i te mea mo‘a e te mau aimârôraa e parauhia ra ma te hape e “ite.” 21  No to ratou faaiteite-haere-raa i teie huru ite i hahi ê ai vetahi i te faaroo. Ei ia oe ra te hamani maitai rahi o te Atua.

Nota i raro i te api

“Te mau tîtî i raro a‘e i te zugo” na roto i te reo Heleni.
Aore ra “faufaa.”
Aore ra “Ua maamaa oia.”
Aore ra “parau tano ore.”
Aore ra “tamaru.” “Tapo‘i” na roto i te reo Heleni.
Aore ra “faaue.”
Aore ra “te tau nei.” A hi‘o i te titionare.
Aore ra “eiaha to ratou e mana‘o faateitei.”