Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Timoteo 1, 4:1-16

HAAPOTORAA O TE MAU TUMU PARAU

  • A ara i te mau haapiiraa a te mau demoni (1-5)

  • Te tavini maitai a te Mesia (6-10)

    • Te faaetaetaraa tino e te haamoriraa i te Atua ana‘e (8)

  • Haapao maitai i ta oe haapiiraa e horoa (11-16)

4  Tera râ, te haapapu ra te parau no ǒ mai i te varua o te Atua* e, i te mau tau e haere mai ra, e faarue te tahi pae i te faaroo no to ratou tâu‘araa i te mau poroi faauruhia haavare* e te mau haapiiraa a te mau demoni,  na roto i te huru haavarevare o te feia e haavare, to ratou hoi te mana‘o haava i tapaohia i te auri ama.  Te opani ra ratou i te taata ia faaipoipo e te faahepo ra ia haapae i te tahi mau maa, ta te Atua hoi i poiete ia amuhia ma te haamaitai e te feia faaroo tei ite papu i te parau mau.  E mea maitai hoi te mau mea atoa ta te Atua i poiete, eiaha roa ïa te tahi ia haapaehia ua amu-ana‘e-hia ma te haamaitai,  ua haamo‘ahia hoi te reira na roto i te parau a te Atua e te pure.  Ia horoa oe i teie a‘oraa i te mau taeae, e riro oe ei tavini maitai roa a te Mesia ra o Iesu, e tavini hoi tei faatamaahia i te mau parau o te faaroo e o te haapiiraa maitai ta oe e pee maite ra.  Eiaha râ e faaroo i te mau aai o te faatura ore i te Atua, mai ta te tahi mau ruau vahine e faatia na. Tera râ, a haamataro maite ia oe e ia riro te haamoriraa i te Atua ana‘e ei fa na oe.  Aita rea hoi e faufaa to te faaetaetaraa tino,* o te haamoriraa râ i te Atua ana‘e te mea faufaa i te mau mea atoa, e fana‘o atu ai i te haamaitairaa i roto i teie oraraa nei e to a muri a‘e tei fafauhia mai.  E nehenehe teie parau e tiaturihia e e farii-roa-hia. 10  No reira tatou e rohi e e tautoo ai, no te mea ua tiaturi tatou i te Atua ora, te Faaora no te mau huru taata atoa, no te taata faaroo iho â râ. 11  A tamau i te horoa ’tu i teie mau faaueraa e i te haapii ia ratou. 12  Eiaha roa ei taata e vahavaha i to apîraa. Tera râ, ia riro oe ei hi‘oraa no te feia faaroo, i te parau hoi, te haerea, te here, te faaroo e te vai-viivii-ore-raa.* 13  A tamau i te haamataro i te taio maitai i mua i te taata atoa, e te a‘o* atu e te haapii atu, e ia tae roa ’tu vau. 14  Eiaha e haafaufaa ore i te ô e vai ra i roto ia oe, tei horoahia mai na roto i te hoê parau tohu no oe, i to te tino matahiapo tuuraa i te rima i nia iho ia oe. 15  A feruri maite* e a mana‘o noa i teie mau mea atoa nei ia ite maitai te taata atoa e te nuu ra oe i mua i te pae varua. 16  A haapao maitai ia oe iho e i te mau haapiiraa ta oe e horoa. A rave noa i teie mau mea atoa nei, mea na reira hoi oe iho e ora mai ai e te feia e faaroo ia oe.

Nota i raro i te api

“Te haapapu ra te varua” na roto i te reo Heleni.
“Te mau varua haavare” na roto i te reo Heleni.
Aore ra “ia haaponapona i te tino.”
Aore ra “te vai-mâ-raa.”
Aore ra “faaitoito.”
Aore ra “A feruriruri.”