Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Timoteo 1, 3:1-16

HAAPOTORAA O TE MAU TUMU PARAU

  • Titauraa no te mau tiaau (1-7)

  • Titauraa no te mau tavini tauturu (8-13)

  • Parau huna mo‘a o te haamoriraa i te Atua ana‘e (14-16)

3  E nehenehe teie parau e tiaturihia: Ia titau te hoê tane i te hopoia tiaau, te hinaaro ra oia i te hoê ohipa maitai.  Eiaha ta te tiaau e hapa ia itehia, ei tane faaipoipo i te vahine hoê râ, te haerea au noa, te mana‘o paari,* te haerea afaro, te farii i te taata, te ite i te haapii,  e ere i te taata inu ava, te taata haavî,* e feruriraa au noa râ to ’na, e ere i te taata imi hara, te nounou moni,  e tane e faatere* maitai i to ’na iho utuafare, e auraro maite hoi ta ’na mau tamarii ia ’na ma te tura  (ia ore hoi te tahi tane ia ite i te faatere* i to ’na iho utuafare, e nafea ïa oia e aupuru ai i te amuiraa a te Atua?),  e ere i te hoê tane no riro noa mai nei ei pǐpǐ, a faaoru atu ai oia no te teoteo e a roohia ’tu ai i te hoê â utua e ta te Diabolo.  Ei roo maitai* atoa to ’na i te feia no rapae e tia ’i, ia ore oia ia faainohia e te taata* e ia topa ’tu i roto i te marei a te Diabolo.  Na reira atoa, ei tane haapao maitai te mau tavini tauturu e tia ’i, eiaha te vaha piti,* te inu hua i te uaina e te nounou faufaa,  o te mau papu râ i te parau huna mo‘a o te faaroo ma te mana‘o haava mâ. 10  E ia tamatahia ratou na mua ia itehia e e au anei ia ratou taua hopoia ra.* E aita ana‘e e mea e faahapa ra ia ratou, ia riro ïa ratou ei tavini tauturu. 11  Na reira atoa, ei mana‘o paari to te mau vahine e tia ’i, eiaha te afai parau haavare e te faaino, ei haerea au noa râ to ratou, e te haapao maitai i ta ratou mau ohipa atoa. 12  Ei tane faaipoipo i te vahine hoê te mau tavini tauturu e tia ’i, e te faatere maitai i ta ratou mau tamarii e to ratou iho utuafare. 13  E roo maitai hoi te noaa ra i te mau tane e rave maitai i ta ratou taviniraa, oia atoa râ te itoito rahi i te parau no nia i to ratou faaroo i te Mesia ra o Iesu. 14  E hinaaro rahi to ’u e farerei ia oe, ia ore noa ’tu râ vau ia tae oioi atu, te papai nei au i teie nei mau parau 15  ia ite oe e mea nafea oe i roto i te utuafare o te Atua e tia ’i, oia hoi te amuiraa a te Atua ora, te pou e te paturu o te parau mau. 16  Oia mau, e parau rahi te parau huna mo‘a o te haamoriraa i te Atua ana‘e: ‘Ua itehia Iesu ei taata, ua farii-maitai-hia ei varua, ua fa i te mau melahi, ua porohia to ’na parau i te mau nunaa ěê, ua tiaturihia na te ao nei, e ua fariihia i te ra‘i ma te hanahana.’

Nota i raro i te api

Aore ra “te feruriraa maitai,” “te haro‘aro‘a.”
Aore ra “tupai e te iria.”
Aore ra “tiaau.”
Aore ra “tiaau.”
Aore ra “parau maitai.”
Aore ra “ia ore oia ia haama.”
Aore ra “te haavarevare.”
Aore ra “ia itehia e te haapao ra anei ratou i te mau titauraa.”