Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Timoteo 1, 1:1-20

HAAPOTORAA O TE MAU TUMU PARAU

  • Aroharaa

  • A ara i te mau orometua haavare (3-11)

  • Hamani-maitai-rahi-hia Paulo (12-16)

  • Arii mure ore (17)

  • ‘A aro i te aroraa maitai’ (18-20)

1  O Paulo, e aposetolo na te Mesia ra o Iesu na roto i te faaueraa a te Atua to tatou Faaora e na roto atoa i te faaueraa a te Mesia ra o Iesu, te niu o to tatou tiaturiraa,  ia Timoteo,* e tamaiti mau na ’u i roto i te faaroo: Ei ia oe te hamani maitai rahi, te aroha* e te hau no ǒ mai i te Atua te Metua e i te Mesia ra o Iesu to tatou Fatu.  Mai ta ’u i faaitoito ia oe e faaea i Ephesia i to ’u faaineineraa e haere i Makedonia, te na reira faahou atu nei au, ia faaue hoi oe i te tahi pae eiaha e haaparare i te mau haapiiraa hape,  eiaha atoa e tâu‘a ’tu i te mau aai e te mau pǎpǎraa tupuna. Aita hoi to te reira e faufaa, hopea ore noa râ i te faatupu i te aimârô, eita râ e noaa mai te tahi noa ’‘e maitai no ǒ mai i te Atua ia au i te faaroo.  Te fa o teie faaueraa,* o te here ïa no roto mai i te hoê aau mâ e te hoê mana‘o haava maitai e te faaroo haavarevare ore.  Ua atea ê vetahi i taua mau mea nei a faaô atu ai ia ratou i roto i te tahi mau utataraa faufaa ore.  E hinaaro ratou e riro ei orometua no te ture, tera râ, aita nei hoi ratou e taa ra i te mau mea ta ratou e parau ra aore ra ta ratou e mârô u‘ana ra.  E teie nei, ua ite tatou e e mea maitai te ture a Mose, ia faaohipa-maitai-hia râ.*  Te farii atoa ra tatou e aita taua ture ra i haamauhia no te hoê taata parau-tia, no te feia ofati ture râ e te orure hau, te tiaturi ore i te Atua e te rave hara, e te taiva,* e te vahavaha i te mea mo‘a, e te taparahi pohe i to ’na metua tane e metua vahine, e te taparahi taata, 10  e te rave i te mau peu taotoraa tia ore,* e te tane e taoto i te tane, e te haru taata, e te haavare, e te ore e tapea i ta ’na euhe,* e te rave i te mau mea atoa e patoi ra i te haapiiraa maitai* 11  tei au i te parau apî oaoa* hanahana a te Atua oaoa tei horoahia mai ia ’u. 12  Te mauruuru nei au i te Mesia ra o Iesu to tatou Fatu tei haapuai ia ’u no te mea ua ite mai oia i to ’u haapao maitai ma te faatoroa ia ’u no te hoê taviniraa, 13  noa ’tu e na mua ’‘e e taata faaino vau i te Atua e te hamani ino i te taata e te faateitei. Ua arohahia mai râ vau,* no te mea i na reira na vau no te taa ore e te ereraa i te faaroo. 14  Ua rahi roa râ te hamani maitai rahi o to tatou Fatu, e ua rahi roa atoa te faaroo e te here no ǒ mai i te Mesia ra o Iesu. 15  E nehenehe teie parau e tiaturihia e e farii-roa-hia: Ua haere mai te Mesia ra o Iesu i te ao nei no te faaora i te feia hara. O vau nei hoi te taata hara roa ’‘e. 16  Ua arohahia mai râ vau,* a nehenehe atu ai te Mesia ra o Iesu e faaite atu i te rahi o to ’na faaoromai na roto ia ’u te taata hara roa ’‘e, ei hi‘oraa ïa no te feia atoa e tuu i to ratou faaroo ia ’na, a noaa mai ai ia ratou te ora mure ore. 17  E teie nei, ei te Arii mure ore ra, te tahuti ore e te ite-ore-hia, te Atua hoê roa, te tura ïa e te hanahana e a muri noa ’tu. Amene. 18  Teie te faaueraa* ta ’u e tuu ia oe Timoteo ta ’u tamaiti, ia au i te mau parau i faaite-atea-hia no oe, e maoti hoi taua mau parau nei, ia nehenehe oe ia aro noa i te aroraa maitai, 19  ma te tapea i te faaroo e te hoê mana‘o haava maitai, ta te tahi pae hoi i tuu i te hiti, a mou atu ai to ratou faaroo mai te hoê pahi tei tomo i raro i te miti. 20  To roto atoa o Humenaio e o Alesanedero, e ua tuu vau ia raua ia Satani ra* ia haapiihia e ia a‘ohia raua eiaha e faaino i te Atua.

Nota i raro i te api

“Tei faahanahana i te Atua” te auraa.
Aore ra “aroha hamani maitai.”
Aore ra “faaueraa mana.”
“Ia faaohipahia râ ma te tia” na roto i te reo Heleni.
Aore ra “te taata e ere ra i te here taiva ore.”
A hi‘o i te titionare.
Aore ra “te tǎpǔ haavare.”
Aore ra “faufaa.”
Aore ra “evanelia.”
Aore ra “Ua aroha-hamani-maitai-hia râ vau.”
Aore ra “Ua aroha-hamani-maitai-hia râ vau.”
Aore ra “faaueraa mana.”
Oia hoi ua tiavaruhia raua i rapae i te amuiraa.