Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Tesalonia 2, 3:1-18

HAAPOTORAA O TE MAU TUMU PARAU

  • A tamau i te pure (1-5)

  • A ara i te haerea haapaoraa ore (6-15)

  • Aroharaa hopea (16-18)

3  Taeae ma, e teie nei, a tamau i te pure no matou ia atutu noa te parau a Iehova* e ia faahanahana-noa-hia, mai te ravehia ra i ǒ outou,  e ia paruruhia matou i te feia totoa e te ino, aita hoi te faaroo i noaa i te taata atoa.  Tera râ, e tapea te Fatu i ta ’na parau, e e faaitoito oia ia outou e e paruru atu i te varua ino.*  E te tiaturi nei matou ia outou i te Fatu e te haapao nei outou e e haapao noa â outou i ta matou mau faaueraa.  Ia aratai noa te Fatu i to outou aau a here atu ai outou i te Atua e a faaoromai tamau atu ai ma te pee i te Mesia.  Taeae ma, te faaue nei matou ia outou i te i‘oa o to tatou Fatu ra o Iesu Mesia, ia atea ê mai outou i te mau taeae atoa e haerea tano ore to ratou, o te ore hoi e tu i te mau parau* ta matou i tuu atu ia outou.*  Ua ite hoi outou e nafea ia pee i to matou haerea e tia ’i, no te mea e ere to matou i te haerea tano ore a parahi ai i rotopu ia outou,  e aita atoa matou i amu noa i ta vetahi ê ra maa.* Tera râ, ma te rohi e te tautoo ua rave noa matou i te ohipa i te po e te ao, eiaha matou ia faateimaha i te hoê o outou i te moni rahi.  E ere hoi aita to matou e tiaraa e na reira, ua faaite râ matou i te hi‘oraa maitai na outou ia pee mai. 10  A parahi ai hoi matou i ǒ outou, teie hoi ta matou i faaue na: “Ia ore te tahi ia hinaaro e rave i te ohipa, eiaha atoa ïa e tamaa.” 11  Ua faaroo hoi matou e e haerea tano ore to vetahi i rotopu ia outou, aita roa e rave ra i te ohipa, e faaô noa râ ia ratou i roto i ta vera ma ohipa. 12  O tera mau taata ta matou e faaue nei e e a‘o atu nei na roto i te Fatu ra o Iesu Mesia, ia ora hau ma te rave i ta ratou iho ohipa e ia amu i te maa i noaa ia ratou. 13  Outou râ, taeae ma, eiaha e fiu i te rave i te mea maitai. 14  Ia ore râ te tahi ia faaroo i ta matou parau i roto i teie rata, a tapao ia ’na e eiaha faahou e amuimui atu, ia haama oia. 15  Eiaha râ e hi‘o ia ’na mai te enemi ra, e tamau noa râ i te a‘o ia ’na mai te taeae ra te huru. 16  E teie nei, na roto i te mau ravea atoa, ia horoa-noa-hia ’tu te hau no outou e te Fatu iho o te hau. Ei ia outou paatoa te Fatu. 17  Te faatae atu nei au, o Paulo, i to ’u aroha ta ’u i papai i to ’u iho rima, o ta ’u ïa tapao i roto i ta ’u mau rata atoa. 18  Ei ia outou paatoa te hamani maitai rahi o to tatou Fatu ra o Iesu Mesia.

Nota i raro i te api

A hi‘o i te titionare.
Aore ra “ia Satani.”
Aore ra “faaueraa.”
Nehenehe atoa e hurihia “ratou.”
Aore ra “i amu i ta vetahi ê ra maa ma te ore e aufau.”