Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Tesalonia 1, 5:1-28

HAAPOTORAA O TE MAU TUMU PARAU

  • Te haere mai ra te mahana o Iehova (1-5)

    • “Te hau e te ati ore!” (3)

  • A vai ara, a feruri maite (6-11)

  • A‘oraa (12-24)

  • Aroharaa hopea (25-28)

5  Taeae ma, e teie nei, aita e titauhia ra ia papai atu vau no te taime e te tau.  Ua ite maitai hoi outou e te haere mai ra te mahana o Iehova* mai te eiâ ra i te po.  I te taime e parau ai ratou: “Te hau e te ati ore!” ei reira iho e haamouhia ’i ratou ma te mana‘o-ore-hia, mai te vahine hapû ia roohia e te mauiui fanau, e aita roa e hororaa no ratou.  Outou râ, taeae ma, aita outou i roto i te poiri a roohia ’i outou e taua mahana ra mai te eiâ ra e roohia i te hitiraa mahana,  e tamaiti hoi outou paatoa no te maramarama e e tamaiti no te ao. E ere tatou no te po, e ere atoa no te poiri.  No reira, eiaha tatou e taoto mai te tahi pae ra, e vai ara râ e e feruri maite ana‘e.  Te feia hoi e taoto, i te po ratou e taoto ai, e te feia e taero ra i te ava, i te po ratou e taero ai.  Area tatou no te ao, e feruri maite ana‘e e e ahu ana‘e i te tapo‘i ouma o te faaroo e te here, e te taupoo o te tiaturiraa i te faaoraraa  no te mea ua maiti te Atua ia tatou, eiaha ia roohia e to ’na riri, ia noaa mai râ te faaoraraa na roto i to tatou Fatu ra o Iesu Mesia 10  tei pohe no tatou ia ora tatou e o ’na atoa, ara noa ’i aore ra taoto noa ’i tatou.* 11  No reira, a tamau i te faaitoito* e te tauturu te tahi i te tahi, mai ta outou hoi e rave nei. 12  Taeae ma, teie ta matou aniraa ia outou, ia faatura ia ratou e rohi ra i rotopu ia outou e e aratai ra ia outou i te taviniraa i te Fatu e e a‘o ra ia outou. 13  E ia hau atu â to outou hamani maitai ia ratou ma te here, no ta ratou hoi ohipa e rave ra. Ia vai noa te hau i rotopu ia outou. 14  Taeae ma, te ani ru atu nei râ matou ia outou ia faaara* i te feia haerea tano ore, e ei parau mahanahana ta outou i te feia e hepohepo* ra, e turu i tei paruparu, e faaoromai i te taata atoa. 15  A ara eiaha te tahi ia tahoo i te tahi i te ino, ia tapi noa râ outou i te mea maitai no te tahi e te tahi, e te taata atoa. 16  Ia oaoa noa outou. 17  A tamau i te pure. 18  A haamauruuru i te Atua no te mau mea atoa, ta ’na ïa e hinaaro ia tatou na roto i te Mesia ra o Iesu. 19  Eiaha e tupohe i te auahi o te varua mo‘a. 20  Eiaha e vahavaha i te mau parau tohu. 21  Ia papu ia outou te mau mea atoa, a mau noa ’tu ai i te mea maitai roa. 22  A haapae i te mau mea iino e rave rau. 23  Ia haamo‘a te Atua o te hau ia outou. Ia tura noa te huru feruriraa,* te ora* e te tino no outou, te mau taeae, i te mau mea atoa, e ia vai hapa ore noa e tae roa ’tu ai i te tau o te ho‘iraa mai* o to tatou Fatu ra o Iesu Mesia. 24  E haapao maitai to te Atua tei titau manihini ia outou, e e na reira noa iho â oia. 25  Taeae ma, a pure noa no matou. 26  A aroha ’tu i te mau taeae atoa ma te apa ’tu i te here taeae. 27  E hopoia faufaa mau ta ’u ia outou i te i‘oa ra o te Fatu, ia taiohia teie rata i te mau taeae atoa. 28  Ei ia outou ra te hamani maitai rahi o to tatou Fatu ra o Iesu Mesia.

Nota i raro i te api

A hi‘o i te titonare.
Aore ra “taoto noa ’i tatou i roto i te pohe.”
Aore ra “tamahanahana.”
Aore ra “a‘o.”
Aore ra “toaruaru.”
Heleni peneuma. A hi‘o i te titionare.
Heleni pusuke. A hi‘o i te titionare.
Heleni parusia. A hi‘o i te titionare.