Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Tesalonia 1, 4:1-18

HAAPOTORAA O TE MAU TUMU PARAU

  • A ara i te peu taotoraa tia ore (1-8)

  • A here atu â te tahi i te tahi (9-12)

    • Eiaha “e faaô i roto i to vetahi ê oraraa” (11)

  • Na mua te feia pohe tei hoê e te Mesia i te tia faahou mai (13-18)

4  Taeae ma, ua horoa ’tu matou i te a‘oraa no nia i to outou haerea ia mauruuru te Atua ia outou, e te na reira ra hoi outou. E teie nei, te ani e te taparu atu nei matou na roto i te Fatu ra o Iesu ia na reira noa ’tu â outou.  Ua ite hoi outou i te mau a‘oraa* ta matou i horoa ’tu na roto i te Fatu ra o Iesu.  Teie hoi te hinaaro o te Atua, ia mo‘a noa outou e ia haapae i te mau peu taotoraa tia ore* e tia ’i.  Ia ite outou tataitahi e nafea ia haavî i to outou iho tino* e tia ’i ma te mo‘a e te tura,  eiaha ma te nounou e te hinaaro faufau vî ore mai to te mau nunaa ite ore i te Atua.  Eiaha roa ’tu te tahi ia hapa e ia faaere i to ’na taeae i taua mea nei, no te mea na Iehova* e faautua i te feia e rave i tera mau hara atoa, mai ta matou i parau a‘ena e i faaara maitai atu.  Ua titau manihini hoi te Atua ia tatou, eiaha ia rave i te mau peu viivii, ia mo‘a râ tatou.  No reira, te taata e vahavaha ra i taua mea nei, te vahavaha ra ïa, eiaha i te taata, i te Atua râ o te horoa mai i to ’na varua mo‘a ia outou.  Tera râ, aita e titauhia ra ia papai atu matou no nia i te here taeae, ua haapiihia hoi outou e te Atua ia here te tahi i te tahi. 10  E oia mau, te na reira ra outou i te mau taeae atoa i Makedonia taatoa. Taeae ma, te ani ru atu nei râ vau ia outou ia na reira noa ’tu â. 11  A tutava i te ora hau noa ma te ore e faaô i roto i to vetahi ê oraraa e a tutava i te rave i te ohipa i to outou iho rima, mai ta matou i faaue atu, 12  ia tura ïa to outou haerea i mua i te feia no rapae e ia ore outou ia ere i te tahi noa ’‘e mea. 13  Taeae ma, e hinaaro atoa matou ia taa ia outou te parau o te feia e taoto ra i roto i te pohe, ia ore outou ia oto mai te tahi pae ra no te mea aita to ratou e tiaturiraa. 14  Ia tiaturi hoi tatou e ua pohe o Iesu e ua tia faahou mai, e aratai atoa ïa te Atua ia Iesu ra te feia atoa tei taoto i roto i te pohe e tei hoê e oia. 15  Teie ïa ta matou parau ia outou ia au i te parau a Iehova,* tatou hoi te feia ora o te ora ’tu i te tau o te ho‘iraa mai* o te Fatu, eita roa ’tu ïa tatou e na mua ’tu i te feia i taoto i roto i te pohe. 16  No te mea e pou mai te Fatu iho mai te ra‘i mai, e e faaroohia to ’na reo mana, to te melahi rahi ïa, e te pu a te Atua, e na mua te feia pohe tei hoê e te Mesia te tia faahou mai. 17  I muri mai, o tatou te feia ora o te ora ’tu te ravehia i roto i te ata ia farerei i te Fatu i nia i te ra‘i e o ratou atoa, ei reira tatou e vai noa ’i i te Fatu ra. 18  No reira, a tamau i te tamahanahana te tahi i te tahi na roto i teie mau parau.

Nota i raro i te api

Aore ra “faaueraa.”
A hi‘o i te titionare.
“Au‘a” na roto i te reo Heleni.
A hi‘o i te titionare.
A hi‘o i te titionare.
Heleni parusia. A hi‘o i te titionare.