Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Tesalonia 1, 3:1-13

HAAPOTORAA O TE MAU TUMU PARAU

  • To Paulo tiai-noa-raa i Ateno ma te hepohepo (1-5)

  • Faatia mai Timoteo i te hoê parau faaitoito (6-10)

  • Pure no to Tesalonia (11-13)

3  Aita vau* i nehenehe e faaoromai faahou, faaoti ihora ïa vau e mea maitai a‘e ia faaea o vau* ana‘e i Ateno.  Tono atura vau* ia Timoteo, to tatou taeae e tavini na te Atua* no te parau apî oaoa no nia i te Mesia, no te haapuai* e tamahanahana ia outou no te maitai o to outou faaroo,  ia ore te tahi ia aueue* i taua mau ati ra. Ua ite hoi outou e e roohia iho â tatou i taua mau mea ra.*  Ua faaite a‘ena ’tu vau,* a parahi ai i rotopu ia outou, e e roohia tatou e te ati, e tera iho â tei tupu mai ta outou e ite ra.  Aita vau i nehenehe e faaoromai faahou, no reira vau i tono ai ia ’na ia ite au e te mau papu ra anei outou i te faaroo e aita anei te Diabolo i faahema ia outou, a faufaa ore atu ai to matou rohiraa no outou.  I teie nei râ, no ho‘i noa mai nei o Timoteo no ǒ ia outou ra, e ua faatia mai oia i te parau oaoa o to outou faaroo e to outou here, e te oaoa noa ra outou a mana‘o ai ia matou. E te ru nei outou i te ite ia matou, e o matou atoa hoi.  No outou ïa, taeae ma, e no te faaroo ta outou e faaite i tamahanahanahia ’i matou i to matou hepohepo* e ati atoa.  No te mea e itoitohia mai* matou ia mau papu outou i roto i te Fatu.  E nafea hoi matou e nehenehe ai e haamauruuru i te Atua no outou, no te mea e oaoa iti rahi to matou ia outou i te aro o te Atua? 10  Ma te aau tae, e taparuparu noa matou i te po e te ao ia farerei tino* matou ia outou, a noaa ’tu ai ia outou te mea e ere ra, ia puai to outou faaroo. 11  E teie nei, ia arataihia matou e to tatou Atua e Metua, e ia aratai-atoa-hia matou e to tatou Fatu ra o Iesu na te e‘a e tae atu ai i ǒ outou ra. 12  Hau atu â, ia faarahi te Fatu i to outou here, oia mau, ia here rahi roa outou te tahi i te tahi e i te taata atoa, mai ta matou e here ra ia outou, 13  e na roto ia ’na e itoitohia ’i to outou aau, ma te hapa ore e te mo‘a i te aro o to tatou Atua e Metua i te tau o te ho‘iraa mai* o to tatou Fatu ra o Iesu e to ’na atoa ra feia mo‘a.

Nota i raro i te api

“Matou” na roto i te reo Heleni.
“Matou” na roto i te reo Heleni.
“Matou” na roto i te reo Heleni.
Nehenehe atoa e hurihia “hoa ohipa no te Atua.”
Aore ra “faaitoito.”
“Taueue” na roto i te reo Heleni.
Aore ra “e ua faataahia tatou no taua mau mea ra.”
“Matou” na roto i te reo Heleni.
“Ereraa” na roto i te reo Heleni.
“E ora” na roto i te reo Heleni.
“Ite mata” na roto i te reo Heleni.
Heleni parusia. A hi‘o i te titionare.