Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Tesalonia 1, 2:1-20

HAAPOTORAA O TE MAU TUMU PARAU

  • Ta Paulo taviniraa i Tesalonia (1-12)

  • Ua farii to Tesalonia i te parau a te Atua (13-16)

  • E hinaaro rahi to Paulo e farerei i to Tesalonia (17-20)

2  Taeae ma, ua ite maitai outou e aita to matou tere i ǒ outou i faufaa ore.  Na mua ua haamauiuihia mâua e ua hamani-ino-hia i Philipi, mai ta outou hoi i ite. Noa ’tu râ, ua horoa mai to tatou Atua i te mǎta‘u ore* no te faaite ia outou i te parau apî oaoa a te Atua a faaruru noa ’i i te patoiraa u‘ana.*  E ere hoi ta matou a‘oraa e horoa ’tu no roto mai i te mea hape e te viivii aore ra te haavare,  ua fariihia râ matou e te Atua tei horoa mai i te parau apî oaoa e parau atu ai matou, eiaha ia mauruuru te taata, ia mauruuru râ te Atua o te hi‘opoa i to matou aau.  Ua ite mau outou e aita roa matou i faahiti i te parau aminamina ia outou aore ra i faahua taata maitai no te huna i to matou nounou, o te Atua te ite!  Aita atoa matou i titau i te taata, outou anei aore ra te tahi atu, ia faahanahana mai ia matou noa ’tu e nehenehe matou, te mau aposetolo a te Mesia, e faateimaha ia outou i te moni rahi.  Tera râ, e feia hamani maitai matou i rotopu ia outou, e mai te hoê metua vahine e faatamaa ra e e aupuru ra* i ta ’na iho mau tamarii.  E no te rahi o to matou here ia outou, ua faaoti papu matou e faaite atu* i te parau apî oaoa a te Atua e e horoa atoa i to matou ora* no te tauturu atu, no te mea ua here roa matou ia outou.  Taeae ma, te haamana‘o ra outou i to matou rohiraa e tautooraa. Ua rave matou i te ohipa i te po e te ao eiaha matou ia faateimaha i te hoê o outou i te moni rahi a poro ai matou i te parau apî oaoa a te Atua. 10  O outou te ite, oia atoa te Atua, ua tauturu matou ia outou e tiaturi ra ia Iesu ma te haapao maitai e te tia e te hapa ore. 11  Ua ite maitai outou e, mai te hoê metua tane ra i ta ’na mau tamarii, ua tamau noa matou i te a‘o e te tamahanahana e te faaara ia outou tataitahi, 12  ia au noa to outou haerea i te Atua tei titau manihini ia outou ia fatu i ta ’na Faatereraa arii* e to ’na hanahana. 13  No reira atoa matou e haamauruuru noa ’i i te Atua, no te mea i to outou fariiraa i te parau a te Atua ta outou i faaroo ia matou nei, ua farii outou i te reira eiaha mai te parau a te taata, mai te parau iho â râ a te Atua, o te ohipa atoa ra i roto ia outou e tiaturi ra ia Iesu. 14  Taeae ma, ua pee hoi outou i te hi‘oraa o te mau amuiraa o te Atua i Iudea tei hoê e te Mesia ra o Iesu, no te mea ua hamani-ino-hia outou i te rima o te feia no to outou iho fenua, mai te mau taeae o Iudea i hamani-ino-atoa-hia i te rima o te ati Iuda 15  tei tae roa i te haapohe i te Fatu ra o Iesu e te mau peropheta, e tei hamani ino ia tatou. Hau atu â, aita te Atua e mauruuru ra ia ratou, e ta ratou e rave ra, e ere ïa no te maitai o te taata atoa, 16  te tamata ra hoi ratou i te opani ia tatou ia poro i te feia o te mau nunaa ěê a nehenehe atu ai taua feia ra e faaorahia. A na reira ’i ratou, te maraa noa ’tu ra ïa te faito o ta ratou mau hara. Tera râ, e tae mai iho â te riri o te Atua i nia ia ratou. 17  Taeae ma, ia matou râ i faataa-ê-hia* ia outou no te hoê tau poto, i te mata noa, eiaha râ i to matou aau, ua tutava mau matou ma te hinaaro rahi e farerei tino* ia outou. 18  No reira matou i hinaaro ai e haere i ǒ outou, o vau o Paulo nei, e ere hoê noa taime to ’u opuaraa, e piti râ. Ua tâpûhia râ to matou e‘a e Satani. 19  O vai hoi to matou tiaturiraa, oaoaraa, aore ra hei upoo haapeuraa i mua i te Fatu ra o Iesu i te tau o to ’na ho‘iraa mai?* E ere anei o outou? 20  O outou mau to matou hanahana e oaoaraa.

Nota i raro i te api

Aore ra “itoito.”
Nehenehe atoa e hurihia “i roto â i te fifi rahi.”
Aore ra “e poihere ra.”
“Ua oaoa matou i te faaite atu” na roto i te reo Heleni.
Heleni pusuke. A hi‘o i te titionare.
Aore ra “to ’na Basileia.”
Aore ra “faaerehia.”
“E ite mata” na roto i te reo Heleni.
Heleni parusia. A hi‘o i te titionare.