Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Roma 9:1-33

HAAPOTORAA O TE MAU TUMU PARAU

  • Oto Paulo no Iseraela pae tino (1-5)

  • Te huaai mau o Aberahama (6-13)

  • Eita e nehenehe e faahapa i te maitiraa a te Atua (14-26)

    • Farii o te riri e farii arohahia (22, 23)

  • Mea iti te faaorahia (27-29)

  • Turori o Iseraela (30-33)

9  E parau mau ta ’u e parau atu nei na roto i te Mesia e te arataihia nei to ’u mana‘o haava e te varua mo‘a. Aita ïa vau e haavare nei a na ô atu ai  e oto rahi to ’u e te horuhoru noa ra to ’u aau.  Ahiri e nehenehe ta ’u, ua ineine au i te amo i te utua no to ’u mau taeae, to ’u hoi mau fetii aita e pee ra i te Mesia,  oia hoi te ati Iseraela ta te Atua i farii na ei tamaiti na ’na. Ua faateitei te Atua ia ratou, ua faaau atu i te mau faufaa e ua horoa ’tu i te ture a Mose e te taviniraa mo‘a e te mau parau fafau.  Tei ia ratou atoa te mau tupuna, e no roto mai ia ratou te Mesia i te fanauraahia mai. Ia haamaitaihia te Atua e a muri noa ’tu, e mana hoi to ’na i nia i te mau mea atoa. Amene.  Tera râ, e ere mai te mea ra e aita te parau a te Atua i tupu. E ere hoi i te “Iseraela” mau te taata atoa i fanauhia no roto mai ia Iseraela.  E ere atoa te taatoaraa o te huaai* o Aberahama i te tamarii mau na ’na, ua papaihia hoi: “No roto mai ia Isaaka te feia e parauhia e huaai* no oe.”  Te auraa, e ere ïa tei fanauhia no roto mai ia Aberahama i te tamarii mau na te Atua, te mau tamarii râ i faaitehia mai e te parau fafau, o ratou mau ïa te huaai* o Aberahama i te aro o te Atua.  Teie taua parau fafau ra: “E tae mai au i te taime faataahia e e fanau mai Sara i te hoê tamaiti.” 10  Oia atoa râ, ua tô Rebeka i na maehaa no roto mai ia Isaaka to tatou tupuna. 11  Aita te taata ta te Atua i maiti no ta ’na opuaraa i maitihia ia au i ta ’na mau ohipa, ia au râ i te hinaaro o te Atua. No reira, hou na maehaa a fanauhia mai ai e hou raua a rave ai i te mea maitai aore ra i te mea ino 12  ua parau te Atua ia Rebeka: “E riro te tuaana ei tavini no te teina.” 13  Mai tei papaihia: “Mea here na ’u ia Iakoba, mea hae râ na ’u ia Esau.”* 14  Eaha ïa ta tatou e parau, mea tia ore te Atua? Eiaha roa ’tu! 15  Ua parau hoi oia ia Mose: “E aroha vau* i ta ’u e aroha ’tu* e e faaite au i te aumihi i ta ’u e faaite atu i te aumihi.” 16  No reira, tei te Atua ïa te parau, e Atua aroha* hoi oia, e ere râ tei te taata e hinaaro ra aore ra e tutava ra.* 17  Te parau ra hoi te mau Papai no nia ia Pharao: “Teie mau te tumu i vaiiho noa ’i au ia oe ia ora: no te faaite atu i to ’u puai na roto ia oe e ia faaite-haere-hia to ’u i‘oa na te fenua atoa nei.” 18  No reira, e aroha oia i ta ’na e hinaaro e aroha ’tu, i te feia râ e hinaaro e faaetaeta i to ratou aau, e vaiiho noa ïa oia ia faaetaeta ’tu. 19  E parau mai ïa oe: “No te aha oia e faahapa noa ’i i te taata? O vai hoi te nehenehe e patoi atu i to ’na hinaaro? 20  O vai ïa oe te taata nei no te pahono atu i te Atua? E parau anei te mea i hamanihia i tei hamani ia ’na: “Eaha oe i na reira ’i i te hamani ia ’u?” 21  Eaha? Aita anei to te potera e mana i nia i te araea ia hamani oia no roto mai i te hoê â puea araea e piti farii, hoê no te ohipa tura, area te tahi atu, e ere ïa no te ohipa tura? 22  Eaha ïa ia hinaaro noa ’tu te Atua e faaite i to ’na riri i te feia ino a itehia ’tu ai to ’na puai? E eaha ïa ia faaoromai roa oia i taua feia ra e au i te tahi mau farii o te riri e tano ia haamouhia? 23  Eaha ïa ia tupu noa ’tu taua mau mea ra ia faaitehia te rahi o to ’na hanahana i te feia e au i te mau farii arohahia,* ta ’na hoi i faataa atea no te hanahana, 24  oia hoi o tatou nei ta ’na i titau manihini, eiaha no roto mai i te ati Iuda ana‘e, no roto atoa mai râ i te mau nunaa ěê? 25  Mai ta ’na atoa i parau na roto ia Hosea: “Te feia e ere i te nunaa no ’u, o ta ’u ïa e parau atu ‘to ’u nunaa,’ e te vahine tei ore i herehia, ‘tei herehia’ ïa, 26  e i te vahi i parauhia ’i i to reira, ‘e ere outou i to ’u nunaa,’ e parauhia ïa ratou ‘e tamaiti na te Atua ora.’” 27  E ua poro atoa Isaia no nia ia Iseraela: “Noa ’tu e mai te one tatahi ra te rahi o te mau tamaiti a Iseraela, mea iti te faaorahia. 28  E titau hoi Iehova* i to te fenua ia au i ta ratou i rave, e haapoto* e e rave faahope roa oia i te reira. 29  Mai ta Isaia atoa i tohu na: “Ahiri aita Iehova* o te mau nuu o te ra‘i* i vaiiho mai i te hoê huaai* no tatou, ua riro ïa tatou mai ia Sodoma ra e mai ia Gomora atoa ra.” 30  Eaha ïa ta tatou e parau? Oia hoi, ore noa ’tu â te feia o te mau nunaa ěê e tapi i te parau-tia, ua raea râ ia ratou te parau-tia, te parau-tia ïa no roto mai i te faaroo. 31  Area to Iseraela, tapi noa ’tu â ratou i te ture o te parau-tia, aita i noaa ia ratou ia haapao i taua ture ra. 32  Eaha te tumu? No te mea ua tapi ratou i te reira, eiaha na roto i te faaroo, na roto râ i te ohipa mai ta ratou i mana‘o. Ua turori ratou i nia i te “ofai turoriraa,” 33  mai tei papaihia: “Inaha, te haamau nei au i Ziona i te hoê ofai turoriraa e i te hoê mato hi‘araa. Te taata râ e faatupu i te faaroo i te reira, e ore roa ïa e tatarahapa.”

Nota i raro i te api

“Huero” na roto i te reo Heleni.
“Huero” na roto i te reo Heleni.
“Huero” na roto i te reo Heleni.
“Mea iti râ to ’u here no Esau” te auraa.
Aore ra “E aroha hamani maitai au.”
Aore ra “aroha hamani maitai atu.”
Aore ra “aroha hamani maitai.”
“Aore ra e horo ra” na roto i te reo Heleni.
Aore ra “aroha-hamani-maitai-hia.”
A hi‘o i te titionare.
Aore ra “faaoti oioi.”
A hi‘o i te titionare.
“Iehova sabaota” na roto i te reo Heleni.
“Huero” na roto i te reo Heleni.