Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Roma 8:1-39

HAAPOTORAA O TE MAU TUMU PARAU

  • Ora e tiamâraa na roto i te varua mo‘a (1-11)

  • Haapapuraa a te varua mo‘a e ua farii te Atua ia vetahi ei tamaiti na ’na (12-17)

  • Tiai te mau mea poietehia i te tiamâraa o te mau tamarii a te Atua (18-25)

  • ‘Na te varua o te Atua e ani onoono no tatou’ (26, 27)

  • Faataa-a‘ena-hia e te Atua (28-30)

  • Upootia na roto i te here o te Atua (31-39)

8  No reira, tei hoê e te Mesia ra o Iesu, eita ratou e faahapahia.  No te mea, te ture a te varua o te Atua o te horoa i te ora na roto i te Mesia ra o Iesu, ua faatiamâ ïa ia outou i te ture a te hara e a te pohe.  Ta te ture a Mose i ore i tia i te rave no te hara a te taata, ua tia i te Atua i to ’na tonoraa mai i ta ’na iho Tamaiti mai te taata hara ra te hoho‘a no te faaore i te hara, a faahapa ’tu ai i te hara i roto i te tino nei,  ia haapao tatou i te mau titauraa tia a te ture a Mose, ma te pee i ta te varua o te Atua, eiaha râ i ta te tino.  Te feia hoi e ora ra ia au i ta te tino, e mana‘o noa ïa ratou i te mau mea a te tino. Area o tei ora ra ia au i ta te varua o te Atua, e mana‘o noa ïa ratou i te mau mea o te varua.  Inaha hoi, te mana‘o-noa-raa i te mau hinaaro o te tino, o te pohe ïa. Area te mana‘o-noa-raa i te mau ohipa o te varua o te Atua, o te ora ïa e te hau.  No te mea, te mana‘o-noa-raa i te mau hinaaro o te tino, o te riroraa ïa ei enemi no te Atua, eita hoi te tino e auraro i te ture a te Atua, eita atoa iho â e nehenehe.  No reira, eita te Atua e mauruuru i te feia e ora ra ia au i ta te tino.  Tera râ, mai te peu e te parahi mau ra te varua o te Atua i roto ia outou, te ora nei ïa outou ia au i ta te varua o te Atua, eiaha râ ia au i ta te tino. Mai te peu râ aita te tahi taata e pee ra i te huru feruriraa o te Mesia,* e ere ïa taua taata ra no te Mesia. 10  Mai te peu râ ua hoê te Mesia e outou, ua pohe ïa te tino i te hara, e horoa mai râ te varua o te Atua i te ora no te faariroraa ia outou ei taata parau-tia. 11  I teie nei, mai te peu e te parahi ra i roto ia outou te varua o te Atua tei faatia mai ia Iesu mai te pohe mai, e faaora atoa ïa te Atua i to outou mau tino pohe maoti to ’na varua. 12  No reira e taeae ma, e aitarahu tatou, eiaha râ na te tino a ora ’tu ai ia au i te mau hinaaro o te tino. 13  Ia ora noa ’tu hoi outou ia au i te mau hinaaro o te tino, e pohe iho â outou. Ia haapae roa râ outou i ta te tino maoti te varua o te Atua, e ora ïa outou. 14  E te taata atoa e arataihia e te varua o te Atua, e tamaiti ana‘e hoi ratou na te Atua. 15  Aita hoi te varua o te Atua e faariro ia tatou ei tîtî a mǎta‘u faahou ai, na roto râ i taua varua ra i farii ai te Atua ia tatou ei tamaiti na ’na a pii atu ai tatou: “Aba,* to ’u Metua!” 16  Te haapapu mai ra te varua mo‘a ia tatou* e e tamarii mau tatou na te Atua. 17  E mai te peu e e tamarii tatou, e fatu atoa ïa tatou i te tuhaa ta te Atua e horoa mai. E horoa mai te Atua na tatou hoê â tuhaa e ta ’na e horoa na te Mesia. E ia apiti tatou i te mauiui o te Mesia, e faahanahana-atoa-hia ïa tatou e oia. 18  Ia ’u nei hoi, mea iti te mauiui ta tatou e faaruru nei ia faaauhia i te tau e faaite mai ai te Atua i te hanahana e fana‘ohia e tatou. 19  Te tiai ru nei hoi te mau mea i poietehia i te tau e itehia ’i ta te Atua mau tamaiti. 20  E oraraa faufaa ore hoi to te mau mea i poietehia, e ere i te mea hinaarohia, na te Atua râ i na reira a horoa atoa mai ai oia i te tiaturiraa e 21  e faaorahia te mau mea i poietehia i te faatîtîraa o te hara e te pohe ia roaa ia ratou te tiamâraa hanahana o te mau tamarii a te Atua. 22  Ua ite hoi tatou e, te autâ amui nei te mau mea atoa i poietehia e te mauiui ra ratou paatoa e tae roa mai i teie nei. 23  Oia atoa râ, tei ia tatou te hotu matamua, oia hoi te varua o te Atua, te autâ atoa ra tatou i roto ia tatou iho a tiai ru noa ’i e ia fariihia tatou ei tamaiti na te Atua e ia faatiamâhia to tatou tino maoti te hoo. 24  Ua faaorahia hoi tatou i teie tiaturiraa. Ia tupu râ te mea i tiaihia, e ere faahou ïa i te tiaturiraa. Nafea hoi te tahi taata e nehenehe ai e tiai i te mea i tupu ê na? 25  Ia tiai râ tatou i tei ore â i tupu, e tiai ru noa ïa tatou ma te faaoromai tamau. 26  Na reira atoa, te turu atoa mai ra te varua o te Atua no to tatou paruparu, no te mea aita tatou e ite eaha te tano ia ani atu na roto i te pure, na te varua râ o te Atua e ani onoono atu no tatou a autâ noa ’i tatou i roto i to tatou aau.* 27  Area râ te Atua, o tei paheru i to tatou aau, ua ite ïa oia i ta to ’na varua e ani ra no te feia mo‘a, e au hoi te reira i to ’na hinaaro. 28  Ua ite tatou e ua faanaho maitai te Atua i ta ’na mau raveraa atoa no te maitai o te feia e here ra ia ’na, te feia hoi i titau-manihini-hia no ta ’na opuaraa, 29  no te mea te feia ta te Atua i farii na mua, o ta ’na atoa ïa i faataa a‘ena ia tia maitai ratou i te hoho‘a o ta ’na Tamaiti ia riro oia ei tamaiti fanau-matamua-hia i rotopu e rave rahi taeae. 30  Hau atu â, te feia ta te Atua i faataa, o ta ’na atoa ïa i titau manihini, e ta ’na i titau manihini, o ta ’na atoa ïa i faariro ei taata parau-tia. E o ta ’na i faariro ei taata parau-tia, o ta ’na atoa ïa i faahanahana. 31  Eaha ïa te parau no nia i te reira? Mai te peu e tei to tatou pae te Atua, o vai ïa te patoi mai ia tatou? 32  I te mea e aita oia i faaherehere i ta ’na iho Tamaiti, ua tuu mai râ ia ’na no tatou paatoa, eita anei ïa te Atua raua ta ’na Tamaiti e horoa noa mai na tatou i te mau mea atoa ma te oaoa? 33  O vai te tuu mai i te pariraa i te feia maitihia e te Atua? Ua faariro hoi te Atua ia ratou ei taata parau-tia. 34  O vai te faahapa mai ia ratou? Ua pohe hoi te Mesia ra o Iesu e ua faatia-faahou-hia mai te pohe mai, e tei te rima atau o te Atua e te tia atoa ra oia ei arai no tatou. 35  Na te aha e faataa ê ia tatou i te here o te Mesia? Na te ati anei, te ahoaho, te hamani-ino-raa, te ereraa i te maa aore ra i te ahu, aore ra na te ‘o‘e anei? 36  Mai tei papaihia: “No oe matou e faaruru ai i te pohe i te roaraa o te mahana, e ua riro matou mai te mamoe ra i faataahia no te tupairaa.” 37  Area râ tatou, e upootia roa tatou i nia i taua mau mea atoa ra na roto ia ’na tei here mai ia tatou. 38  Ua papu roa hoi ia ’u e e ore roa ’tu te pohe, e te ora, e te mau melahi, e te mau faatereraa, e te mau mea e vai nei aore ra te mau mea e haere mai ra, e te mau puai atoa, 39  e to te vahi teitei aore ra to te hohonuraa, e e ore roa ’tu te tahi atu mea i poietehia e nehenehe e faataa ê ia tatou i te here o te Atua e faaitehia ra na roto i te Mesia ra o Iesu to tatou Fatu.

Nota i raro i te api

“Varua o te Mesia,” Heleni peneuma. A hi‘o i te titionare.
E ta‘o Arama teie, “Papa e!” te auraa.
O te taata o roto te parauhia ra. Heleni peneuma. A hi‘o i te titionare.
Aore ra “ma te ore e faaroohia.”