Eaha to roto?

Mau faaho'iraa ê

Tapura tumu parau

Ite no Iehova

Tahiti

Bibilia i nia i te reni | HURIRAA O TE AO APÎ O TE MAU PAPAI HELENI KERISETIANO

Roma 7:1-25

HAAPOTORAA O TE MAU TUMU PARAU

  • Faahoho‘ahia te matararaa mai i te ture a Mose (1-6)

  • Na te ture a Mose i faaite mai i te hara (7-12)

  • Te aroraa i te hara (13-25)

7  Eaha e taeae ma! Aita outou i ite (te parau atu nei hoi au i te feia ua ite i te ture) e e mana te ture a Mose i nia i te hoê taata a ora noa ’i oia?  Ei hi‘oraa, ua ati te hoê vahine faaipoipo i ta ’na tane na roto i te ture a ora noa ’i te tane. Ia pohe noa ’tu râ ta ’na tane, ua matara ïa oia i te ture a ta ’na tane.  No reira, a ora noa ’i ta ’na tane, e parauhia oia e vahine faaturi ia faaipoipo noa ’tu oia i te tahi atu tane. Ia pohe râ ta ’na tane faaipoipo, ua matara oia i ta ’na ture, e ere ïa oia i te vahine faaturi ia faaipoipo oia i te tahi atu tane.  Outou hoi to ’u mau taeae, mai te mea ra e i faaipoipohia na outou i te ture a Mose. Tera râ, ua hope te reira na roto i te tusia o te tino o te Mesia, ia ati outou ia ’na tei faatia-faahou-hia mai te pohe mai e ia faatupu tatou i te hotu no te hanahana o te Atua.  A ora noa ’i hoi tatou no ta te tino, oia hoi te mau hinaaro iino e hara ’i tatou, ta te ture a Mose hoi i faaite mai, ua ohipa ïa te reira i roto i to tatou tino* no te faatupu i te hotu e aratai i te pohe.  I teie nei râ, ua matara mai tatou i te ture a Mose no te mea aita to te reira e mana faahou i nia ia tatou, ia nehenehe tatou ia riro ei tavini na te Atua na roto i te varua mo‘a, e huru raveraa apî hoi teie, eiaha faahou na roto i te ture papaihia mai te raveraa tahito ra.  Eaha ïa te parau? E hape* anei te ture a Mose? Eita roa ’tu! Eita iho â vau e ite i te hara ahiri aita te ture a Mose. Ei hi‘oraa, eita vau e ite eaha te nounou ahiri aita te ture a Mose i parau: “Eiaha roa oe e nounou.”  No taua râ faaueraa ra, ua itea i te hara te hoê ravea no te faatupu i roto ia ’u i te nounou e rave rau. Aita ana‘e e ture, eita atoa ïa vau e ite eaha te hara.  Inaha hoi, i ora na vau hou te ture. I te taeraa mai râ taua faaueraa ra, ua ora mai te hara, area o vau, ua pohe ïa. 10  E taua faaueraa ra tei haapaohia no te ora, ua riro te reira ei pohe no ’u. 11  No taua râ faaueraa ra, ua itea i te hara te hoê ravea no te faahema e te haapohe ia ’u. 12  No reira, mea mo‘a te ture a Mose, mea mo‘a atoa taua faaueraa ra e te tia e te maitai. 13  Te auraa anei ïa e na te mea maitai e haapohe ra ia ’u? E ere roa ’tu! Na te hara râ. Na roto i te mea maitai, ua hopoi mai te hara i te pohe no ’u ia itehia eaha te hara. E te faaite ra taua faaueraa ra e mea ino mau te hara. 14  Te ture, no ǒ mai ïa i te Atua ra,* area o vau nei, e taata noa ïa tei hoohia ’tu ei tîtî na te hara. 15  Aita vau i ite no te aha vau e na reira ’i. Eita hoi au e rave noa i ta ’u e hinaaro e rave, o ta ’u râ e au ore roa nei, o ta ’u ïa e rave. 16  Ia rave râ vau i ta ’u e au ore nei, te farii ra ïa vau e mea maitai te ture a Mose. 17  I teie nei râ, e ere faahou o vau teie e rave nei, o te hara râ i roto ia ’u. 18  Ua ite hoi au e i roto ia ’u, i roto i to ’u nei tino, aita hoê a‘e mea maitai. Te hinaaro nei hoi au e rave i te mea maitai, aita râ ta ’u e nehenehe i te na reira. 19  Te mea maitai hoi ta ’u e hinaaro i te rave, aita ïa vau e rave ra. Area te mea ino ta ’u e ore e hinaaro i te rave, o ta ’u ïa e rave noa na. 20  No reira, ia rave noa ’tu vau i ta ’u e ore e hinaaro i te rave, e ere faahou ïa o vau teie e rave nei, o te hara râ i roto ia ’u. 21  Ua ite au i teie ture no ’u nei: Ia hinaaro vau e rave i te mea maitai, te ite ra vau i roto ia ’u te hinaaro e rave i te mea ino. 22  Mea au roa na ’u te ture a te Atua i roto i to ’u aau, 23  i roto râ i to ’u tino,* te ite nei au i te tahi atu ture o te aro ra i te ture o to ’u feruriraa e o te faatîtî nei ia ’u i raro a‘e i te ture o te hara e vai ra i roto i to ’u nei tino.* 24  Auê hoi au te taata ati rahi e! O vai te faaora mai ia ’u i te tino e aratai ra ia ’u i teie huru pohe? 25  Ia haamauruuruhia te Atua na roto ia Iesu Mesia to tatou Fatu! No reira, o vau iho nei, te auraro nei to ’u feruriraa i te ture a te Atua, to ’u nei râ tino, tei raro a‘e ïa i te ture o te hara.

Nota i raro i te api

“To tatou mau mero” na roto i te reo Heleni.
“Hara” na roto i te reo Heleni.
“No te varua ïa” na roto i te reo Heleni.
“To ’u mau mero” na roto i te reo Heleni.
“To ’u mau mero” na roto i te reo Heleni.